KOLOSSE 2:2 - BIBEL JAMITA NA DENGGAN

² Sai margogo ma nian roha ni halahi, jana marsihaholongan ma halahi anso gabe solkot halahi mardomu. Muda tutu halahi mangarti gabe maruli pos ni roha situtu ma halahi. Jadi mur tangkas muse ma tandaon ni halahi rahasia ni Debata; i ma Kristus sandiri.

KOLOSSE 2:2 Referans Kwoze

KOLOSSE 1:27

Anggo tu bangsoNia i ra do Debata paboahon sanga na bia dengganna dohot godangna rahasiaNia i di sudena jolma manusia. On do rahasia i: Di bagasan dirimunu do Kristus, jadi gabe dohot ma hamu maruli di hagodangan ni Debata.

KOLOSSE 4:8

Husuru do ia manopot hamu anso diboto hamu sanga na bia hami jana anso tarapul rohamunu.

EPESUS 6:22

Hara ni i ma umbaen na husuru ia mandapotkon hamu laho paboahon sanga na bia hami tu hamu sudena laho mangapoi rohamunu.

KOLOSSE 3:14

Jana na umporlu: Angkon marsihaholongan do hamu sama hamu, angke holong i do na pasadahon hamu sudena gabe sanggam.

SURAT NI SI PAULUS TU PARLAGUTAN ROM 16:25

Debata do na tarbaen patogu rohamunu mangihutkon Jamita Na Denggan na hujamitahon i, i ma taringot tu Tuhan Jesus Kristus, jana mangihutkon hasimoon na dung dipapatar, dung jolo ditabunihon sian na robi.

PILIPPI 3:8

Nada hum i dope, huetong do sasudena i gabe angka na parugi-rugihon au sajo. Ummarga do na adong di au saonnari on: I ma na mananda Jesus Kristus Tuhanki. Hara ni Kristus, gabe hupalua do sasudena. Songon rompak-rompak noma i sude huhilala, anso laing dapot au Kristus,

PILIPPI 2:1

Nada he hara ni na mangolu i do hamu di bagasan Kristus umbaen na margogo hamu? Umbaen na tarapul pe hamu hara ni na holong do rohaNia mida hamu! Solkot pe hamu sama hamu, hara ni na nitogu-togu ni Tondi i do hamu, jana marsihaholongan muse do hamu bope marsiasi-asian.

JESAYA 53:11

Dung abis hasusaannia idaonnia ma na torang jana puas ma pangkilalaanna. Tigor do parrohaon ni naposongKi, jana bahat do halak gabe tigor hara ni ia, ampe tusia do uhuman na tu halahi.

2 PETRUS 1:3

Dipio Debata do hita anso dohot hita mangkilalahon hagodanganNa dohot mandai hadengganan ni rohaNia. Mardongan kuasoNia sandiri bope sian na taboto taringot tuSia sandiri, dilehen Debata na mamiohon hita i do tu hita sanga aha na porlu anso mangolu hita songon halak na maribadat tu Debata.

SURAT NI SI PAULUS TU PARLAGUTAN ROM 15:13

Debata do arop ni rohamunu. Sai digohi Ia ma rohamunu dohot jop ni roha bope dohot hasonangan di bagasan haporsayaanmunu tuSia, anso mur mararop roha hamu tu Debata baenon ni gogo ni Tondi Parbadia.

JOHANNES 10:30

Sada do Au dohot Damang.”

JOHANNES 6:69

Porsaya do hami jana marpos ni roha, Ho do Na Badia na ro sian Debata.”

IBRANI 10:22

Antong hara ni i, tapadonok ma tu Debata mardongan roha na bulus dohot haporsayaan na tutu tu Debata; bope dohot roha na dung dipaias sian pangkilalaan na sala, bope dohot pamatang na dung nipaias dohot aek na lan.

1 TIMOTEUS 3:16

Sada halak pe nada tarbaen mansoadahon sanga na bia godang ni rahasia ni ugamonta: Dipataridahon Ia do diriNia gabe jolma, jana dipatigor di bagasan Tondi, na patidahon diriNia tu angka surusuruan. Dipatubegehon do baritaNa di tonga-tonga ni angka bangso, jana sihaposan do Ia di tano on. Saonnari madung nipanaek Ia tu banua ginjang.

