KOLOSSE 3:16 - BIBEL JAMITA NA DENGGAN

¹⁶ Sai mur maringan ma angka pangajaran ni Kristus tu bagasan rohamunu jana dilehen ma pasupasuNa di hamu mardapot-dapot. Marsiajar-ajaran ma hamu jana marsipaingotan samalomunu. Endehon hamu ma Masmur dohot puji-pujian bope angka ende partondion tu Tuhan. Mardongan hatarimakasion sian bagasan rohamunu, marende ma hamu tu Debata.

KOLOSSE 3:16 Referans Kwoze

MASMUR 119:11

Madung husimpan pangajaranMu di bagasan rohangku, anso ulang mardosa au maradopkon Ho.

EPESUS 5:19

Pake hamu ma sian hata ni Masmur, angka ende puji-pujian tu Tuhan dohot angka ende partondion di angka pangkobarionmunu. Marjop ni roha ma hamu jana ria marende mamuji-muji Tuhan i.

JOHANNES 15:7

Muda tinggal do hamu di bagasan Au jana pangajaranKu pe sai tinggal di bagasan rohamunu, tola ma pangidoanmunu sanga na aha pe giotmunu; nigohan ma pangidoanmunu i.

SURAT NI SI PAULUS TU PARLAGUTAN ROM 10:17

Jadi sian parbinegean do ro haporsayaan, jana parbinegean i markite-hite hata ni Kristus.

1 JOHANNES 2:24

Antong, jamita na dung nibegemunu sian mulana, denggan ma i jagohon hamu di bagasan rohamunu. Muda denggan diparrohahon hamu jamita i, tongtong do marsada hamu di bagasan Anak i, bope di bagasan Ama i.

JEREMIA 15:16

Muda marsuo au dohot angka hataMu, gabe hutangihon ma i gabe hasonangan do di au hataMi, jana gabe jop ni rohangku. Angke madung dibaritahon tu au goarMi, ale Tuhan Na Markuaso.

EPESUS 1:17

Hupangido anso dilehen Debata ni Tuhanta Jesus Kristus, i ma Debata na sangap i, TondiNia tu hamu. Gabe marbisuk do hamu baenon ni Tondi i, jana patandahononNia ma Debata tu hamu anso ditanda hamu Ia.

JOB 23:12

Sai na huhaburjuhon do mangoloi angka parenta ni Debata, huihutkon do hagiotNia, nada nioloan giot-giotniba.

JAKOBUS 3:17

Tapi sanga ise na maruli habisuhon na ro sian ginjang, na parjolo: Na ias do i, dung i pardame, na burju dohot na ra mangoloi. Gok do i dohot ibo ni roha bope na pataridahon angka parange na denggan. Nada ganggu rohana jana nada mangalancap.

2 JOHANNES 1:2

Angke maringanan do jamita na sintong i na sian Debata di bagasan rohanta jana na sai tongtong rap dohot hita salolot-lolotna.

2 TIMOTEUS 3:15

Ingotonmu do, mamungka sian hamenehanmu dope madung ditanda ho Buku Na Badia i. Ditorangi Buku Na Badia i do rohamu laho mangastui anso maruli haluaan ho sian na mangkaporsayai Kristus Jesus.

KOLOSSE 1:9

I do umbaen na hami tangiangkon hamu tongtong mamungka hami bege taringot tu hamu. Hami pangido do tu Debata anso dilehen Tondi Parbadia nian di hamu hamaloan dohot pangastuion anso diboto hamu tangkas sanga aha na nipangido ni roha ni Debata.

HALUMBAAN 5:9

Dung i diendehon halahi ma sada logu na imbaru: “Hum Ho sajo do na patut mambuat buku on dohot mambuka angka capna i. Angke madung hona bunu Ho, jana hara ni hamamateMi madung ditobus Ho jolma tu Debata sian sandok marga, hata, negara, dohot bangso.

1 JOHANNES 2:27

Harana di bagasan dirimunu tinggal do pamiahion na dung nijagitmunu sian Ia. Hara ni i nada porlu hamu ajaran ni halak na asing, tapi songon dia pamiahonNia mangajari hamu taringot tu sudena – jana sintong do pangajaranNia i; nada gabus – jana songon dia Ia mangajari hamu na jolo, songon i muse ma nian hamu maringanan di bagasan Ia.

