LUKAS 7:47 - BIBEL JAMITA NA DENGGAN

⁴⁷ Hudok ma di ho: Holong ni rohania na songon i godang na nipatuduhonnia, i ma tandana bahaso na dung disesa dosania na bahat i! Muda nisesa dosa ni sada halak jana otik sajo do dosania, laing otik muse do holong ni roha tarpatuduhon ia.”

LUKAS 7:47 Referans Kwoze

1 JOHANNES 4:19

Marholong ni roha pe hita, hara ni na dung parjolo do Debata mangkaholongi hita.

1 JOHANNES 3:18

Hamu angka dakdanakku! Ulang ma hum di pamangan sajo hita marholong ni roha sanga hum di hata sajo. Holong ni roha na tutu i ma tabaen mangkaholongi, sipataridahononta di pambaenanta.

JESAYA 1:18

Ninna Tuhan do: “Ro ma hamu anso tapadenggan. Haru pe rara dosamu songon kirmisi, ias do baenonKu songon itak, haru pe rara songon hasumba, bontar do baenonKu songon hapas.

GALATIA 5:6

Angke muda dung marsada hita dohot Kristus Jesus, nada pola parsoalan be na mangihutkon paraturan ni sunat sanga na so mangihutkon aturan i. Manghaporsayai Kristus sajo noma na porlu, jana tarida ma i di bagasan holong ni rohanta maradopkon halak na asing.

SURAT NI SI PAULUS TU PARLAGUTAN ROM 5:20

Tapi ditambahon do Tona i, anso gabe mur bahat pangalaosion; jana di dia dosa martamba bahat disi ma asi ni roha mur bahat,

EPESUS 6:24

Sai dipasupasu Debata ma hamu angka dongan sudena na mangkaholongi Tuhanta Jesus Kristus mardongan holong ni roha na so muba-uba.

JESAYA 55:7

Sai dipauba parjahat ma ngoluna, jana dipadenggan ma rohana. Sai mulak ma ia tu Tuhan Debata, angke paribo roha do Ia jana manigor do ampunanNa ia.

1 JOHANNES 5:3

Angke muda nidok mangkaholongi Debata, na mangoloi angka tonaNia do astuan ni i. Jana nada pola borat di hita angka tonaNia i,

1 TIMOTEUS 1:14

Hape asi ni roha ni Tuhanta i madung dipasupasuhon marlobi-lobi tu au. Dilehen Ia do i marhite haporsayaan dohot holong ni roha di bagasan Kristus Jesus.

PILIPPI 1:9

On do tangiangku salaho tu hamu: Anso nian mur mabagas holong ni rohamunu mardongan parbinotoan na sintong bope dohot panatapan na tumbuk,

BAENON NI ANGKA RASUL 5:31

Jana madung dipabangkit Debata Ia markite tangan siamunNia gabe Pamimpin dohot Sipalua; anso marhamubaan ni roha dohot manjagit hasesaan ni dosa Israel i.

1 JOHANNES 1:7

Tapi muda mangolu di na torang hita laing songon Debata na maringanan di na torang i, gabe mangolu ma hita di bagasan pardomuan na solkot na sada tu na asing, jana hara ni mudar ni Jesus AnakNa i gabe ias ma hita sian sasude dosanta.

LUKAS 7:39

Dung diida halak Parise na mangontang Jesus i pangalaho i didok ia ma di bagasan rohania, “Sugari tutu panurirang Ia, tontu angkon diboto Ia do sanga ise satutuna dadaboru na manjama Ia i; tontu diboto Ia muse do ngolu ni dadaboru on, na mardosa sajo!”

MATEUS 10:37

Halak na humolongan rohana mida amangna sanga inangna ulang mida Au, nada tumbuk halak sisongon i di Au. Songon i muse halak na humolongan rohana mida anakna sanga boruna ulang mida Au, nada tumbuk halak sisongon i gabe siihutkon Au.

2 KORINTUS 5:14

Holong ni roha ni Kristus do na mangarajai hami. Jana hami boto do: Muda mate sada halak humopkop halak sudena, paboa na dung mate do sudena halahi.

MIKA 7:19

Maribo ni roha ma Ho mangulahi tu hami jana ampuni ma hami. TaluhononMu do angka dosanami jana ambungkononMu tu tandolan ni laut!

JEHESKIEL 16:63

SesaonKu ma sude hasalaanmu, tapi nada tarhalupahon ho i jana ila ma rohamu laho mandok sanga na aha. Au Tuhan Debata madung mandok songon i.”

LUKAS 7:46

So adong dibaen ho miak tu ulungKu, hape anggo anak boru on miak na huskus do diusehon ia tu patKu.

LUKAS 7:48

Dung i didok Jesus ma tu dadaboru i, “Madung disesa sude dosami.”