KOLOSSE 3:12 - BIBEL JAMITA NA DENGGAN

¹² Antong hamu angka na dung dipuldit ni Debata, na diparbadia i jana na dihaholonginNia, pake hamu ma ibo ni roha, habasaron, toruk ni roha, lambok ni roha dohot hapohomon.

KOLOSSE 3:12 Referans Kwoze

EPESUS 4:32

Tapi gumonan ma burju jana lambok hamu sama hamu, bope na marsisesaan sala songon panyesa ni Debata di dosamunu markite-hite Kristus.

EPESUS 4:2

Angkon martoruk ni roha do hamunu, lambok jana sobar. Patuduhon hamu ma holong ni rohamunu di na marsiurupan na sada tu na asing.

1 JOHANNES 4:19

Marholong ni roha pe hita, hara ni na dung parjolo do Debata mangkaholongi hita.

KOLOSSE 3:10

Madung dipapakehon tu hamu ngolu na imbaru, na laing torus dipaimbaru anso dapotan parbinotoan na sintong mangihutkon rupa ni Panompania.

2 PETRUS 1:10

Hara ni i hamu ale angka dongan, mur haburjuhon hamu ma markarejo anso mur togu pamioon ni Debata dohot panodoonNia tu hamu. Muda dipatulus hamu songon i, nada jadi be madabu hamu.

1 TESSALONIKA 5:15

Jagohon hamu ma anso ulang adong sanga ise na mambaloskon hajahatan dohot hajahatan. Usahohon hamu ma anso tarbaen hamu na denggan sama hamu bope tu halak sudena.

2 KORINTUS 6:6

Hami patuduhon do na tutu hami pangoloi ni Debata di habuluson ni rohanami, di parbinotoan di hasobaron dohot di denggan ni rohanami. Di bagasan Tondi Parbadia dohot sian holong ni roha na ias,

JEREMIA 31:3

Hupatidahon do diringKu sian na dao tu halahi. O ale bangso Israel, sian najolo do sai holong rohangKu mida hamu, jana laing torus do tu joloan on giot patuduhononKu na holong rohangKu mida hamu.

JEHESKIEL 16:8

Dung i mamolus ma Au sian i jana Huida ma ho, tutu, madung hatihana ho marhaposoon. Hupahembang ma abitKu tu ho laho mangulosi ho. Hubaen ma parjanjian dohot ho, songon i ma pandok ni Tuhan Debata, jana marhite na songon i Au ma nampuna ho.

GALATIA 5:6

Angke muda dung marsada hita dohot Kristus Jesus, nada pola parsoalan be na mangihutkon paraturan ni sunat sanga na so mangihutkon aturan i. Manghaporsayai Kristus sajo noma na porlu, jana tarida ma i di bagasan holong ni rohanta maradopkon halak na asing.

1 PETRUS 1:2

mangihutkon sangkap ni Debata Ama jana na niparbadiai ni Tondi, anso mangoloi Jesus Kristus jana manjagit pamispion ni mudarNia. Mur martamba ma asi ni roha dohot hasonangan di hamu.

2 TIMOTEUS 2:10

Hara ni i do umbaen na huhasobarkon mananggung sudena i pasari-sari angka dongan na dung nipili ni Debata. Hutaon pe sudena i bia anso laing dohot halahi maruli haluaan na di bagasan Kristus Jesus, dohot hasangapan salolot-lolotna.

SURAT NI SI PAULUS TU PARLAGUTAN ROM 1:7

Tu hamu sude na di Rom, na nihaholongan ni Debata, na nipio jana dibaen gabe halak na badia: Asi ni roha ma di hamu dohot hasonangan na sian Debata Amanta dohot sian Tuhan Jesus Kristus.

TITUS 1:1

Sian si Paulus, naposo ni Debata, bope rasul ni Jesus Kristus, na nipili do au jana na nisuru laho manyarihon angka na nipili ni Debata anso mur togu di haporsayaanna. Angkon togu-toguonku do halahi laho mananda hasintongan na niajarkon ni ugamonta,

MATEUS 24:31

Dipalu ma tarompet na godang, suruon ni Anak Ni Jolma i ma angka surusuruanNia tu panjuru na opat i di tano on palagutkon bangsoNia, sian topi ni langit na sada lalu tu topi ni langit na sada nari.”

LUKAS 18:7

Anggo sai pio-pio do bangso ni Debata arian dohot borngin tu Debata nada he belaon ni Debata muse parkaro ni bangsoNa i? Adong he dipalolot-lolot Ia laho manolong halahi?

JESAYA 63:15

Ale Tuhan, tatap ma hami sian banua ginjang, sian ingananMu na badia jana marmulia. Di dia do pangiburuMu dohot hagogoonMu? Di dia do holong dohot ibo ni rohaMu? Di dia do diparrohahon Ho hami? Ulang ma nian manghohom Ho tu hami.

LUKAS 1:78

hara ni asi dohot holong ni roha na sian Debatanta, jana marhite i do bincar di hita sinondang manyogot sian inganan na gincat.