KOLOSSE 4:6

Sanga aha pe na nidokmunu sai na tabo begeon ma, jana sai hata na mardai ma dokkon hamu. Malo ma hamu sanga tarsongon dia sadengganna mangalusi angka sapa-sapa ni halak.

EPESUS 5:17

Ulang hamu maoto, tapi sihiri hamu ma sanga aha giot ni Tuhan i sibaenonmunu.

MASMUR 28:7

Diondihon jana diampini Tuhan do iba, tuSia ma au marpos ni roha. Diurupi jana dipagodang Ia do rohangku, marmoga-moga hupuji ma Ia mardongan ende puji-pujian.

JAKOBUS 5:13

Muda topet adong na susa sian hamu, martangiang ma ia. Muda adong na marjop ni roha, marende ma ia mamuji Debata.

MASMUR 71:23

Marsurak-surak ma au mardongan gok jop ni roha, di na mangendehon puji-pujian au di Ho. Marmoga-moga do pamatang dohot tondingku marendei, hara ni na dung nipaluaMu au.

TITUS 3:6

Diduruskon Debata do TondiNia i tu hita markite-hite Jesus Kristus i, di hita,

1 KORINTUS 14:26

Antong hamu ale angka dongan, aha ma he astuan ni i sudena? Muda marlagut hamu laho marsomba tu Tuhan: Adong ma na marende, adong na mangajari, adong na paboahon sanga na aha sian Debata, adong na mangkobari di hata na so niastuan, jana adong na patorangkon sanga aha na nidokna i. Tapi sasudena i, angkon mangajari dohot padenggankon do tu sudena i nibaen.

JAKOBUS 1:5

Muda adong sanga ise sian hamu na hurang marroha, dipangido ia ma habisuhon sian Debata, gabe lehenon ni Debata ma disia habisuhon. Angke tu ganop halak do Debata mangalehen jana mardongan ibo ni roha.

KOLOSSE 1:28

Kristus do na hami jamitahon tu ganop halak. Hami paingot do halahi sudena jana hami ajari mardongan sudena hamaloan na adong di hami. Anggo tujuannami, anso sude do jolma taroban tu Debata songon halak na dung impas godang di angka pangalaho partondion, hara ni na dung mardomu dohot Kristus.

MASMUR 32:7

Ho do inganan parsimonjapanku, diondingi Ho do iba sian mara. Gabe marsurak ma au hara ni moga ni roha, dibaen dipalua Ho do antong iba.

NEHEMIA 12:46

Mamungka sian hatiha ni Raja Daud dohot si Asap parmusik i, na dung diendehon ni angka parende do angka logu pujian tarimakasi di Debata.

1 RAJA-RAJA 3:28

Dung dibege halak Israel haputusan ni si Salomo taringot tu parkaro i, gabe homang ma halahi jana dipasangap halahi ma si Salomo. Tangkas ma tarida, na dung dilehen Debata disia habisuhon laho manimbang parkaro di bagasan hatigoran.

HALUMBAAN 15:3

Jana diendehon halahi ma ende ni si Musa, naposo ni Debata i dohot ende ni Anak Ni Biri-biri i. Songon on ma ende ni halahi i, “Na godang jana hahomangan do angka pambaenanMu ale Tuhan, Debata Parkuaso Na Sumurung. Na tigor jana na sintong do sude dalanMu, ale Raja ni sude bangso.

1 JOHANNES 2:14

Hubaen surat on tu hamu angka dakdanak, dibaen madung ditanda hamu Ama i. Hubaen surat on tu hamu angka ama, dibaen madung ditanda hamu Ia na dung adong hian sian mula ni mulana. Hubaen surat on tu hamu angka na poso, angke gogo do hamu, jana hata ni Debata maringanan di bagasan hamu, jana madung ditaluhon hamu hajahatan i.

1 TIMOTEUS 6:17

Tu angka halak na kayo di tano on, paingot ma halahi anso ulang manyombong jana anso ulang mararop ni roha halahi tu angka barang-barang na ra salpu – songon sinadongan rupani. Angkon mararop ni roha tu Debata do halahi, i ma Debata na mangalehen sasudena tu hita marlobi-lobi anso sonang hita.

2 TESSALONIKA 3:15

Tapi ulang ma songon musu baen hamu halak sisongon i; laing paingot hamu ma halahi songon kahanggi.