IBRANI 6:11

Giotnami nian sugari laing ringgas ma hamu, lopus dijagit hamu na niarop ni rohamunu i.

KOLOSSE 1:9

I do umbaen na hami tangiangkon hamu tongtong mamungka hami bege taringot tu hamu. Hami pangido do tu Debata anso dilehen Tondi Parbadia nian di hamu hamaloan dohot pangastuion anso diboto hamu tangkas sanga aha na nipangido ni roha ni Debata.

GALATIA 3:28

Anggo taringot tuson, nada adong be dibaen mardia imbar halak Jahudi sanga angka halak Junani, hatoban dohot na mardeka, halaklahi dohot dadaboru. Gabe sada do hamu sudena hara ni Kristus Jesus.

1 KORINTUS 2:12

Jana nada dilehen tu hita tondi ni portibi on, tapi Tondi na sian Debata do, anso taboto sudena na nibasa-basahon ni Debata tu hita.

JOHANNES 17:3

On ma hangoluan na so mantak; anso ditanda halak Ama i, sasada Ia do Debata na tutu, jana mananda Jesus Kristus na nisuruhon ni Ama i.

JOHANNES 16:15

Au do nampuna sasude na adong di Ama i. I do umbaen na Hudok, sanga aha na nipasahat ni Tondi i tu hamu, sian Au do i dijagit Ia.”

JOHANNES 10:38

Tapi muda Hukarejohon karejo ni Damang, haru pe nada porsaya hamu tu Au, saotik-otikna angkon haporsayaanmunu ma nian na Hubaen i, anso diboto jana diastui hamu na sada do Damang dohot Au, jana Au sada dohot Damang.”

JOHANNES 5:23

Dibaen Damang pe i anso dipasangap halak do Anak i songon na ni baen ni halak tu Damang. Halak na so pasangapkon Anak i, nada diparsangapi ia muse Ama na marsuru Anak i.

JOHANNES 5:17

Tapi didok Jesus ma tu halahi, “Tongtong do markarejo Damang; jana Au pe angkon laing markarejo do.”

MATEUS 11:27

“Madung dipasahat Damang do tu Au, sandok na adong. Nada adong na mananda Anak i asing sian Damang. Nada adong muse na mananda Ama i asing sian Anak i, dohot tu halak na ra Jesus papatarkonsa.”

MATEUS 11:25

Jadi didok Jesus ma hatiha i, “Ale, Amang, Tuhan ni langit dohot tano! Tarimakasi ma Hudok tu Ho dibaen dibunihon Ho do i sude di halak na malo dohot na pistar. Hum tu halak na so pola pistar do dipatidahon Ho i.

JEREMIA 9:24

Sanga ise na giot manggodang hara ni bagi aha, manggodang ma hara ni na nitandana Au; jana diboto angka sangkapKu. Dibotosa do na so marujung holong ni rohangKu jana bonar boti tigor pambaenanKu. Sudena do i pajop rohangKu. Au do Tuhan na mandok i sudena.”

JESAYA 40:1

“Apoi, apoi hamu ma bangsongKi,” ninna Debatamunu, “Apoi, apoi hamu ma halahi!

JESAYA 32:17

Sanga na di dia adong hasintongan, dapotan ma disi hadameon, jana hara ni hasintongan tubu ma haulion dohot hasonangan salolot ni lolotna.

MASMUR 133:1

Dengganna i jana sonangna i antong, muda mardenggan angka na markahamaranggi di ngoluna.

1 JOHANNES 5:7

Jadi adong do tolu saksina:

1 JOHANNES 3:19

Sianon ma dalanna taboto na dohot do hita tarmasuk tu angka halak na ro sian Debata, gabe tarbaen sonang pangkilalaanta di jolo ni Debata.

2 PETRUS 3:18

Sai mur pangkilalahon hamu ma hadengganan ni roha ni Tuhan, Sipaluanta i, i ma Jesus Kristus, jana sai mur tangkas ma nian ditanda hamu Ia. Tarpuji ma Ia saonnari bope ro di salolot-lolotna. Amen.

