JESAYA 44:8 - BIBEL JAMITA NA DENGGAN

⁸ Ulang enek rohamu, ale bangsongKu; diboto ho do sian nahinan lalu tu saonnari, madung maralatan hian Au sanga aha na giot tarjadi; hamu ma na gabe saksingKu. Adong ma he Debata asing sian Au? Nada adong Dolok Batu na asing, na Hutanda!”

JESAYA 44:8 Referans Kwoze

JESAYA 43:10

Hamu do angka saksingKu, ninna Tuhan. Hutodo ho gabe naposongKu, anso ditanda ho Au jana porsaya tu Au, jana na mangastui, bahaso Au do Tuhan. Sasada Au do da Debata, anggo Debata na asing nada unjung i adong, jana indangkan na adong i.

1 SAMUEL 2:2

Nada adong na badia songon Tuhan, nada adong na gogo songon Ia, nada adong na songon Ia na bisa gabe parondingan.

PANGARATAION 4:35

Dipatuduhon Tuhan do sudena i tu hamu laho patorangkon na sasada Ia do Debata, jana nada adong be na asing.

PANGARATAION 4:39

Antong sadari on, ingot jana na so tola lupa hamu: Debata di langit dohot di ginjang ni tano on do Tuhan. Nada adong debata na asing be.

JOHANNES 10:30

Sada do Au dohot Damang.”

JOHANNES 1:1

Di mulana i, madung adong Hata i. Rap dohot Debata do Hata i jana Debata do Hata i.

JOEL 2:27

Jadi botoonmunu ma ale Israel, na di tonga-tongamunu do Au, jana Au do Tuhan Debatamunu. Nada adong Debata na asing be, olat ni Au sandiri. Nada pailaon be bangsongKi salolot-lolotna!”

JESAYA 44:6

On ma na nidok ni Tuhan, Raja dohot Partobus ni Israel, Tuhan Na Markuaso, “Au do na parjolo jana Au do na parpudi, asing sian Au nada adong be debata na asing.

MASMUR 18:31

Angke nada adong Debata asing sian Tuhan, hum Debata do na mangalehen parlindungan.

2 SAMUEL 22:32

Harana, ise ma he Debata asing ni Tuhan? Asing ni Debata, ise dope di hita parondingan?

PANGARATAION 32:39

Tapi songon i pe Au, Au sandiri do na tutu Debata; asing sian Au nada adong be Debata. Au do na mamunu, dohot na pangoluhon mambugangi dohot na pamalumkon. Muda jabat do Hubaen pangalaho sanga na aha sahalak pe nada tarbaen mangalosa.

JESAYA 46:9

Ingoti di bagasan rohamu sude na masa na salpu angka pangalaho na tarjadi najolo. Okui ma, na so adong Debata asing sian Au nada adong na sarupa dohot Au.

DANIEL 6:22

Dung i ninna si Daniel ma mangalusi raja i, “Sai ginjang ma umur ni raja i salolot-lolotna!

DANIEL 4:25

Paoroton ma raja i sian tonga-tonga ni parngoluon ni jolma, jana mangolu di tonga-tonga ni angka binatang noma di padang. Pitu taon honokna sai mangan ruput raja i songon lombu jana modom di tano lapang na so martarup, gabe marombun-ombun. Dung salpu i, okuon ni raja i ma paboa na markuaso do Na Gumincat i di ginjang ni harajaan ni jolma, jana dilehen Ia harajaan i tu sanga ise sajo na nitodo ni rohaNia.

DANIEL 2:47

Didok raja i ma, “Tutu do Daniel, gumodang do Debatami sian sandok debata. Guru diSia do sude raja, jana na margogo mambuka rahasia. Huboto pe na songon i, hara ni na bisa do ho patorangkon astuan ni rahasia on.”

DANIEL 2:28

Tapi adong do di banua ginjang Debata na mambuka sude rahasia, jana madung dipaboa Ia tu raja i sanga aha na giot tarjadi tu pudi on. Jadi on ma nipi ni raja i dohot astuanna:

JEREMIA 10:7

Ise ma he na so mabiar marnida Ho, ale Raja ni sandok bangso? Tutu ma da, Ho do na patut sipujion jana na patut pasangapon. Sian sandok na pistar di tonga-tonga ni angka bangso dohot sian sude angka raja ni halahi, sahalak pe nada adong martudosan tu diriMu ale Tuhan.

JESAYA 48:5

Gabe sian najolo Hupaboa hian do i, dompak so tarjadi Hupabotohon humani, anso ulang didok ho: Gana-ganaanku na mangkarejohonsa, patung na hutuhil dohot patung na hutuang i na manyuruna.

JESAYA 44:2

Songon on ma hata ni Tuhan, na manompa ho na mambaen ho hatiha di bortian jana mangurupi ho. NaposongKu do ho, ulang mabiar rohamu, ho do bangso na Huhaholongi todoan ni rohangku.

JESAYA 43:12

Au do na paboahon, paluahon dohot mangkobarkon, jana nada debata na asing na adong di tonga-tongamunu: “Hamu do na gabe saksingKu jana Au do Debata,” songon i ma hata ni Tuhan,

JESAYA 42:9

Angka na disurirangkon humani madung tarjadi, saonnari na imbaru noma sipaboaonKu tu hamu haru pe nada tarjadi dope i.”