1 TESSALONIKA 4:18

Antong marsipatoguan roha ma hamu, mardongan angka pandohan on.

1 KORINTUS 14:15

Antong, bia noma? On noma sibaenonniba: Martangiang ma iba dohot tondiniba, tapi martangiang muse ma iba dohot rohaniba. Marende ma iba dohot tondiniba, tapi laing giot marende muse ma iba dohot rohaniba.

MATEUS 26:30

Dung diendehon halahi sada ende puji-pujian. Halahi pe kehe ma tu Dolok Zetun.

PODA 14:8

Halak na marroha, denggan do tindakanna, angke dibotosa do sanga aha sibaenonna. Halak na oto, tindakanna pe oto do harana na paula-ula do ia mamoto.

MASMUR 138:1

Sai giot mandok tarimakasi do au tu Ho, ale Tuhan, sian sude rohangku. Di jolo ni sude debata, huendehon puji-pujian di Ho.

MASMUR 119:54

Salolot di ngolungku na pendek on, di tano on logu pujian do hubaen hatontuanMu.

SURAT NI SI PAULUS TU PARLAGUTAN ROM 15:14

Hamu ale angka dongan! Pos do rohangku angkon bahat do angka pangalaho na denggan di hamu. Sasude do diboto hamu jana tarbaen hamu muse do marsiajar-ajaran na sada tu na sada nari.

LUKAS 2:51

Dung i mulak ma Jesus rap dohot halahi tu Nasaret, mangoloi tu halahi. Sudena i disimpan inangNa i ma di bagasan rohania.

1 JUJUR TAON 25:7

Angka na tangkas tarlatih do anak ni halahi na dua pulu opat halak i, dohot kahanggi ni halahi i ma angka halak Levi, i ma angka parmusik na malo. Sudena 288 halak ma bahat ni halahi.

JESAYA 10:2

Songon i ma dalanna dibaen hamu laho paimbar hak dohot hatigoran jana mangarampas sinadongan ni angka na mabalu dohot na so marama so marina.

HALUMBAAN 19:10

Tungkap ma au di jolo ni surusuruan i giot marsomba tusia, tapi ning ia ma mandok tu au, “Ulang! Ulang pola marsomba ho tu au, Debata ma somba! Harana au pe laing naposo do songon ho jana sarupa dohot angka donganmu na marhasaksian taringot tu Jesus.” Somba ma Debata, angke anggo hasaksian taringot tu Jesus, i ma tondi hasurirangon.

JESAYA 30:29

Tapi anggo hamu, marjop ni roha jana marendei ma hamu songon na masa di borngin ni pesta ugamo. Marmoga-moga ma hamu songon halak na ribur mardalan didongani sora ni suling laho manaek tu dolok ni Tuhan, na mangondihon Israel.

JESAYA 26:1

Di hatiha i, endehonon ni halak ma ende on di tano Juda: “Na tohong ma da kotanta on; madung dipajongjong Tuhan, tembok dohot benteng.

JESAYA 5:1

Tangihon bo marende au salaho tu kobun anggur ni donganku. Adong do kobun anggur ni donganku di gincat ni tor na napu.

ENDE NA GODANG 1:1

Ende na jumeges sian si Salomo.

HALUMBAAN 14:3

Di jolo ni habangsa i dohot mahluk na opat i dohot di angka pamimpin na humaliang habangsa i diendehon angka halak si 144.000 i ma sada ende na imbaru. Nada tarparsiajari sanga ise pe ende i asing sian halak na 144.000 i. Angka halak na nipalua do halahi sian tano on.

PODA 18:1

Halak na so malo margaul, diparrohahon hum tu dirina, pandapot ni halak na asing nada tarjagitsa.

EPESUS 5:26

Dibaen Kristus do songon i anso tarpaias Ia parlagutan i dohot ajaranNia bope markite-hite aek pandidion, anso tarpasahat Ia muse parlagutan i tu Debata.

1 TESSALONIKA 1:8

Angke mamungka sian hamu do rarat barita taringot tu Tuhan Jesus tu Makedonia dohot Akaya. Jana nada hum i sajo; barita ni haporsayaanmunu pe tu Debata, madung tarbonggal sun tu dia, gabe nada adong be pola na porlu sidokkononnami.