JOHANNES 15:2 - BIBEL JAMITA NA DENGGAN

² Diambungkon Ia do sude rantingKu na so marbatu; jana sude ranting na ramos dipaias Ia do anso mur ramos muse batuna.

JOHANNES 15:2 Referans Kwoze

MATEUS 3:10

Madung singkop kampak laho manaba hayu di uratna i. Sude hayu na so denggan parbatuna, sitabaon ma i, jana niambungkon tu api.

MATEUS 15:13

Dialusi Jesus ma, “Sude suan-suanan na so nisuan ni Damang na di banua ginjang i, angkon niumpat dohot urat-uratna.

HALUMBAAN 3:19

Sanga ise halak na Huhaholongi, i do na Humuruhi dohot na Husambok. Hara ni i, angkon marsitutu ma hamu jana pauba hamu ma rohamunu.

JOHANNES 15:8

Muda ramos hamu marbatu, gabe hasangapan ni Ama i do i; songon i ma dalanna baenonmunu patuduhon na tutu situtu hamu siihutkon Au.

MATEUS 13:12

Tu halak na maradong mur ditambai, anso mur bahat sajo. Tapi anggo tu halak na so maradong, dibuat muse noma sian ia na saotik i.

MATEUS 3:12

DitanganNia do anduri laho mamiari. PiaranNia ma emena i tu talobat, tapi anggo lapung tutungonNia ma tu api na so ra mintop.”

MATEUS 21:19

Diida Ia ma di topi dalan i sada hayu gala-gala. Kehe ma Ia tu gala-gala i, hape umpe sangkamata batuna pe nada adong diida Ia, hum bulungna sajo do. Gabe didok Jesus ma tu hayu i, “Nada tola be ho marbatu salolotna!” Manigor malos ma bona ni gala-gala i.

JOB 17:9

Angka halak na denggan dohot na so marsala, mur marpos ni roha di pardangolan ni ngoluna na tumbuk tu Debata.

IBRANI 12:15

Jagohon hamu ma anso ulang adong sanga ise na morot sian asi ni roha ni Debata; anso ulang adong na gabe duri dohot sihupi di tonga-tongamunu na parohon hasusaan jana na mambaen sego halak na bahat.

JOHANNES 15:16

Nada hamu mamili Au. Au do na mamili hamu jana Husuru hamu kehe anso ramos hamu marbatu – i ma parbatu na denggan. Dung i lehenon ni Damang ma di hamu sanga aha pe na nipangidomunu markite-hite goarKu.

LUKAS 8:13

Same na madabu tu tano na marbatu i, i ma manggambarkon angka halak na manangihon hata i jana na manjagitsa mardongan sonang ni roha. Tapi nada jabat marurat di bagasan roha ni halahi. Hum santongkin sajo do halahi porsaya hape di na ro pandugaan, marbalik ma halahi.

MALEAKI 3:3

Jadi juguk ma Ia songon sada halak panopa perak; jana paiasonNia ma halak Levi songon na paiaskon sere dohot perak, anso gabe sioban haul halahi tu Tuhan di bagasan hasintongan.

1 JOHANNES 2:19

Angka halak na dung manadingkon hita do anggo angka musu ni Kristus i, tapi nada halak na masuk tu hita hian halahi. Sugari halak na masuk tu hita hian halahi, tontu angkon tongtong do halahi rap dohot hita. Tapi morot do halahi sian hita anso torang tarida na so masuk tu hita hian sahalak pe sian halahi.

TITUS 2:14

Madung dihaulkon Ia diriNia hara ni hita laho paluahon hita sian hajahatan sudena, jana dibaen Ia hita gabe bangso hapunjunganNia, jana na ringgas mambaen na denggan.

1 KORINTUS 13:1

Sugari tarbaen iba mangkobari di angka hata ni jolma, dohot di hata ni surusuruan, hape inda nihaholongan angka dongan na asing, tudos ma iba songon doal na maruolol sanga songon canang na mangkuling-kuling.

