JOHANNES 4:23 - BIBEL JAMITA NA DENGGAN

²³ Tapi na giot ro do hatihana, jana madung ro saonnari, marsomba ma angka parsomba na tutu tu Ama i di bagasan Tondi dohot hasintongan; angke jop do roha ni Debata marnida halak na songon i.

JOHANNES 4:23 Referans Kwoze

PILIPPI 3:3

Hape hita do angka na dung manjagit sunat na tutu, nada halahi. Hombar tu panogu-noguon ni Tondi Ni Debata sandiri do tasomba Debata, jana mandok tarimakasi do hita hara ni na dung mardomu i hita dohot Jesus Kristus. Nada marguru tu angka upacara na tarida hita.

JOHANNES 5:25

Tutu do na Hudok di hamu: Ro ma hatihana, jana tardok madung ro i, begeon ni halak na dung mate i ma sora ni Anak Ni Debata, jana sanga ise na umbegesa dapotan hangoluan.

GALATIA 4:6

Dibaen dakdanak ni Debata do hamu, disuru Debata muse ma Tondi Ni AnakNia i masuk tu bagasan rohanta, i ma Tondi na pio-pio, “Abba, ale Amang.”

SURAT NI SI PAULUS TU PARLAGUTAN ROM 8:26

Laing songon i do Tondi Ni Debata, na ro do i mangurupi hita di hagaleanta. Angke anggo hita nada taboto sanga na tarbia sapatutna hita martangiang. Tapi Tondi i sandiri do mangadop tu Debata laho mangidohon di hita sian lungun ni roha na so tarhatahon jabat nada tuk hata pajojorkonsa.

JOHANNES 12:23

Dung i didok Jesus ma tu halahi, “Madung dapot hatihana pasangapon Anak Ni Jolma i.

EPESUS 6:18

Mardongan tangiang mangido tolong tu Debata ma patulus hamu sudena i. Ulang hamu lupa martangiang ganop adong hatihana sanga hombar tu panogu-noguon ni Tondi Parbadia di hamu. Tongtong ma jonggor hamu. Tongtong ma martangiang hamu, manangiangkon sudena halak na porsaya.

JOHANNES 4:21

Didok Jesus ma, “Porsaya ma ho di Au. Sada hatiha sombaon ni halak ma Damang, nada be di dolok on jana nada muse di Jerusalem.

JOHANNES 1:17

Dibaen dilehen do Tona i markite-hite si Musa tapi anggo asi ni roha dohot hasintongan markite-hite Jesus Kristus do.

JESAYA 29:13

Didok Tuhan, “Hum hata-hata sajo do angka jolma i manyomba Au, hape anggo roha ni halahi dao do sian Au. Hum paraturan ni jolma na niapil sajo do anggo ibadat ni halahi.

JESAYA 58:2

Dijalahi halahi do Au ganop ari, jana marpor ni roha giot mananda nasa dalanKu. Songon bangso na mangkarejohon na tutu dohot na so maninggalkon aturan ni Debatana disapai halahi do Au taringot tu aturan na tigor, jop do roha ni halahi mangadop tu Debata.

JESAYA 43:21

Madung Hubaen bangso Israel gabe hapunjunganKu, laho mangendehon puji-pujian di Au.”

SURAT NI SI PAULUS TU PARLAGUTAN ROM 8:15

Harana anggo Tondi na nijagitmunu i ale angka dongan, nada dibaen i hamu gabe hatoban, anso gabe mangulahi mabiar hamu. Sabalikna do, gabe angka dakdanak ni Debata do hamu dibaen. Jana hara ni pangonjar ni kuaso ni Tondi i, pio-pio ma hita tu Debata mandok, “Abba, ale Amang!”

JOSUA 24:14

“Antong saonnari,” ninna si Josua manguduti, “sai pasangap hamu ma Tuhan. Situtui hamu ma jana setia mangoloi tuSia. Pasiding hamu ma angka debata na nisomba ni angka ompumunu najolo di Mesopotamia dohot di Mesir. Hum tu Tuhan sajo ma hamu mangoloi.

