MASMUR 60:1 - BIBEL JAMITA NA DENGGAN

¹ Di bagasan hamumurukMu diponggol Ho do partahanannami, jana nada ra Ho ale Debata rap dohot hami. Tapi anggo saonnari, mulak ma Ho tu hami.

MASMUR 60:1 Referans Kwoze

2 SAMUEL 8:3

Dung i muse ditaluhon si Daud ma si Hadadeser anak ni si Rehob na mamarenta di Zoba, i ma sada harajaan di lambung ni Damaskus. Na topet do di ari i di pardalanan si Hadadeser laho pasuangkon kuasonia di luat na di soksok ni Batang aek Efrat.

MASMUR 44:9

Hape saonnari ditadingkon Ho do hami, dipadiar Ho hami ditaluhon halahi. Nada be Ho maju rap dohot hami.

1 JUJUR TAON 18:3

Dung i diserang si Daud muse ma si Hadadeser raja ni Zoba di lambung ni Luat Hamat na di tano Siria. Di pardalananna do hatiha i si Hadadeser laho pabidangkon kuasonia di luat na di lambung ni soksok ni Batang aek Efrat.

2 SAMUEL 5:20

Dung i kehe ma si Daud tu Baal-Perasim jana disi ma ditaluhon ia pasukan ni Pilistin i. Jana didok ia ma, “Dionjarkon Tuhan do partahanan ni musungku, songon aek magodang na mamburgat sasudena di sada ombas.” Jadi gabe digoari ma inganan i, Baal-Perasim.

MASMUR 90:13

Ale Tuhan intap ni andigan sai milas rohaMu? Marpangulahi jana ibo ma rohaMu di angka naposoMon.

MASMUR 85:4

Marpangulahi ma rohaMu mida hami, ale Debata sipalua hami, ulang be muruk Ho tu hami.

2 RAJA-RAJA 14:7

Di sada parporangan dibunu si Amasia do sampulu ribu parangan ni Edom di Rura Na Ancim, jana dibuat ia kota Sela jana digoari ia ma kota i gabe Jokteel. Lalu tu sadari on laing Jokteel do goar ni kota i.

MASMUR 89:19

Narobi di bagasan sada parnidaan, didok Ho tu naposoMu na setia, “Madung Huurupi sada halak na tongam, madung Hupatimbo sada halak sian tonga-tonga ni na bahat.

MASMUR 89:3

Ningmu do, “Madung Hupudun janji dohot halak na Hupili, madung marsumpa Au tu si Daud, naposongKi:

MASMUR 80:3

Pasuang ma hami ale Debata; hara ni habasaonMu, tatap ma hami, jadi gabe malua ma hami.

MASMUR 79:5

Ale Tuhan, torus noma lakna Ho muruk, jana sai marapi purun hamumurukMu?

MASMUR 74:1

Ale Debata, salolot-lolotna dehe tadingkononMu hami? Biasi torus muruk Ho tu bangsoMu sandiri?

MASMUR 60:10

Ale Debata, situtu ni rohaMu do nada rap dohot hami? Nada he maju Ho rap dohot tentaranami i?

MASMUR 59:11

Ulang bunu halahi, anso ulang lupa bangsongki. Marhite kuasoMu, ayak ma halahi cuka-ciri, taluhon ma halahi, ale Tuhan pangondiannami.

MASMUR 59:1

Ale Debatangku, palua ma au sian angka musungku, ondihon ma au sian halak na mangaroro au.

2 JUJUR TAON 25:11

Dihabaranihon si Amasia ma dirinia jana dioban ia ma tentarania i tu Rura Na Ancim, marporang ma halahi disi jana dibunu halahi ma sampulu ribu halak parajurit ni Edom.

1 JUJUR TAON 28:9

Jadi tu si Salomo, didok si Daud ma, “Amang, Debata na nisomba ni amangmu ma oku gabe Debatamu. Angkon oloanmu do Ia sian sonang dohot ias ni rohamu. Harana diboto Ia do sude pikiran dohot pos ni rohanta. Muda dijalahi ho Ia, gabe padumpang ma dohot Ia, tapi muda ditadingkon ho, tulakkononNia noma ho salolot-lolotna.

1 SAMUEL 13:11

tapi marsapa ma si Samuel, “Aha dehe na nibaen ni raja i?” Dialusi si Saul ma, “Huida madung mamungka ditadingkon rayat i au, hape laing nada ro amang di hatiha na dung ditontuhon. Boti muse madung marlagut halak Pilistin di Mikmas.

1 SAMUEL 4:17

Dialusi sioban barita i ma, “Maporus do halak Israel sian halak Pilistin; bahat sajo do na mate! Anakmu na dua i pe, amang, si Hofni dohot si Pinehas, marujung do. Jana dirampas musu i do Poti Parjanjian ni Debata!”

MASMUR 108:11

Na so dohot do Ho ale Debata rap dohot hami? Na so dohot do Ho maju rap dohot hami?

MASMUR 79:9

Ale Debata, sipaluanami, urupi ma hami hara ni goarMu na godang i. Sesa ma angka dosanami, palua ma hami hara ni goarMi.

2 SAMUEL 10:16

Dung i disuru pio Raja Hadadeser ma halak Siria na adong di Habincaran ni Batang aek Efrat. Jadi ro ma halahi tu Helam na niuluhon ni si Sobah, i ma panglima ni tentara ni si Hadadeser sian Zoba.

ZAKARIA 10:6

“PargogoanKu halak Juda, halak Israel Hupalua. ObanonKu halahi mulak tu tano ni halahi, angke holong do rohangKu mida halahi. BaenonKu ma halahi, songon bangso na so unjung Hugagai. Au ma da Tuhan Debata ni halahi, sandok tangiang ni halahi Huparrohahon mangulahi.

MASMUR 89:38

Hape saonnari ale Tuhan, muruk Ho tu raja i, halak na nitodoMu dibuang jana ditadingkon Ho i.

MASMUR 89:7

Dipasangap angka pardibanua ginjang do Ho, jana dihabiari sian sude na adong humaliang Ho.

2 SAMUEL 8:14

Dipajongjong ia ma angka parbandaran ni tentarania di sude tano Edom jana gabe pangoloinia ma angka halak Edom i. Sai dilehen Tuhan do hamonangan di si Daud sanga na di dia pe ia marporang.

MASMUR 80:1

Ale Parmahan ni Israel, tangihon ma hami, Ho do pamimpin ni bangsoMu, sai parrohahon hami. Ho na marhabangsa di ginjang ni kerub, ro ma Ho mardongan sahala na godang.