2 PETRUS 1:10

Hara ni i hamu ale angka dongan, mur haburjuhon hamu ma markarejo anso mur togu pamioon ni Debata dohot panodoonNia tu hamu. Muda dipatulus hamu songon i, nada jadi be madabu hamu.

1 TESSALONIKA 5:14

Laing hami pangido dope, hamu ale angka dongan, anso gorahon hamu angka halak na so maraturan. Apoi hamu ma angka na menek roha; urupi hamu ma angka na gale jana sobar ma hamu maradopkon halak sudena.

1 TESSALONIKA 3:2

jadi hami suru ma si Timoteus donganta i. Dongan saparkarejoan di Debata do ia na markarejo manjamitahon Jamita Na Denggan taringot tu Kristus i. Hami suru do si Timoteus manopot hamu, anso dipatogu ia rohamunu jana disosoi ia anso mur togu haporsayaanmunu,

1 TESSALONIKA 1:5

Angke di na manjamitahon Jamita Na Denggan i hami tu hamu, nada hum hata-hata sajo na hami jamitahon i, tapi mardongan kuaso na sian Tondi Parbadia do. Jana pos situtu do rohamunu na tutu do Jamita Na Denggan i. Diboto hamu do sanga na bia ngolunami laho manyarihon hamu dompak di tonga-tongamunu hami.

BAENON NI ANGKA RASUL 4:32

Sudena halahi na dung porsaya i, saroha jana satondi do ngolu ni halahi. Nada adong sian halahi na mangetong sinadonganna gabe nampunania sandiri. Sudena na adong di halahi, rap mamake do halahi.

1 RAJA-RAJA 3:28

Dung dibege halak Israel haputusan ni si Salomo taringot tu parkaro i, gabe homang ma halahi jana dipasangap halahi ma si Salomo. Tangkas ma tarida, na dung dilehen Debata disia habisuhon laho manimbang parkaro di bagasan hatigoran.

MATEUS 13:11

Dialusi Jesus ma, “Harana, tu hamu do por roha ni Debata paboahon sitabunian ni harajaanNia. Anggo tu na asing i, nada.

LUKAS 1:1

Ale Teofilus, na niparsangapan! Madung bahat nian angka dongan mangusahohon sadenggan-dengganna laho manyuratkon taringot tu angka na tarjadi di tonga-tonganta.

SURAT NI SI PAULUS TU PARLAGUTAN ROM 2:4

Sanga na marlayas ni roha do ho di godang ni denggan basaNia, lambok dohot burju ni rohaNia? Nada he diboto ho, denggan basa ni Debata do maroban ho tu haubaan ni roha?

1 KORINTUS 14:31

Jadi songon i ma dalanna anso tarbaen hamu pasada-sada manyurirangi; anso sude tarbaen marsiajar jana sudena dapotan hagogoan.

EPESUS 1:7

Angke di bagasan Ia, dapotan haluaan do hita markite-hite mudarNia, i ma hasesaan ni dosa mangihutkon godang ni asi ni rohaNia,

EPESUS 3:3

Diungkap Debata do rahasia ni sangkapNia jana dipajojor Ia i tu au. (Taringot tuson madung husuratkon i saotik nangkin di ginjang,

EPESUS 3:16

Hutangiangkon do anso lomo nian roha ni Debata na sun marmulia i laho patoguhon rohamunu dohot TondiNia i.

KOLOSSE 1:26

i ma jamita na nirahasiahon ni Debata tu sude jolma marribu taon honokna, hape saonnari dijamitahon do i tu angka halakNia na badia.

KOLOSSE 2:19

jana nada ditiop ia Ulu i, pangkal ni pamatang i, na niihotan markite-hite angka urat dohot doldol gabe sada, na tubu markite-hite hangoluan na nilehen ni Debata.

KOLOSSE 4:3

Laing tangiangkon hamu ma hami anso dilehen Debata di hami hatiha na denggan laho pararatkon rahasia na sian Debata taringot tu Kristus i. Angke hara ni i do umbaen na pola tarhurung au saonnari.