KOLOSSE 2:16 - BIBEL JAMITA NA DENGGAN

¹⁶ Jadi hara ni i, ulang ma padiar hamu digorahon halak hamu hara ni sipanganon sanga siinumon sanga hara ni ari pesta ni ugamo, sanga angka pesta poltak ni bulan sanga pe hara ni Ari Sabat.

KOLOSSE 2:16 Referans Kwoze

SURAT NI SI PAULUS TU PARLAGUTAN ROM 14:10

Antong, hamu ale angka dongan! Aha ma gunana muda dipasala hamu dongan sahaporsayaanmunu? Jana aha pola gunana lakna muda layas rohamunu mida halahi? Sasudena hita on, angkon mangadop tu Debata anso diuhumi.

GALATIA 4:10

Manjujur-jujur ari hamu, dohot bulan, dohot hatiha na denggan, dohot taon.

IBRANI 13:9

Ulang ma padiar-diar hamu angka pangajaran na marragam-rupa i mangaliluhon hamu. Angkon denggan ni roha ni Debata do na patogu rohanta, i do na denggan; ulang ma angka paraturan ni sipanganon. Angke angka halak najolo na mangihutkon paraturan i nada adong pola gunana dapot halahi.

JEHESKIEL 45:17

Angkon paradeonnia do pahan-pahanan baen haul situtungon songon i angka sipakeon baen tu haul gandum dohot haul anggur di sude bangso Israel muda dapot di ari pesta Bulan Na Imbaru, di Ari Sabat dohot angka ari pesta na asing i. Angkon paradeonnia do haul hasesaan ni dosa, haul gandum, haul situtungon, dohot haul pardamean laho mangido anso diampuni bangso Israel.”

NEHEMIA 10:33

Paradeonnami ma angka haporluan ibadat di Bagas Ni Tuhan, i ma: Roti na badia, haul gandum siganop ari, pahan-pahanan baen haul hasesaan ni dosa ni Israel dohot sude sanga aha na porlu di Bagas Ni Tuhan.

1 JUJUR TAON 23:31

bope bagi na sadihari muda adong haul na ditutung di Tuhan di Ari Sabat, di Ari Pesta Bulan Na Imbaru dohot di angka ari pesta na asing i. Laing dibaen muse dope aturanna taringot tu bahat ni halak Levi sanoli markarejo. Ditugaskon ma halak Levi anso sai tongtong manyomba tu Tuhan.

MATEUS 15:11

Nada na masuk tu pamangan na pahodarhon jolma, tapi na haruar sian pamangan i do na pahodarhon.”

IBRANI 9:10

Harana anggo angka upacara na songon i na marpardomuan tu sipanganon sajo do i dohot siinumon bope angka ragam-ragam ni upacara na mambaen ias. Hum angka Tona na tarida do na mardalan i lopus tu hatihana sanga andigan baenon ni Debata haimbaruan.

JAKOBUS 4:11

Hamu angka dongan, ulang ma hamu marsitilakoan sanga marsipasalaan. Sanga ise na manilakoi sanga na pasalahon donganna Kristen, na manilakoi dohot na manyalahon angka Tona Ni Debata do i. Jana muda disalahon hamu angka Tona Ni Debata, na so diihutkon hamu be angka Tona i tapi gabe panguhum noma hamu disi.

MARKUS 7:19

Angke inda tu bagasan roha na masuk i, tapi tu butuha do. Dung i ambung ma sian pamatang.” (Jadi sian pangkataion i didok Jesus, halal do sude sipanganon.)

BAENON NI ANGKA RASUL 15:20

Tapi angkon laing tatongos ma surat tu halahi paingotkon halahi anso ulang dipangan halahi angka sipanganon na hodar na nihaulkon tu gana-ganaan, sanga markarosuan, sanga pe na mangankon pahan-pahanan na nisongkik sanga mangan mudar. Boti anso laing dipadao halahi dirina sian angka pangalaho na jorngang.

