JOSUA 11:14 - BIBEL JAMITA NA DENGGAN

¹⁴ Dibunu sude jolma na maringanan di angka kota i, umpe sada halak dipadiar mangolu. Tapi anggo angka barang-barangna sigodang arga sudena dohot pahan-pahananna dibuat halak Israel do i gabe halahi puna.

JOSUA 11:14 Referans Kwoze

JOSUA 10:40

Dipatunduk si Josua sude luat i. Ditaluhon ia angka raja na di bagian pardolok, na di robean ni dolok sabola Habincaran, na di pat ni dolok sabola Hasundutan, songon i muse na di angka padang-padang sabola Selatan. Sada halak umpe dipadiar ia mangolu; sude do dibunu. Songon i do antong parenta ni Tuhan, Debata ni Israel.

JOSUA 8:27

Pahan-pahanan dohot angka barang-barang na hona rampas di kota i, dipambuati halak Israel ma i gabe di halahi songon na nidok ni Tuhan tu si Josua.

PANGARATAION 20:14

Tola do pakeonmunu sandok bagi na aha nampuna ni angka musumunu i. Na dung dipasahat ni Tuhan Debatamunu do i tu hamu.

BILANGAN 31:9

Ditaban halak Israel ma dadaboru dohot angka anak ni halak Midian, jana dirampas halahi ma sude pahan-pahanan dohot sude hamoraon ni halahi.

PANGARATAION 20:16

Tapi muda angka kota na adong di luat na giot silehenon ni Tuhan i do tu hamu na giot taluhononmunu, jadi angkon bunuonmunu do sude halak na mangingani kota i.

JOSUA 11:13

Tapi anggo angka kota na dipajongjong di ojahan na gincat, sada pe nada adong na nisurbu ni halak Israel, asing sian Hasor na nisurbu ni si Josua sandiri.

JOSUA 11:15

Songon na niparentahon ni Tuhan tu si Musa naposoNa i, songon i do diparentahon si Musa tu si Josua, jana dipatulus si Josua do sude parenta i; sada pe nada adong na so dipadalan ia.

JOSUA 8:2

Angkon songon na nibaenmu tu Jeriko dohot rajana i. Tapi anggo sanoli on tola do pambuatanmunu angka barang-barangna i dohot pahan-pahananna. Marhobas ma hamu mangaroro kota i tompu sian pudi.”

2 JUJUR TAON 20:25

Jadi kehe ma si Josafat rap dohot anak buania i mangarampas barang-barang ni musu i. Dapot halahi ma bahat pahan-pahanan, parlengkapan, pakean dohot angka barang sigodang arga na asing. Dung dipalagut halahi angka barang-barang i tolu ari lolotna, laing bahat dope barang-barang na asing, gabe tarpaksa ditadingkon noma.