1 PETRUS 2:9

Tapi anggo hamu, bangso na Hupili do hamu, angka harajaan hamalimon, bangso na badia, bangso hapunjungan ni Debata. Ia do na mamiohon hamu haruar sian hagolapan anso masuk tu bagasan sinondangNia na tumorang i, anso pararatonmunu barita taringot tu angka pambaenanNia na godang i.

MASMUR 51:6

Haiason dohot habulusan ni roha do dipangido Ho, gohi ma rohangku dohot habisuhonMu.

MASMUR 17:1

Tangihon au martangiang sian sandok rohangku, ale Tuhan, parate-atehon pio-piongku mangido hatigoran.

1 SAMUEL 12:24

Pasangap hamu ma Tuhan i jana mangoloi tuSia ma hamu di bagasan na tigor dohot sian sandok rohamunu. Ingot hamu ma angka pangalaho na godang na dung dibaen Ia di hamu.

JOHANNES 16:32

“Ligi hamu ma: Ro ma hatihana, jana tardok madung lalu i, paserahon ma hamu. Marmulahan be ma hamu tu bagasmunu jana tinggalkononmunu ma sada Au. Hape nada mamunjung Au, angke rap do Ama i dohot Au.

JEREMIA 4:2

baru pe anso tola hamu marsumpa mangasahon goarKu. Jadi gabe pangidoon ni sandok bangso ma anso Hupasupasu halahi, jana pujion ni halahi ma Au.”

JEREMIA 3:10

Dung dipambaeni sudena i, dipaula-ula Juda na so setia i ma mulak tu Au, tapi nada sian bagasan rohania na giot mulak i. Au, Tuhan, madung mandok songon i.”

PODA 15:8

Sonang do roha ni Tuhan muda denggan halak martangiang, tapi anggo haul ni halak na jahat ditulak Ia.

1 JUJUR TAON 29:17

Huboto do, na niujimu roha ni ganop halak jana dihalomohon rohamu do halak parroha na ias. Sian sada ni rohangku, di bagasan jop ni roha huhaulkon ma sudena on tu Ho. Madung tangkas huida sanga songon dia bangsoMu na marlagut dison marjop ni roha marsioban haulna be tu Ho.

SURAT NI SI PAULUS TU PARLAGUTAN ROM 1:9

Dibaen saksingku do Debata, na huoloi di bagasan tondingku markite-hite Jamita Na Denggan taringot tu AnakNia, jana tongtong do huingot hamu di bagasan tangiangku.

MASMUR 147:11

Lomo do roha ni Tuhan tu halak na burju, tu halak na tongtong mararop ni roha tu holongNia.

JEHESKIEL 22:30

Hujalahi do sian tonga-tonga ni halak Israel i na malo pajongjongkon tembok, sanga jongjong di angka inganan ni tembok na matolbak laho mampartahankon luat i muda ro Au mangaroncohon di bagasan parpiar ni murukKu; hape hum sahalak pe nada adong dapot au.

ENDE NA GODANG 2:14

Biasi martabuni ho, haholongan? Patuduhon ma jogi ni rupami, patubegehon ma jeges ni sorami.

MASMUR 32:2

Martua ma sanga ise na so nietong ni Tuhan hajahatanna, jana na bulus rohana.

JESAYA 10:20

Dapot ma hatihana, bangso Israel na teba i nada be marguru tu bangso na markuaso na giot mangago halahi, tapi tu Tuhan, Debata Na Badia ni Israel noma.

JOHANNES 5:28

Ulang longang rohamunu umbege on; harana ro do hatihana, sude halak na di bagasan kuburan i begeonna ma soraNia,

JOHANNES 16:2

Paruaron ni halahi ma hamu sian angka bagas paribadatan. Olo, na ro do hatihana, sanga ise na mamunu hamu, diambang ia na dung mangoloi Debata ma ia, hara ni na dung dibunu ia hamu.