KOLOSSE 1:9 - BIBEL JAMITA NA DENGGAN

⁹ I do umbaen na hami tangiangkon hamu tongtong mamungka hami bege taringot tu hamu. Hami pangido do tu Debata anso dilehen Tondi Parbadia nian di hamu hamaloan dohot pangastuion anso diboto hamu tangkas sanga aha na nipangido ni roha ni Debata.

KOLOSSE 1:9 Referans Kwoze

JAKOBUS 3:17

Tapi sanga ise na maruli habisuhon na ro sian ginjang, na parjolo: Na ias do i, dung i pardame, na burju dohot na ra mangoloi. Gok do i dohot ibo ni roha bope na pataridahon angka parange na denggan. Nada ganggu rohana jana nada mangalancap.

JAKOBUS 1:5

Muda adong sanga ise sian hamu na hurang marroha, dipangido ia ma habisuhon sian Debata, gabe lehenon ni Debata ma disia habisuhon. Angke tu ganop halak do Debata mangalehen jana mardongan ibo ni roha.

KOLOSSE 4:5

Di angka pardomuanmunu tu angka halak na so porsaya malo ma hamu na mangolu i jana ganop adong hatiha na tumbuk, pake hamu ma i sadenggan-dengganna.

IBRANI 13:21

Sai dipasingkop Debata mual ni hasonangan i ma hamu di sasude na denggan i na porlu di hamu laho patuluskon hagiot ni rohaNia. Sai dibaen Debata ma di hita sanga aha giot ni rohaNia markite-hite Jesus Kristus. Tarpuji ma Jesus salolot-lolotna! Amen.

1 PETRUS 2:15

Anggo giot ni Debata, huntam hamu ma pamangan ni halak na oto pangkataina markite-hite angka pambaenanmunu na denggan i.

1 SAMUEL 12:23

Anggo salaho tu au, sai ulang nian mardosa au maradopkon Tuhan hara ni na maradian au manangianghon hamu. Tapi sai na pupuonku do torus mangajarkon tu hamu angka pangalaho na denggan dohot na tigor na giot si karejohononmunu.

2 TESSALONIKA 1:11

Hara ni i ma dibaen na tongtong hami tangiangkon hamu. Hami tangiangkon do anso nian halak na tumbuk hamu di pamioon ni Debata. Sai diurupi Debata ma hamu hara ni kuasoNa i, anso tarpatulus hamu sudena na denggan na nihalungunkonmunu hombar tu haporsayaan i. Laing hami tangiangkon do, anso nian hara ni kuaso ni Debata, laing dipaujung Ia ma angka karejo na nikarejohonmunu hombar tu haporsayaanmunu i.

1 TESSALONIKA 5:17

jana tongtong martangiang.

MASMUR 143:10

Ajari ma au patuluskon hagiot ni rohaMu angke Ho do Debatangku. Sai ditogu TondiMu na burju i ma au di dalan na hornop.

1 JOHANNES 5:20

Taboto do na dung ro Anak Ni Debata tu portibi on. Madung dilehen Ia tu hita pangastuion, anso tatanda Debata na sintong i; jana na maringanan do hita di bagasan Na Sintong i, i ma di bagasan AnakNia Jesus Kristus. On do Debata na sintong, jana on do ngolu na manongtong.

KOLOSSE 3:16

Sai mur maringan ma angka pangajaran ni Kristus tu bagasan rohamunu jana dilehen ma pasupasuNa di hamu mardapot-dapot. Marsiajar-ajaran ma hamu jana marsipaingotan samalomunu. Endehon hamu ma Masmur dohot puji-pujian bope angka ende partondion tu Tuhan. Mardongan hatarimakasion sian bagasan rohamunu, marende ma hamu tu Debata.

IBRANI 10:36

Porlu do sobar hamu, jana muda dung dipatulus hamu hagiot ni Debata, jagitonmunu ma janji i.