MARKUS 13:27

SuruhononNia ma angka surusuruanNia laho palagutkon bangso na nipiliNia sian na opat panjuru ni tano on, sian angka ujung ni tano lalu tu angka ujung ni langit.”

EPESUS 4:24

Sugari nian angkon marbako na imbaru ma ngolumunu na nitompa mangihutkon rupa ni Debata; i ma bako na sintong, na tigor dohot na badia.

JESAYA 42:1

“Ligi, indu do naposongKu na Hutiop, naposo todoan ni rohangKu, lomo do rohangKu disia. Madung Hulehen kuasongKu tusia, laho maroban hatigoran tu angka bangso sudena.

2 TIMOTEUS 1:9

Dipalua Debata do hita jana dipiohon Ia hara ni na giot baenonNia hita gabe halakNia sandiri. Nada marnida tu angka karejonta i dibaen Debata, tapi marguru tu sangkapNia sandiri do i dohot denggan ni rohaNia. Taran so dijadihon dope portibi on madung songon i hian denggan ni rohaNia adop hita markite-hite Kristus Jesus.

PILIPPI 1:8

Sai lungun sajo do rohangku tu hamu angka dongan, mardongan pangkilalaan holong ni roha na solkot sian Jesus Kristus sandiri. Debata ma saksina, paboa na tutu na hudok i.

EPESUS 1:4

Dompak so dijadihon dope portibi on, madung ditodo Debata hian hita markite-hite Kristus anso gabe Debata sandiri nampuna hita jana na so martihas di adopanNia. Hara ni holong ni roha ni Debata,

SURAT NI SI PAULUS TU PARLAGUTAN ROM 9:11

Angke taran so sorang dope angka dakdanak i, jana nada podo dibaen halahi bagi aha na denggan sanga na jat, anso togu sangkap ni Debata mangihutkon pamilionNia, nada sian pambaenan tapi markite-hite pamioonNia do,

MARKUS 13:22

Harana marroan do angka kristus pargabus dohot angka panurirang pargabus. Baenon ni halahi ma angka tanda hahomangan dohot angka na ganjil-ganjil laho paoto-otohon angka halak ni Debata. Salang sugari tarbaen dohot tu angka na ditodo i dope.

MARKUS 13:20

Sugari na so dipapendek Debata na masa i, umpe sahalak na tarbaen malua. Tapi hara ni halak na nitodoNia i, gabe dipapendek Debata ma na masa i.”

MATEUS 24:22

Tapi madung dipapendek Debata hatihana i. Sugari nada, umpe sahalak jolma na tarbaen tahan. Tapi hara ni bangsoNia i, gabe dipapendek Debata do hatihana i.

JEREMIA 31:20

O Israel, ho do anak hasianKu, anak haholongan, tampuk ni pusu-pusungKu. Ganop Huondam ho sai lungun do rohangKu marningot ho. Gok ibo ni roha do giot baenonKu tu ho.

JESAYA 65:22

Nada pajongjongon ni halahi bagi aha, anso halak na asing manginganisa, jana nada suanon ni halahi bagi aha, anso halak na asing mangankon parbatuna. Angke umur ni bangsongKu angkon saginjang ni umur ni hayu, jana angka halak na Hupili angkon mandai suha ni parkarejoan ni tanganna.

JESAYA 65:9

PasupasuonKu do halak Israel na sian Marga Juda. Pomparan ni halahi ma gabe nampuna tano pardolohanKu. Bangso na Hupili na mangoloi Au maringanan ma disi

JESAYA 45:4

Hara ni naposongKu si Jakob dohot Israel pilianKi, pioonKu ma ho marhite goarmu, manggoari ho, haru pe so ditanda ho dope Au.

HALUMBAAN 17:14

Na giot marporang do halahi mangalo Anak Ni Biri-biri i. Tapi taluhonon ni Anak Ni Biri-biri i ma halahi, angke Ia do Tuhan ni angka tuan jana Raja ni angka raja. Dung i monang ma na rap dohot Ia, i ma angka na nipiohon dohot na nipili dohot na setia.”

2 JOHANNES 1:13

Tabe ma di hamu sian angka dakdanak ni donganmunu na dung tarpili i.

MATEUS 24:24

Harana, marroan do disi angka kristus pargabus dohot angka panurirang pargabus. Patupaon ni halahi ma angka pambaenan na luar biasa dohot angka na pahomang roha laho paoto-otohon halak. Sugari tarbaensa, dohot bangso ni Debata i pe giot paoto-otoon ni halahi muse do.

SURAT NI SI PAULUS TU PARLAGUTAN ROM 13:14

Padiar hamu ma Tuhan Jesus Kristus manontuhon sanga aha sibaenonmunu. Jana ulang be dioloi hamu bakomunu na mardosa i laho papuaskon hagiot ni sibuk.

1 KORINTUS 13:4

Sobar do holong ni roha i jana burju. Nada mangiburu anggo holong ni roha i, inda marhata manggang, nada ginjang rohana.