PAMUNGKAAN 18:21 - BIBEL JAMITA NA DENGGAN

²¹ Na giot manuat do Au tu sadu anso Huboto sanga na tutu do, sanga nada angka tuhas-tuhas na Hubege i.”

PAMUNGKAAN 18:21 Referans Kwoze

HARURUAR 3:8

Jadi hara ni i, madung mijur Au laho palua halahi sian tangan ni halak Mesir, bope maroban halahi haruar sian luat i, tu sada luat na bidang jana na napu, tano inganan ni susu dohot aer ni loba, jana saonnari diingani halak Het, Amori, Peris, Hewi dohot Jebus.

PAMUNGKAAN 11:5

Jadi mijur ma Tuhan laho mangaligi kota dohot tugu na nipajongjong ni jolma i.

ZEPANYA 1:12

Di hatiha i buatonKu ma obor jana galedaonKu ma kota Jerusalem. UhumanKu ma halak na disi na marpos ni roha jana puas dibaen dirina sandiri, jana na mandok di bagasan rohana, na so jungada sanga aha dibaen Tuhan na denggan sanga na jat.

MIKA 1:3

Manuat do Ia sian parmiananNa na badia i, jana mardalan di angka puncu ni dolok na di portibi.

JEREMIA 17:10

Au do Tuhan na mandodo roha; Huuji do ate-ate ni jolma. BaloskononKu do tu ganop hombar tu pangalahona; jana Hubaen hombar tu pambaenanna.”

JOSUA 22:22

“Debata do Na Sun Markuaso! Ia do Tuhan! Debata do Na Sun Markuaso! Ia do Tuhan! Diboto Ia do sanga hara ni aha umbaen na hami patupa pangalaho on jana giotnami pe ulang so dohot hamu nian umbotosa! Sugari na tutu hami baen pangalaho i mardongan maksud mangalo Tuhan sanga hara ni na so porsaya be hami tuSia, bunu hamu ma hami saonnari!

PANGARATAION 8:2

Ingot hamu ma! Opat pulu taon lolotna Tuhan Debatamunu manogu-nogu hamu di pardalanan na dao manyalpui parhorsihan. Diloas Ia masa angka hamaolon tu hamu laho manguji hamu, anso tarida Ia sanga aha na giot baenonmunu jana sanga na oloanmunu do angka parentaNia.

HARURUAR 33:5

Madung diparentahon Tuhan tu si Musa anso didok ia tu bangso i, “Bangso sijogal rungkung do hamu. Muda mardalan Au di tonga-tongamunu hum sangombas pe tontu sun ma hamu mago baenonKu. Jadi hara ni i bukai hamu ma angka barang parhiasanmunu i anso Huida jolo sanga aha na giot sibaenonKu tu hamu.”

PAMUNGKAAN 11:7

Dumenggan ma mijur Hita jana Tapasarsar ma hata ni halahi anso ulang be marsiastuan hata ni halahi be.”

IBRANI 4:13

Umpe sada sian na nitompa i na buni, na so niida ni Debata. Talak do sudena jana patar di joloNia. Jana angkon lehenonta do tuSia partanggungjawabanta.

1 TESSALONIKA 4:16

Saulahon di na mijur Tuhan Jesus sandiri sian banua ginjang, pio-pio ma kapala ni surusuruan i marsora na gogo jana dipalu ma sarune ni Debata songon boa-boana. Jadi angka halak na dung porsaya tu Kristus dompak di ngoluna be, pangoluon ma halahi parjolo.

2 KORINTUS 11:11

Biasi hudok songon i? Adong he ulaning na so holong rohangku mida hamu? Debata ma na umboto holong ni rohangku!

JOHANNES 6:38

Angke umbaen na mijur pe Au sian banua ginjang, na giot patuluskon hagiot ni na marsuru Au do, nada hagiotKu sandiri.

LUKAS 16:15

Tapi didok Jesus ma tu halahi, “Hamu ma angka na mandok di jolo ni halak, sai na tigor hamu. Tapi diboto Debata do isi ni rohamunu. Angke sanga aha na nietong ni roha ni jolma na gincat, i ma na toruk di panatapan ni Debata.

JEREMIA 17:1

Didok Tuhan ma, “Madung tarsurat dosa ni Juda marhite pena bosi na marmata intan, taruhir di ateatemunu dohot di langgatan ni halahi.

MASMUR 90:8

Dipatalak Ho angka dosanami di joloMu, dosanami na buni pe torang do di parnidaanMu.

JOB 34:22

Nada adong na golap sanga songon dia pe holomna, na tarbaen manabunihon halak pardosa.

PANGARATAION 13:3

ulang ma lehen hamu saotik pe rohamunu tusi. Na nipake ni Tuhan Debatamunu do halakna i laho manguji hamu laho marnida sanga na tutu situtu do sian sandok roha dihaholongi hamu Tuhan.

PAMUNGKAAN 18:17

Dung i didok Tuhan ma di bagasan rohaNia, “Nada pola bunihononKu tu si Abraham sanga aha na giot baenonKu.

MASMUR 14:2

Sian banua ginjang ditatap Tuhan i do jolma, manjalaki na bisuk na ra manyomba Ia.

PAMUNGKAAN 6:12

Ditatap Debata ma sude tano on jana diida Ia do hajahatanna dibaen madung sude ngolu ni jolma i jahat.

JUNUS 1:2

Ning Ia ma, “Kehe ma ho tu Ninive, tu kota na godang i laho mangancam kota i, angke madung lalu tu Au hajahatan ni halahi.”