MATEUS 10:22 - BIBEL JAMITA NA DENGGAN

²² Goyak ma roha ni halak sude mida hamu hara ni Au. Tapi na torus tahan lopus tu ujungna, i do na giot paluaon.

MATEUS 10:22 Referans Kwoze

MATEUS 24:13

Tapi sanga ise na tahan lopus tu ujungna, gabe paluaon ma ia.

JAKOBUS 1:12

Martua do sanga ise na sobar di na manaon pandugaan. Angke muda dung disalpui ia pandugaan i, manjagit upa ma ia, i ma hangoluan na nijanjihon ni Debata tu angka na mangkaholongi Debata.

HALUMBAAN 2:10

Ulang ho mabiar taringot tu na giot taononmu. Ligi ma dabuon ni sibolis ma deba sian hamu tu bagasan hurungan, anso niuji hamu, jana manaon parkancitan ma hamu salolot sampulu ari. Sai bonar ma rohamunu lopus tu hamatean i, dung i lehenonKu ma di ho tuku hangoluan.

MARKUS 13:13

Sude ma halak margoyak ni roha mida hamu hara ni Au. Tapi sanga ise na tahan lopus tu ujungna, i do na dapotan haluaon.”

MATEUS 10:39

Sanga ise na giot pajolohon haporluan ni ngoluna sandiri, angkon magoan ngolu. Tapi halak na magoan ngolu hara ni Au, halak sisongon i do na dapotan ngolu.”

1 JOHANNES 3:13

Antong hamu ale angka dongan! Ulang pola homang be rohamunu muda dihagigihon portibi on hamu.

MATEUS 24:9

Dung i ditangkupi ma hamu, dipasahat ma tu parkancitan anso dibunu. Goyak ma roha ni halak na satano on mida hamu hara ni goarKu.

SURAT NI SI PAULUS TU PARLAGUTAN ROM 2:7

Lehenon ni Debata ma ngolu na manongtong tu sude na mangkaburjuhon na denggan, hasangapan na sanggam jana na manongtong i.

IBRANI 6:11

Giotnami nian sugari laing ringgas ma hamu, lopus dijagit hamu na niarop ni rohamunu i.

JOHANNES 17:14

Madung Hupalalu tu halahi pangajaran ni Damang jana dihosom portibi on do halahi, angke nada portibi on nampuna halahi; laing sarupa ma i tu Au na so nampuna ni portibi on.

GALATIA 6:9

Hara ni i, ulang ma loja hita mambaen angka na denggan; angke muda inda marnaloja hita mambaen angka pangalaho na songon i angkon sabionta do suha ni i di hadudumpang ni hatihana.

LUKAS 6:22

Martua ma hamu muda goyak roha ni halak mida hamu jana nada dijagit hamu, boti dipalayas-layas jana didok halak na jahat hamu, hara ni Anak Ni Jolma i!

2 KORINTUS 4:11

Salolot mangolu hami, sai tongtong do mangondam hamatean i tu hami hara ni Jesus, anso tarpataridahon muse ngolu ni Jesus di pamatangnami na ra mate on.

MATEUS 5:11

Martua ma hamu muda diincahi jana diayak-ayak halak hamu, jana dipardok halahi ragam-ragam na jat na so tutu adop hamu hara ni Au.

HALUMBAAN 2:17

Ditangihon na marpinggol i ma na nidok ni Tondi i tu angka parlagutan i. Di na monang i do lehenonKu mangan sian manna na buni, jana lehenonKu ma disia batu na bontar. Niuhir do di batu i sada goar na imbaru na so binoto ni sanga ise pe asing sian halak na manjagit i.”

JOHANNES 7:7

Nada na ra portibi on mangkagigihon hamu. Tapi anggo Au tutu ma hagigian ni portibi on, hara ni na sai Hudok tu portibi on bahaso na jahat pambaenanna.

LUKAS 8:15

Same na madabu tu tano na napu i, i ma manggambarkon angka halak na umbege hata i, jana na manjagohon sadenggan-dengganna di bagasan roha ni halahi. Burju do halahi jana sobar, gabe tulus ma marbatuhon parbatu na denggan.”

HALUMBAAN 3:21

Di na monang i ma lehenonKu anso juguk ia rap dohot Au di habangsangKi, laing songon Au na monang jana na juguk rap dohot Damang di habangsaNia i.

HALUMBAAN 2:7

Ditangihon na marpinggol i ma na nidok ni Tondi i tu angka parlagutan i. Di na monang i do lehenonKu mangankon parbatu ni hayu hangoluan, na di Pirdaus.”

IBRANI 3:14

Sapartohapan do hita on sudena rap dohot Kristus; asal ma togu tatiop lopus tu ujungna, sanga aha na tahaporsayai di mulana i.

HALUMBAAN 2:26

Jana barang ise na monang jana na mangkarejohon karejongKu lopus tu ujungna, lehenonKu ma kuaso tu halahi, maradopkon angka bangso.

BAENON NI ANGKA RASUL 9:16

Jana patuduhononKu do tusia angka sitaonon na giot taononnia hara ni Au.”

HALUMBAAN 2:3

Huboto do na sobar hamu dohot na manaon parkancitan hara ni goarKu, hape laing nada pola mandele hamu.

PODA 29:27

Halak na burju nada sonang rohana tu halak na jahat; magigi do halak na jahat tu halak na burju.

LUKAS 21:17

Sude ma halak margoyak ni roha tu hamu hara ni goarKu.

LUKAS 21:19

Muda martahan hamu jana sobar, dapotan ngolu ma hamu.”