JEHESKIEL 4:14

Tapi hualusi ma, “Iale Tuhan Debata! Sian na menek lopus saonnari, na so unjung dope hupahodar diringku marhite na mangankon bangke ni binatang sanga teba-teba ni soroan ni binatang panyoro. Na so jungada do hupangan sipanganon na margoar na haram.”

JESAYA 1:13

Parcuma do diparobani hamu haul i sude. Gialan Au manganggo uap ni hamonyan na nitutungmunu i. Goyak rohangKu jana magigi Au paida-ida hamu manghagodangkon Bulan Na Imbaru, angka Ari Sabat dohot angka ari pesta maradu sude angka parlagutan parugamoan. Sude do i dipahodar hamu dohot angka dosamunu jana gabe boban sitanggunganKu; maloja Au mamorsan i.

MASMUR 81:3

Ombus ma sarune di ari pestanta, di pesta bulan baru dohot bulan tula.

MASMUR 42:4

Malala ate-atengku muda huingot hatiha na salpu, di na mardalan tu Bagas Ni Debata rap dohot halak na bahat au. Mardalan di jolo ni barisan i ma au, mardongan surak-surak dohot ende pamujian.

NEHEMIA 10:31

Muda adong bangso na asing na giot manggadis gandum sanga na barang aha pe tu hami di Ari Sabat sanga di ari na badia na asing i, nada giot tobusonnami i. Ganop di taon papituhon, nada giot karejohononnami ladang jana nada tungguonnami utang.

NEHEMIA 8:9

Umbege Uhum na disise i, gok ma roha ni rayat i lalu martangisan halahi. Jadi gabe didok Gubernur Nehemia ma dohot Malim Esra Ahli Uhum i, maradu angka halak Levi na patorangkon Uhum i tu sude rayat i songon on, “Ari hapunjungan do ari sadari on di Tuhan Debatamu, jadi ulang hamu marsak sanga tangis.

2 RAJA-RAJA 4:23

“Biasi ingkon sai saonnari ho kehe?” ning halaklahinia i manyapai. “Nada Ari Sabat da sadari on, jana nada Ari Pesta Bulan Na Imbaru.” “Nada pola na bia,” ning ia.

1 SAMUEL 20:18

Dung i didok si Jonatan ma tusia, “Ancogot Pesta Bulan Baru. Tangkasma habotoan na so tarida ho disi, harana gabe kosong ma ingananmu hian di meja makan;

1 SAMUEL 20:5

Dialusi si Daud ma, “Ancogot Pesta Bulan Na Imbaru, jana somalna angkon rap mangan do au dohot raja i. Antong muda diloas ho do, kehe ma au anggo songon i martabuni di halongonan lopus tu haduan andospotang.

AMOS 8:5

Didok hamu tu dirimunu sandiri, “Na lolot ma so sidung ari pesta. Sai giot gadisonta tibu angka gandumta, hape laing so marnasidung do pesta i. Andigan dope sidung Ari Sabat, anso tarbaen mangulahi marjagal? Ma por rohanta mangakal-akali, mangicu dohot parsuhatan, jana mambuat dohot timbangan.

BILANGAN 10:10

Bope di angka ari sijop ni rohamunu, i ma di angka Pesta Bulan Na Baru, dohot pesta-pesta ugamo na asing i, angkon paluonmunu do sarune i dompak manghaulkon haul situtungon dohot haul haluaan tu Au, dung i urupanKu ma hamu, angke Au do Tuhan Debatamu.”

2 JUJUR TAON 31:3

Disumbangkon raja i do sian pahan-pahanannia sandiri na porlu baen haul situtungon ganop manyogot dohot ganop potang, dohot baen haul sihaulkonon di Ari Sabat, di Pesta Bulan Baru, dohot angka pesta na asing na ditontuhon di Tona Ni Tuhan.

KOLOSSE 2:20

Madung mate hamu rap dohot Kristus jana madung dipalua hamu sian angka tondi na mangarajai portibi on. Biasi dope laing songon halak na nirajaan ni portibi on ngolumunu? Biasi paolo-oloanmunu dope angka paraturan na songon on,