MATEUS 25:14 - BIBEL JAMITA NA DENGGAN

¹⁴ “Muda ro Anak Ni Jolma i songon Tuhan, tarsongon sada bayo na giot kehe mardalanan tu na dao do pangalahona. Dipiohon ia ma angka naposonia, laho pasahatkon sinadongannia tu halahi.

MATEUS 25:14 Referans Kwoze

MARKUS 13:34

Tarsongon sada halak na kehe tu na dao maninggalkon bagasna do pangalaho ni i. Dipasahat ia ma tu angka naposonia laho mangurus bagasnia. Dipasahat ma karejona be. Tu sijago pintu ditonahon ia hian do anso tangkas ia na manjagoi i.

EPESUS 4:11

Ia do “na mambagi-bagihon angka silehen-lehen tu jolma,” tu na deba dilehen Ia silehen-lehenNia anso gabe rasul, tu na asing anso gabe panurirang; tu na deba nari muse anso gabe parjamita di Jamita Na Denggan i, jana tu na asing muse dilehen Ia silehen-lehenNia anso gabe panjago ni parlagutan dohot angka guru.

1 KORINTUS 12:4

Marragam rupa do silehen-lehen sian asi ni roha ni Debata, tapi Tondi na sasada i do mangalehen i.

MATEUS 21:33

“Tangihon hamu ma jolo umpama na sada nari on,” ninna Jesus. “Adong ma sahalak partano na bidang nampuna kobun anggur, dihandang ia ma sude humaliang kobun i, dihuar ia ma lubang inganan pamoroan ni anggur, dibaen ia muse ma tuhu-tuhu inganan ni na manjago. Dung i dipabolahon ia ma kobun anggurnia i tu angka pamola, kehe ma ia mardalanan tu luat na asing.

1 KORINTUS 3:5

Jolma na bia ma he pola si Apollos? Jana tarbia muse si Paulus? Pangoloi ni Debata sajo do hami na dua, na dung manogu-nogu hamu anso porsaya tu Debata. Karejo na nipasahat ni Tuhan i tu hami be, i sajo do na hami dalankon.

LUKAS 20:9

Dipaboa Jesus dope umpama on tu angka jolma i, “Adong ma sada bayo nampuna kobun anggur. Dipabolahon ia ma kobun i tu piga-piga halak pamola di na laho kehe ia tu inganan na asing jana disi ma ia maringanan honok sajo.