PAMUNGKAAN 37:4 - BIBEL JAMITA NA DENGGAN

⁴ Jadi dung diida angka angkangnia i na humolongan roha ni amang ni halahi i mida si Josep ulang mida halahi, gabe goyak ma da roha ni halahi mida si Josep jabat nada ra be halahi burju manghobari dohot ia.

PAMUNGKAAN 37:4 Referans Kwoze

PAMUNGKAAN 27:41

Gabe goyak ma roha ni si Esau mida si Jakob harani na nilehen ni amangnia i pasupasuna tu angginia i. Ning ia ma di bagasan rohania, “Nada pola sadia honok nari marujung ma ngolu ni damang on jana marsiluluton ma hami. Dung salpu i, hubunu ma si Jakob.”

1 JOHANNES 4:20

Muda adong na mandok, “Huhaholongi do Debata,” hape hosom rohania mida dongannia, pargabus do halak na songon i. Angke sanga ise na so mangkaholongi dongan na bolas idaonnia, nada tarbaen ia be mangkaholongi Debata na so jungada diida ia.

1 JOHANNES 3:12

Nada songon si Kain, na ro sian na jahat jana na mambunu anggina. Hara ni aha ma lakna umbaen na nibununia i? Dibaen na jahat do pambaenannia i, tapi na tigor do na nibaen ni angginia i.

1 JOHANNES 2:11

Tapi halak na margoyak ni roha mida donganna, laing na di hagolapan dope i. Na mardalan di bagasan hagolapan dope i jana na so diboto ia do sanga na giot tu dia ia kehe, angke nada marnida ia dibaen hagolapan i.

MASMUR 69:4

Halak na magigi mida au di na so dalanna, umbahat sian obuk na di uluniba. Sai giot agohonon ni angka halak na gogo au, dipahata-hata halahi ma au dohot hata na so tutu. Dipaksa halahi au paulakkon arta na so hurampas.

1 SAMUEL 17:28

Dibege si Eliab angkang ni si Daud siangkaan i do si Daud na manghata i dohot angka parangan i. Gabe muruk ma ia tu si Daud, didok ia ma, “Biasi ro ho tuson? Tu ise dipauruskon ho angka biri-birimi di halongonan? Huboto do na papuluk-pulukkon ho; inda he na giot mangaligi porang ho ro tuson?”

PAMUNGKAAN 37:5

Sanoli borngin-borngin, marnipi ma si Josep. Jadi hatiha mancaritohon nipinia i ia tu angka angkangnia i, mur goyak ma da roha ni halahi mida ia.

PAMUNGKAAN 4:5

tapi anggo si Kain dohot na nihaulkonnia i ditulak Tuhan do. Marpiar-piar ma muruk ni si Kain, jana murhing ma bohina hara ni murukna.

TITUS 3:3

Angke hita pe oto do najolo, nada mangoloi jana nada tigor. Dirajai angka hagiot dohot por ni roha na marragam rupa do hita. Na mangolu di angka hajahatan dohot gutgut dohot na marsihosoman hian do hita.

MASMUR 38:19

Bahat do musungku jana gogo, hosom roha ni halahi mida au, dalanna so binoto.

PAMUNGKAAN 49:23

Kejam do angka tukang pana mamorangi ia, mamana dohot mangkojar ia.

PAMUNGKAAN 37:11

Goyak ma roha ni angka angkangna i mida si Josep, tapi anggo amangna i laing marpikir-pikir do taringot tu nipi i.

1 JOHANNES 3:10

On ma parasingan ni angka dakdanak ni Debata sian angka dakdanak ni Sibolis: Sanga ise na so patuluskon hatigoran, sanga na so manghaholongi donganna, nada dakdanak ni Debata halak na songon i.

JEREMIA 12:6

Madung pola dihianati angka kahanggimu sandiri ho; dohot halahi mamorangi ho. Ulang porsaya ho tu halahi, haru pe tabo begeon hata ni halahi.”

MARKUS 3:25

Laing songon i muse do, muda so adong hasadaon di tonga-tonga ni na sabagas, sai marmusu na sada tu na sada nari, sego ma na sabagas i.