PANGARATAION 13:16 - BIBEL JAMITA NA DENGGAN

¹⁶ Angkon palaguton sude sinadongan ni halak kota i, jana dipagukguk di tonga ni alamanna i, lalu disurbu ma sude kota i dohot sasude na di bagasanna songon haul tu Tuhan Debatamunu. Dung sidung i sudena angkon tinggalkonon do i songon lobu jana nada tola be ulahan mambangunsa.

PANGARATAION 13:16 Referans Kwoze

JEREMIA 49:2

Tapi dapot do i hatihana baenonKu halak na mangingani Raba, kota sabungan ni Luat Amon i, umbege surak-surak ni parporangan. Gabe tading sego-segona noma kota i jana angka huta pagaran na humaliang i pe abis masurbu. Dung i buaton ni halak Israel ma mangulahi tanona i sian angka jolma na mangarampassa na salpu i.

JOSUA 8:28

Disurbu si Josua ma Ai, bulus dipadiar ia gabe lobu. Lopus saonnari laing tong do songon i parhutaan i.

JESAYA 25:2

Angka kota dibaen Ho gabe lobu, angka bentengna i sarge manghagopu. Bagas Godang na nipajongjong ni musu madung soada nada patureon be i salolot-lolotna.

JESAYA 17:1

Didok Debata, “Nada marrumangkon kota be Damaskus, tapi hum na sego-sego sajo noma.

JOSUA 6:24

Dung i disurbu tentara ni Israel ma sude kota i dohot sude na adong di bagasanna, asing sian angka barang sere, perak, tumbaga dohot angka barang na sian bosi. Dibuat halahi do angka barang-barang i jana dioban tu inganan panyimpanan ni arta nampuna ni Tuhan.

MIKA 1:6

I do umbaen na nidok ni Tuhan: “BaenonKu ma Samaria gabe timbunan ni batu di tonga padang dohot panyuanan ni bona ni anggur baenon ni halak. AmbungkononKu tapor-tapor ni kota i tu bagasan holbung jana bungkaronKu angka jongjonganna i.

JOSUA 6:26

Diparuar si Josua do di hatiha i larangan songon on, “Sanga ise na mancubo giot mambangun kota Jeriko on mangulahi, hona bura ni Tuhan do i. Sanga ise na mamayakkon ojahanna gabe agoan anak siangkaan; jana sanga ise na mamasang angka pintu ni horbanganna i gabe agoan anak sianggianna.”

PANGARATAION 7:25

Angkon tutunganmunu do sude angka patung na nisomba ni halahi, ulang por rohamunu di sere sanga perak na lohot di angka patung i jana ulang buat hamu muse i baen di hamu sandiri. Muda dilanggar hamu parenta on, mate ma hamu, angke magigi do Tuhan maradopkon parsombaan tu patung.

PANGARATAION 7:26

Sada pe sian angka patung i ulang jabat dioban hamu tu bagasan bagasmunu, anso ulang madabu tu hamu bura na di ginjang ni halahi. Angkon magigi do hamu jana angkon layas do idaonmunu angka patung i, angke na hona bura ni Tuhan do i.”

JEHESKIEL 26:14

Hum sada batu na pir sajo noma tadingkononKu, inganan ni angka parlaut manjomur jala ni halahi. Nada bangunon be mangulahi kota i. Au Tuhan Debata madung mandok songon i.”

HARURUAR 22:19

Ganop na marcampur dohot binatang, angkon bunuon.

JOSUA 6:21

Sude halak na adong di kota i, na tobang na poso, halaklahi dadaboru dibunu do sude dohot podang. Sude pahan-pahanan lombu, biri-biri dohot halode pe dibunu.