JESAYA 30:29

Tapi anggo hamu, marjop ni roha jana marendei ma hamu songon na masa di borngin ni pesta ugamo. Marmoga-moga ma hamu songon halak na ribur mardalan didongani sora ni suling laho manaek tu dolok ni Tuhan, na mangondihon Israel.

ESRA 8:22

Maila do au laho mangido tentara na markudo tu raja i, laho manjagohon hami nian maradopkon musu di pardalanan i. Harana madung hudok tusia, bahaso na sai dipasupasu Debatanami do ganop halak na porsaya diSia jana dihasogohon bope diuhum Ia do ganop halak na so setia tuSia.

ESRA 1:2

“On ma parenta ni si Kores, raja ni Persia. Madung dibaen Tuhan, Debata Na Markuaso di banua ginjang au gabe raja di sandok portibi on, jana ditugaskon do au laho mambangun sada bagas diSia di Jerusalem na di tano Juda.

PANGARATAION 32:31

Diboto musu ni Israel sandiri do na so margogo debatana i, nada alona Debata ni Israel na hebat i.

PANGARATAION 32:4

Tuhan ma da na mangondihon ho gumogo, sude dalanNa tigor jana sanggam do. Setia do Debatamu jana ias rohaNa, na denggan dohot na patut do dibaen Ia.

PAMUNGKAAN 48:19

Dijua amangnia i do i, didok ma, “Huboto do da i amang, huboto do. Pomparan ni si Manase pe gabe bangso na godang do. Tapi laing gumodang dope kuaso ni angginia i ulang ia, jana pomparan ni angginia i gabe angka bangso na godang do.”

PAMUNGKAAN 46:3

“Au do Debata, Debata na nisomba ni amangmu,” ninna. “Ulang pola mabiar ho kehe tu Mesir. BaenonKu ma gabe bangso na godang pomparanmu disi.

1 JOHANNES 1:2

Madung dipaboa hangoluan i tu portibi on, jana madung hami ida. I ma umbaen na hami saksihon taringot tusi jana hami jamitahon taringot tu ngolu na manongtong na adong hian rap dohot Ama i jana na dung dipatidahon tu hami.

IBRANI 12:1

Jadi anggo taringot tu hita, bahat sajo do humaliang hita angka saksi! Hara ni i, sasudena na padokdok hita bope dosa na sai lohot tu hita, tatalgangi ma sudena sian hita. Jana marsitutu ma hita manyalpui parlumbaan na di jolonta.

BAENON NI ANGKA RASUL 14:15

“Biasi baenonmunu songon i, hamu ale angka dongan? Laing jolma do hami songon hamu! Na giot manjamitahon Jamita Na Denggan i do hami dison tu hamu angka dongan, anso ditadingkon hamu sudena pangalaho na so marguna on boti anso ro hamu mandapotkon Debata na mangolu i, i ma sitompa langit dohot tano on dohot laut dohot sude na adong di bagasanna.

BAENON NI ANGKA RASUL 1:8

Tapi jagitonmunu ma kuaso muda dung ro Tondi Parbadia tu hamu. Jana gabe saksingKu ma hamu di Jerusalem, di sude Luat Judea, di Samaria lopus tu ujung ni tano on.”

JOHANNES 6:10

“Suru hamu ma sudena halahi juguk,” ninna Jesus tu angka siseanNia i. Bahat do ruput-ruput disi, gabe marjuguhan di ruput-ruput i ma sude halak i – adong ma hira-hira lima ribu halak halaklahi.

MASMUR 86:10

Dibaen na sangap do Ho, hahomangan do karejoMu, hum Ho do Debata.

JESAYA 17:10

O Israel, madung dihalupahon ho Debata na paluahon dohot na manjagohon ho songon dolok batu na tohong. Balik do, madung disuani ho angka kobun laho marsomba angka debata.

JESAYA 26:4

Sai haporsayai ma tongtong Tuhan, harana Tuhan Debata do dolok batu na manongtong.

JESAYA 41:23

Paboa ma sanga aha na giot masa, anso hami boto na tutu ho debata. Baen ma jolo sada na marguna sanga na mambaen susa, anso mabiar hami jana homang roha.

JESAYA 43:11

Au sandiri ma da Tuhan, asing sian Au nada adong na gabe haluaan.

JESAYA 45:19

Nada Au mandok hata marsibuni-sibuni, sangkapKu nada i Hututup-tutupi. Nada Hupangido sian bangsongKu Israel anso jalahanna Au di inganan na lungun di na pinjil. Au do Tuhan; na patangkas habonaran, jana Hubaritahon hatigoran.”

JESAYA 48:3

Didok Debata ma tu Israel: “Di na honok madung Hulumbahon hian na giot masa, jana ompot do i Hubaen gabe tarjadi.

MASMUR 18:32

Ia do Debata na margogoihon au, na mambaen sonang di pardalananku.

JESAYA 43:9

Marlagut ma hamu sude angka bangso, suru ma sandok marga marsuo. Ise ma sian halahi na tarbaen maralatan tu na giot ro? Ise na dung mangalatkon hian na masa saonnari on? Anso dibege angka saksi ni halahi, jana dokkononna tutu do songon i.”