MATEUS 3:6 - BIBEL JAMITA NA DENGGAN

⁶ Dioku halahi ma angka dosa ni halahi, gabe dididihon si Johannes ma halahi di Batang aek Jordan i.

MATEUS 3:6 Referans Kwoze

BAENON NI ANGKA RASUL 19:18

Bahat do halak na dung porsaya i tu Jesus mangoku angka pangalaho ni halahi di jolo ni angka dongan na bahat.

1 JOHANNES 1:9

Muda taoku dosanta, gabe na bonar jana na tigor do Ia, jadi sesaonNia ma dosanta jana dipaias Ia hita sian sasude hageduhan.

IBRANI 9:10

Harana anggo angka upacara na songon i na marpardomuan tu sipanganon sajo do i dohot siinumon bope angka ragam-ragam ni upacara na mambaen ias. Hum angka Tona na tarida do na mardalan i lopus tu hatihana sanga andigan baenon ni Debata haimbaruan.

MATEUS 3:11

Anggo au, aek do hudidihon tu hamu. I ma pataridahon na dung muba rohamunu sian angka dosamunu. Tapi anggo na giot ro i di pudingku, Tondi Na Badia dohot api do didihononNia tu hamu. Gumodang dope Ia sian au. Hum mambuka tali ni sipatuNia pe tehe nada tuk dope au.

IBRANI 6:2

i ma parsiajaran parmulaan taringot tu pandidion sanga taringot tu na mamayakkon tangan tu halak; sanga pe taringot tu na mulak mangolu sian hamatean bope uhuman na so ra mantak.

KOLOSSE 2:12

Angke di na nididihon i hamu, ditanom do hamu rap dohot Kristus; jana laing hara ni pandidion i muse, dohot do hamu dipangolu mangulahi rap dohot Kristus angke dihaporsayai hamu do kuaso ni Debata na dung pangoluhon Kristus sian hamatean.

1 KORINTUS 10:2

Anso gabe dohot mangihutkon si Musa, angkon dipandidihon do halahi sude di bagasan ombun dohot di bagasan laut i.

BAENON NI ANGKA RASUL 22:16

Saonnari pe, ulang be palolot paintehon. Jongjong ma ho anso nipandidihon. Pio-pio ma ho mangido tolong tu Tuhan anso dipalua ho sian angka dosami.’ ”

BAENON NI ANGKA RASUL 11:16

Jadi tarsingot ma tu rohangku, na jungada didok Tuhan i, ‘Si Johannes mandidihon dohot aek, tapi anggo hamu nipandidihon dohot Tondi Parbadia.’

BAENON NI ANGKA RASUL 1:5

Harana anggo si Johannes, aek do dididihon ia tu hamu, tapi nada pola piga ari nari be pandidihonon ma hamu dohot Tondi Parbadia.”

LUKAS 3:16

Hara ni i ma umbaen didok si Johannes tu halahi sude, “Dohot aek do hudidi hamu, tapi ro ma sanoli on Sada halak na gumodang sian au. Mangkarhari tali sipatuNa pe nada tarpake dope au. DidihononNia ma tu hamu Tondi Parbadia dohot api.

MARKUS 1:5

Markehean ma halak sian Judea dohot sian Jerusalem laho manangihon si Johannes. Dioku halahi ma dosa ni halahi, dung i dididihon si Johannes ma halahi di Batang aek Jordan.

DANIEL 9:4

Huoku do disi sude dosa ni bangsongku tu Tuhan Debatangku. Ningku do, “O Tuhan Debata, na godang do Ho jana hami parsangapi do Ho. Sai dipatulus Ho do baga-bagaMu jana dipatuduhon Ho do holong ni rohaMu na manongtong i tu angka na marholong ni roha tu Ho jana na patuluskon sanga aha na niparentahonMu.

JEHESKIEL 36:25

Dung i pispisonKu ma hamu dohot aek na lan, anso ias hamu sian sude gana-ganaanmunu dohot sian sasude na pahodarkon hamu.

PODA 28:13

Na manabunihon dosana, nada i maruntung. Sanga ise na mangokui jana manadingkon dosana, Debata do, mangalehen ampun.

MASMUR 32:5

Jadi gabe huoku dosangku tu Ho, nada adong hubunihon hasalaanku tu Ho. Diputuskon rohangku do mangoku i tu Ho, gabe diampuni Ho sude dosangku tu Ho.

JOSUA 7:19

Didok si Josua ma tu si Akan, “Ale anak hasian! Oku jana dokkon ma torus torang di jolo ni Tuhan, Debata ni Israel, sanga aha na nibaenmu. Paboa ma tu au, ulang bunihon.”

BILANGAN 5:7

angkon okuon ni halakna i dosana jana gararonnia sude, ditamba dope dua pulu porsen tu halak na nirugiannia i.

HAMALIMON 26:40

Tapi anggo pomparanmu dioku halahi do dosa ni halahi sandiri dohot dosa ni ompu ni halahi, na dung mardosa hara ni na dialo halahi Au,

HAMALIMON 16:21

Diampehon ia ma tangannia dua-dua tu ginjang ni ulu ni hambeng i lalu mangoku sude hasalaan, dosa, bope pangalaosion ni bangso Israel. Marhite na songon i, sude hajahatan ni bangso Israel dipayakkon tu ginjang ni ulu ni hambeng i. Dung i adong do sada halak na dung nitontuhon hian mangayak hambeng i tu parhorsihan.

1 PETRUS 3:21

Antong, na masa i ma na gabe gambaran ni pandidion sisaonnari on na paluahon hamu. Nada karejo na giot paiaskon angka na hodar di pamatangniba pandidion i, tapi songon janjimunu do i tu Debata sian taroktok na denggan. Gabe dipalua pandidion i ma hamu hara ni na dung mulak mangolu Jesus Kristus mangulahi sian hamatean,

JAKOBUS 5:16

Hara ni i, marsioku dosana ma hamu jana marsitangiangan anso dipamalum hamu. Na margogo situtu do tangiang ni halak na mangihutkon hagiot ni Debata.

ESRA 10:1

Jadi taran na martangiang i si Esra lalu na tangis ia mangaku dosa di Bagas Ni Tuhan i, bahat sajo do halak Israel ro marlagut, halaklahi bope dadaboru dohot angka dakdanak. Dihuliangi halahi ma ia lalu tangis mangangguhi.

LUKAS 1:16

Toguonnia do bahat halak Israel anso mulak tu Debata, Tuhan ni halahi.