MATEUS 13:8 - BIBEL JAMITA NA DENGGAN

⁸ Tapi adong muse do antong same i na madabu tu tano na napu. Marbatu ma anggo i. Adong na saratus lompit parbatuna. Adong na onom pulu lompit, adong na tolu pulu lompit.

MATEUS 13:8 Referans Kwoze

LUKAS 8:15

Same na madabu tu tano na napu i, i ma manggambarkon angka halak na umbege hata i, jana na manjagohon sadenggan-dengganna di bagasan roha ni halahi. Burju do halahi jana sobar, gabe tulus ma marbatuhon parbatu na denggan.”

MATEUS 13:23

Dung i anggo same na disabur tu tano na napu i, i ma tarsongon halak na umbege jamita i, tangkas diastui ia. Ramos ma parbatuna. Adong ma i na saratus lompit bahatna. Adong na onom pulu lompit bahatna. Adong na tolu pulu lompit bahatna sian same na parjolo i.”

JOHANNES 15:8

Muda ramos hamu marbatu, gabe hasangapan ni Ama i do i; songon i ma dalanna baenonmunu patuduhon na tutu situtu hamu siihutkon Au.

PAMUNGKAAN 26:12

Disabur si Ishak ma same ni suan-suanan di luat i, jana di bagasan taon i dapot ia ma suhana saratus lompit sian na nisaburnia i, dibaen dipasupasu Tuhan do ia.

PILIPPI 1:11

Angka pambaenan na denggan noma mardapot-dapot sian ngolumunu, hum sian Jesus Kristus sajo do na tarbaen pataridahon suha na songon i; gabe nipasangap jana nipuji-puji ma Debata.

SURAT NI SI PAULUS TU PARLAGUTAN ROM 7:18

Huboto do nian, na so adong sanga aha pe na denggan di bagasan diringku; i ma di bagasan bako na adong di au songon jolma na somal. Adong do nian hagiot ni roha di au, tapi nada mambaen na denggan.

MATEUS 13:7

Adong muse ma na madabu tu antara ni duri-duri. Mur magodang ma duri-duri i gabe tarhapit ma same i.

MARKUS 4:8

Tapi adong muse do na madabu tu tano na napu. Martubuan ma same i, lopus magodang lalu marbatu ramos. Adong na tolu pulu lompit suhana, adong na onom pulu, adong muse dope na saratus lompit.”

MARKUS 4:20

Same na nisabur di tano na napu i, i ma tarsongon angka na manangihon hata i, jana laing dijagit rohana. Tarida ma parbatuna. Adong na tolu pulu lompit, adong muse na onom pulu lompit. Jana adong ma na sampe saratus lompit suhana.”

LUKAS 8:8

Tapi adong muse do same na madabu tu tano na napu, gabe tubu ma i jana marsuha ma saratus lompit.” Dung i dipaujung Jesus ma umpamania i songon on, “Sanga ise na marpinggol laho marbinege, ditangihon ia ma!”