PILIPPI 1:4

Jana ganop hutangiangkon hamu sudena, sai di bagasan jop ni roha do au na martangiang i.

PILEMON 1:4

Ganop martangiang au sai hudok do goarmu jana hupasahat tarimakasi tu Debata.

EPESUS 6:6

Ulang ma hum hatiha dijagoi baen hamu songon i; jana ulang ma hum na giot mambuat roha ni jolma sajo. Tapi angkon gabe songon naposo ni Kristus do hamu na mangoloi hagiot ni Debata sian sandok roha.

SURAT NI SI PAULUS TU PARLAGUTAN ROM 12:2

Ulang pahombar hamu dirimunu tu hasiangan on, tapi pauba hamu ma dirimunu markite-hite haimbaruon ni rohamunu anso tartimbang hamu sanga dia do hagiot ni Debata: Na denggan, na tumbuk jana na sanggam.

1 TESSALONIKA 1:3

Muda hatiha mangadop hami tu Debata Amanta i, sai tongtong do hami ingot hamu, i ma karejo na nipatupamunu hara ni haporsayaanmunu tu Kristus, bope holong ni rohamunu maradopkon dongan na asing jabat disarihon hamu halahi dohot arop ni rohamunu na togu maradopkon Tuhanta Jesus Kristus.

1 JOHANNES 2:17

Na giot mago do portibi on bope sasudena na adong di bagasanna na nihalungunkon ni jolma. Tapi anggo halak na patulus hagiot ni Debata, mangolu do salolot-lolotna.

1 PETRUS 4:2

Hara ni i, salolot mangolu hamu di tano on tu pudi on, ihutkon hamu ma hagiot ni Debata, ulang be mangihut di hagiot ni jolma hamu.

KOLOSSE 4:12

Tabe ni si Epafras di hamu. Laing sian hamu on do asalnia. Naposo ni Jesus Kristus do ia, na sai manangiangkon hamu. Marsitutu do ia mangido tu Debata anso margogo hamu nian jana anso tongtong togu; boti muse anso laing mardongan pos ni roha na togu hamu mangoloi hagiot ni Debata.

KOLOSSE 1:6

Mur rarat do barita na sian Debata tu portibi on sudena, jana madung dipasupasu ngolu ni jolma hara ni barita i, songon na masa tu ngolumunu. Sian mula-mulana dibege hamu taringot tu asi ni roha ni Debata jana tutu do diauhon hamu, ngolumunu pe madung dipasupasu.

EPESUS 5:17

Ulang hamu maoto, tapi sihiri hamu ma sanga aha giot ni Tuhan i sibaenonmunu.

EPESUS 5:10

Usahohon hamu ma mananda sanga aha na pasonang roha ni Tuhan.

EPESUS 1:8

na dung dilehen Ia di hita markite-hite ragam ni habisuhon dohot parbinotoan.

JOHANNES 7:17

Sanga ise na ra mangihutkon hagiot ni Debata, botoon ni halahi ma sanga na sian Debata do pangajaranKi, sanga na sian roha-rohangKu sandiri.

MASMUR 119:99

Marrohaan do au ulang pado angka gurungku, angke hupasari-sari do angka parentaMu.

1 KORINTUS 1:5

Gabe mamora do hamu taringot tu sudena pangalaho, dung Kristus nampuna hamu. Parbinotoanmunu pe madung bagas situtu taringot tu sude pangalaho jana malo muse do hamu mangajarkon parbinotoan i.

BAENON NI ANGKA RASUL 12:5

Jadi ditahan ma si Petrus di hurungan i; tapi anggo angka anggota ni parlagutan i, sai torus do halahi marsitutu manangiangkon si Petrus tu Tuhan.

PILEMON 1:6

Hutangiangkon do anso nian parkahamaranggionta songon angka halak na porsaya mur pamalohon hita mangastui sude angka pasupasu na tajagit hara ni na domu hita dohot Kristus.