MASMUR 12:3 - BIBEL JAMITA NA DENGGAN

³ Antak ma hata ni pangalancap, ale Tuhan, pahohom ma parpamangan na bidang.

MASMUR 12:3 Referans Kwoze

PODA 18:21

Mangolu sanga mate dirajai dila, barang ise na ra maningtingkonsa, angkon mangankon parbatuna.

HALUMBAAN 13:5

Dipatola do binatang i pajojorkon angka ginjang ni rohana dohot pangincahion. Dipatola do ia mamarenta opat pulu dua bulan honokna.

DANIEL 7:8

Taran hupanotnoti tandukna i, ompot ma tubu sada tanduk na asing di antarana i. Menek do tanduk i tapi dionjar ia do lalu mumpat tolu sian angka tanduk na parjolo i. Marmata do tanduk na menek i songon mata ni jolma jana marpamangan na bulbul pangkataina.

MASMUR 17:10

Nada adong di halahi ibo ni roha hata-hata ni halahi, hata manggang na so hasaya.

JUDAS 1:16

Hum na mungut-ungut do halahi dohot na manyolsoli hara ni bagianna, na mardalan mangihutkon giot-giot ni sibukna mambaen dosa. Na pujian halahi di diri ni halahi, jana dipanggar-panggar halahi ma halak anso dapotan untung halahi.

2 PETRUS 2:18

Sian angka pangkobarion ni halahi na mardongan lancap jana na rumar i dipake halahi ma hagiot na jat laho mangaronjomkon halak sanga ise na baru malua sian angka na mardalan dihaliluon di ngoluna.

MALEAKI 3:13

Sai dipahata-hata hamu do Au ninna Tuhan. Tapi didok hamu do, “Aha ma he na hami hata-hatahon taringot tu Ho?”

DANIEL 7:25

Mangkuling ma ia mangalo Debata Na Gumincat i jana parkancitannia ma bangso ni Debata. Akalkononnia ma paubahon angka aturan dohot angka pesta ugamo ni halahi jana rajaannia ma halahi tolu satonga taon honokna.

JEHESKIEL 29:3

Jana dohononmu ma: Songon on do hata ni Tuhan Debata, “Ligi ma, musumu do Au ale Raja Parao, raja ni Mesir, buaya na godang i na manggompang di tonga-tonga ni batang aek, na mandok: Au do nampuna Batang aek Nil jana au do mambaen i.

JEHESKIEL 28:9

Antong muda dung dapot hatiha ni i, laing tardokkon ho dope he, Debata ho? Torang ma di jolo ni musumu bahaso hum jolma na somal sajo do ho.

JEHESKIEL 28:2

“Ale jolma parsantongkinan, palalu ma tu raja ni Tirus, sanga aha na Hudok, Au Tuhan Debata mandok tusia, ‘Bulbul ni hatamu antong mandok na dung dietong ho dirimu debata na mangarajai sude laut. Muda na giot songon debata pe pangalahomu, guru di ho ma i, tapi ingot ma, jolma na somal sajo do ho.

1 SAMUEL 2:3

Antak ma hata-hatamu na rumar i, paujung ma burasmu na teal i! Angke Debata Na Sun Mamboto do Tuhan na manguji sude pambaenan ni jolma.

HARURUAR 15:9

Ninna musu, ‘Ayakonku ma halahi anso hutangkup jana hubuat por ni rohangku. Sintahonku ma podangku jana hurampas ma sude arta ni halahi, hubagi-bagi jana di au ma i lopus sombu rohangku.’

JESAYA 10:10

Hutaluhon do angka harajaan na marsomba gana-ganaan na gumodang kuasona sian na adong di Jerusalem dohot Samaria.

JOB 32:22

Manggambung pe nada huboto, jana sugari pe hubaen songon i, uhuman ni Debata ma au manigor.

MASMUR 55:22

Pasahat ma holos ni rohamu tu Tuhan, jadi pargogoanNia ma ho, angke nada unjung Ia padiarkon halak na tigor ditaluhon.

MASMUR 116:11

haru pe huambang di bagasan puntol ni pikiranku, “Sahalak pe nada adong haposan ni roha.”

MASMUR 140:12

O Tuhan, huboto do tangkas Ho pambela ni halak na pogos dohot na dangol, diurupi Ho do parkaro ni halak na hona sosak.

PODA 26:24

Tabo do hata ni parlate tapi anggo rohana gok sipaoto-oto do hape.

JESAYA 59:4

Nada adong na mangajuhon parkaro na maralasan na tutu, jana nada adong na manguhumi, dohot alasan na togu. Halak na mangasahon na so hasaya dohot gabus, halak na adong mara dohot manubuhon hajahatan.

JEREMIA 9:8

Gok parmaraan do angka hata ni halahi, tarbaen mamatehon songon pana na marbisa. Hum gabus sajo do hata ni halahi. Tabo do hata ni halahi manarik tu roha, hape anggo satutuna na manaon sambil do halahi.

JEREMIA 12:6

Madung pola dihianati angka kahanggimu sandiri ho; dohot halahi mamorangi ho. Ulang porsaya ho tu halahi, haru pe tabo begeon hata ni halahi.”