MIKA 4:6 - BIBEL JAMITA NA DENGGAN

⁶ Didok Tuhan ma, “Dapot do i muse hatihana palagutonKu angka jolma na Huuhumi i, i ma angka na markancit di habuangan i.

MIKA 4:6 Referans Kwoze

ZEPANYA 3:19

Ro do i hatihana ropukkononKu na mamisat hamu, jana halak na tengka paluaonKu; sude halak buangan mulak toguonKu. Muba habilean ni halahi gabe hasangapan; sanga di dia, disandok portibi, marmulia ma halahi jana dipuji.

JOHANNES 10:16

Adong dope angka biri-biri na asing laing Au nampunasa, tapi nada sabara dohot angka biri-biri on. Halahi pe angkon obanonKu do jana laing tangihonon ni halahi do sorangKu. Sudena halahi angkon gabe sapunguan jana sada parmahan.”

JESAYA 56:8

Madung marjanji Tuhan Debata na dung pataruhon Israel bangsoNa i mulak sian habuangan, obanonNia muse do angka bangso na asing anso marsada dohot halahi.

MASMUR 147:2

Mulak ma suang Jerusalem baenon ni Tuhan, obanonNia noma mulak angka halak na tarbuang.

LUKAS 19:10

Angke na giot manjalahi dohot paluahon angka halak na lilu do umbaen na ro Anak Ni Jolma i.”

MIKA 2:12

Didok Tuhan ma mangulahi, “Ale halak Israel na teba! Angkon palagutonKu do hamu jana pasadaonKu songon biri-biri na mulak tu barana. Songon padang na gok biri-biri, laing songon i ma tanomunu mangulahi gok dohot bahat ni jolma.

JEHESKIEL 36:24

Sian ganop bangso dohot luat, palagutonKu ma hamu jana paulahonKu tu tanomu sandiri.

JEREMIA 31:8

Sian Utara Huoban halahi mangulahi; Hupalagut halahi sian angka ujung ni portibi. Halak na mapitung dohot na lumpu pe dohot do disi, songon i muse ina na baru horas dohot na giot di api. Giot marroan ma halahi sudena, songon bangso na godang tu luat on.

JEREMIA 3:18

Mardomu ma Israel dohot Juda, jana rap ro ma halahi sian tano habuangan na di Utara. Mulak ma halahi tu luat na dung Hupasahat tu ompu ni halahi gabe tano pusako.”

MASMUR 38:17

Tartuktuk do au jana saotik nari noma anso dabu, sai na torus noma hancitan au.