PAMUNGKAAN 45:5 - BIBEL JAMITA NA DENGGAN

⁵ Ulang pola mabiar hamunu sanga manyolsoli hamu hara ni na nigadismunu i au. Satutuna, Debata do da na manongos au tuson parjolo sian hamu laho mangoloi dohot paluahon bahat halak.

PAMUNGKAAN 45:5 Referans Kwoze

PAMUNGKAAN 50:20

Haru pe na dung satahi hian hamu laho mambaen na jat tu au, hape diuba Debata do hajahatan i gabe tu hadengganan, anso marhaluaan bahat halak na mangolu saonnari markite-hite pangalaho na masa na salpu i.

JOB 1:21

“Nada adong bagi na ahangku di na nitubuhon au, jana mate pe au nada mardiha-diha. Madung dilehen Tuhan i sudena jana Ia muse do na mambuatsa. Nipuji ma goar ni Tuhan i!”

LUKAS 23:34

Dung i martangiang ma Jesus, “Ale Amang, sesa ma hasalaan ni halahi! Angke nada diboto halahi sanga aha na nibaen ni halahi.”

PAMUNGKAAN 47:25

Dialusi halahi ma, “Songon i ma dengganna dibaen tuan i tu hami, madung dipalua tuan i hami; rade ma hami gabe hatoban ni raja i.”

2 KORINTUS 2:11

Hubaen pe songon i, anso ulang adong do dalan di Sibolis i laho mangarajai hita, angke taboto do angka sangkap ni Sibolis.

2 KORINTUS 2:7

Saonnari angkon ampunanmunu ma ia jana sosoanmunu mangulahi anso ulang mamarsaktu ia gabe mandele.

2 SAMUEL 17:14

Umbege i didok si Absalom dohot halak Israel i ma sude, “Dumenggan do na nidok ni si Husai on sian sipaingot ni si Ahitofel i.” Tutu ma antong na dung diputuskon Tuhan laho manyundati sipaingot ni si Ahitofel na denggan i, anso marmara si Absalom.

2 SAMUEL 12:12

Madung dibaen ho dosa di na buni, tapi padalanonKu ma na Huondamkon i torang di adopan ni sude Israel.’ ”

1 SAMUEL 1:19

Ancogotna i manyogot-nyogot dope, ngot ma si Elkana dohot dongan sabagasnia jana dung salpu maribadat tu Tuhan mulak ma halahi tu Rama. Jana rap ma si Elkana dohot si Hanna dadaborunia i, jana tulus ma dibaen Tuhan tangiang ni si Hanna i.

PILEMON 1:15

Betak na on do dalanna marsirang si Onesimus santongkin sian ho, anso dapot ho do ia mangulahi salolot-lolotna.

PAMUNGKAAN 37:28

jana hatiha mamolus deba saudagar halak Midian diparuar angka angkangna i ma si Josep sian bagasan sumur i, digadiskon halahi ma ia tu halak Ismael i arga dua pulu hepeng perak. Dung i dioban angka parjagal i ma ia tu Mesir.

PAMUNGKAAN 50:19

Tapi didok si Josep ma tu halahi, “Ulang pola mabiar hamu; harana nanggo Debata au.

PAMUNGKAAN 50:21

Ulang gamang hamu. Sarihononku do ngolumunu dohot ngolu ni angka dakdanakmunu.” Songon i ma dibaen si Josep paposkon roha ni halahi di bagasan hata na lambok, jadi mangonai do i tu roha ni halahi.

ESTER 4:14

Sanga na bia pe dalanna pasti maruli partolongan do halak Jahudi, anso malua halahi. Tapi anggo laing hohom do ho di bagasan pangalaho na songon on, ho sandiri pe mate do jana abis ma barita ni keluarga ni amangmu. Ise he umboto i, betak hara ni haporluan di angka hatiha na songon on do antong umbaen na hona pili ho gabe ratu!”