SURAT NI SI PAULUS TU PARLAGUTAN ROM 8:28

Taboto do, Debata do na mangatur sasudena, anso gabe manjalak tu dengganna di angka halak na mangkaholongi Ia jana na nipiohonNia hombar tu sangkapNia.

JOHANNES 17:12

Salolot rap Au dohot halahi di portibi on, madung Hujagohon halahi markite-hite kuaso ni Damang i – i ma kuaso na nilehen ni Damang i tu Au. Madung Huondingi halahi na nipasahat ni Damang tu Au, jana umpe sada sian halahi na mago, asing ni anak mago i; anso laing tulus ma na tarsurat di Buku Na Badia i.

PODA 4:18

Songon parbincar ni mataniari do anggo dalan na nibolus ni halak na denggan; mur lolot mur torang, jana ujungna ari pe gabe torang sajo.

MATEUS 13:33

Adong dope umpama na asing dicaritohon Jesus tu halak na bahat i. “Anggo Harajaan Ni Banua Ginjang tarsongon ragi do i. Dibuat anak boru i ma ragi i, dicampurkon ia ma tu topung tolu tabung, lopus kombang sude!”

HOSEA 6:3

Hara ni i, tahaburjuhon ma laho mananda Tuhan. Pasti do ro Ia tu hita songon parbincar ni mataniari jana songon udan na mangaehi tano di ujung ni ari nonat.”

JESAYA 29:19

Angka halak na pogos jana na lebak hilalaonna ma hatuaan na nilehen ni Tuhan, Debata Na Badia ni Israel.

JESAYA 27:9

Tapi anggo dosa ni Israel hum sada do dalanna anso tarsesa i, i ma muda digiling lamot songon soda angka langgatan parsombaan tu angka debata. Sandok panutungan ni hamonyan dohot tiang gana-ganaan Debata Asera angkon nisarsarkon muse.

MASMUR 92:14

angka hayu na sai tongtong rata jana togu, jana haru pe matobang laing marbatu.

DANIEL 11:35

Hona bunu ma deba angka pamimpin na marbisuk i, tapi akibatna songon on ma: gabe mur polin ma angka jolma i. Songon i ma torus lalu tu hatiha na parpudi, i ma hatiha na dung ditontuhon Debata.

MATEUS 7:19

Sude suan-suanan na so denggan marbatu, tabaon do i anso nitutung.

MATEUS 25:29

Angke tu halak na maradong umbahat dope lehenon, lopus marlobi-lobi ia. Tapi anggo halak na so maradong, na adong saotik na disia i, nibuat muse ma i sian ia.

MARKUS 4:20

Same na nisabur di tano na napu i, i ma tarsongon angka na manangihon hata i, jana laing dijagit rohana. Tarida ma parbatuna. Adong na tolu pulu lompit, adong muse na onom pulu lompit. Jana adong ma na sampe saratus lompit suhana.”

JOHANNES 15:1

“Au do bona ni anggur na tutu, jana Damang do parkobun i.

JOHANNES 15:3

Madung ias anggo hamu dibaen pangajaran na Hulehen i di hamu.

JOHANNES 15:6

Sanga ise na so tinggal di bagasan Au, ambungkonon ma ia songon ranting i gabe mahiang. Angka ranting na songon i, sipalaguton ma i jana siambungkonon tu bagasan api, anso mosok.

SURAT NI SI PAULUS TU PARLAGUTAN ROM 11:17

Diponggolkon deba sian dangka ni hayu i, jana nilohotkon ma ho na dibuat sian hayu harangan i tu inganan ni halahi gontina, anso martohap ho di urat dohot di miak ni hayu zetun i.

SURAT NI SI PAULUS TU PARLAGUTAN ROM 11:22

Jadi sian i tarida hita ma sanga na bia denggan ni roha ni Debata dohot pir ni rohaNia. Pir do tindakanNia anggo tu halak pardosa, tapi anggo tu ho denggan do rohaNia – asal ma laing sian hadengganan ni rohaNia ho mangolu. Anggo inda songon i, ho pe ambungkononNa do muse.