MASMUR 92:12 - BIBEL JAMITA NA DENGGAN

¹² Martunas do partigor i songon bona ni kurma, tubu simbur songon bona ni sampinur di Libanon.

MASMUR 92:12 Referans Kwoze

MASMUR 1:3

Tarsongon hayu na di topi ni batang aek do ia, na marbatu di hatihana, boti pe nada jungada malos bulungna, mardohar do halahi di na nikarejohonna.

JEREMIA 17:8

Songon hayu na di topi ni batang aek na nipangolu do halahi manjarar uratna lalu tu aek i. Nada mabiar ia logo ni ari sai rata do angka bulungna i. Haru pe nada ro udan, nada pola susa angke sai marparbatu do i.

MASMUR 104:16

Bona ni sampinur di Libanon diaeki maradu bornokan, angka hayu na nisuanMu sandiri do i, ale Tuhan.

MASMUR 52:8

Hape anggo au tarsongon bona ni zetun na rata do di bagasan Bagas Ni Debata. Huhaporsayai do holong ni rohaNia na manongtong i ro di salolot-lolotna.

BILANGAN 24:6

Tarsongon barisan ni bona ni harambir. Suman tu kobun di topi ni aek godang. Songon hayu gaharu na nisuan ni Tuhan, tudos tu hayu ares na donok tu paridian.

AMOS 2:9

Haru songon i pe ale bangsongKu, hara ni hamu do umbaen na Huabisi halak Amori na ginjang-ginjang i songon bona ni tusam dohot na gogo-gogo i songon bona ni sampinur.

JESAYA 65:22

Nada pajongjongon ni halahi bagi aha, anso halak na asing manginganisa, jana nada suanon ni halahi bagi aha, anso halak na asing mangankon parbatuna. Angke umur ni bangsongKu angkon saginjang ni umur ni hayu, jana angka halak na Hupili angkon mandai suha ni parkarejoan ni tanganna.

MASMUR 72:7

Salolot di ngoluna, sai mur tu jegesna ma manjarar hatigoran, jana donaon na marlobian saleleng adong dope bulan!

JESAYA 55:13

Gonti ni sihupi tubu ma bona ni sampinur, gonti ni latong tubu ma hayu na huskus. Songon tanda na hot na paingotkon tu rohamunu, taringot tu na dung Hubaen, Au Tuhan mambaensa di hamu.”

1 RAJA-RAJA 6:29

Sude dingding sabola sian bagasan di Bagas Ni Debata i dipajeges dohot ukiran ni gambar ni angka kerub, angka batang ni kurma dohot bunga-bunga na kombang.

MASMUR 92:7

halak na so ture simbur do martumbur songon duhut simbur, jana halak na jahat martamba kayo jana sonang; tapi laing abiskonon do halahi sudena,

1 RAJA-RAJA 4:33

Malo do ia mangkatai taringot tu angka hayu dohot suan-suanan – sian sampinur Libanon lopus tu lumut-lumut na tubu di angka bire ni batu i. Mangkobari muse do ia taringot tu angka binatang-binatang, songon unggas, binatang na manjirir bope ihan.

MASMUR 148:9

Puji ma Ia, hamu ale dolok dohot angka tor, ale suan-suanan dohot sude hayu harangan;

ESTER 9:5

Songon i ma pangalahona gabe tarbaen halak Jahudi mambaen sanga aha hagiot ni rohana maradopkon musu ni halahi, dialo halahi ma dohot podang lalu dibunui halahi.

MASMUR 37:34

Tu Tuhan ma mararop roha jana oloi ma parentaNa, gabe angkatonNia ma ho, jana baenonNia gabe nampuna di tano teanan; idaonmu ma parjahat dibaen marmorotan.

MIKA 7:10

Ligion ni musungku ma i gabe maila ma ia jana ditutupi bohina, ia do na mandok tu au, “Di dia do Tuhan Debatamu?” Tapi anggo saonnari idaon ni halahi ma sanga na bia baenon ni Tuhan maradopkon au, jana maila ma halahi. Ligionku ma ia di dege-dege songon bustak di dalan.