JESAYA 44:10 - BIBEL JAMITA NA DENGGAN

¹⁰ Parcuma do mambaen patung na nituang, dung i disomba ma i songon debata!

JESAYA 44:10 Referans Kwoze

JEREMIA 10:5

Songon halak-halak na di kobun ancimun do patung gana-ganaan i. Nada mangkuling, nada mardalan, jana angkon angkaton do i dibaen na so malo mardalan. Ulang hamu mabiar mida i, angke na so tarbaen i do mambaen na jahat tu hamu; mambaen na denggan pe nada margogo i muse.”

HABAKUK 2:18

Aha ma he guna ni patung gana-ganaan? Aha ma he guna ni patung gana-ganaan sibaen gabus i? Harana porsaya do na mambaenna di parkarejoanna, hape nian angka gana-ganaan na ngungu do na nibaenna i.

BAENON NI ANGKA RASUL 19:26

Saonnari madung tangkas diida jana dibege hamu sandiri sanga aha na nibaen ni si Paulus. Didok ia, anggo angka debata na nibaen ni tangan ni jolma, nada tutu i debata. Jana madung marbalik bahat halak dibaen ia gabe mangkaporsayai na niajarkonnia i. Nada hum di Epesus on sajo, tapi bolas dohonon madung sudena halak na saluat Asia on.

1 KORINTUS 8:4

Anggo taringot tu na mangankon sipanganon na dung nihaulkon tu gana-ganaan, taboto do, nada adong satutuna anggo na nigambarkon ni gana-ganaan i. Jana tangkas do taboto, anggo Debata hum sada sajo do; nada adong be na asing.

DANIEL 3:14

Disapai raja i ma tu halahi, “Sadrakh, Mesakh dohot Abednego! Tutu dehe na so ra hamu marsomba angka debatangku jana nada ra muse hamu manungkap tu patung sere na hupajongjong i?

DANIEL 3:1

Di sada hatiha, dibaen Raja Nebukadnesar ma sada patung sian sere 27 meter gincatna jana godangna hira-hira 3 meter. Di napa Dura na di propinsi Babel do i dipajongjong ia.

JESAYA 41:29

Hamu sude nada adong gunana, nada margogo mambaen sanga aha. Patung sajo do hamu na nituang ni tangan ni jolma, gale jana nada margogo.”

1 RAJA-RAJA 12:28

Dung ditimbangi ia pangalaho i, dibaen ia ma dua patung ni lombu sian sere jana didok ia ma tu rayat i, “Hamu bangso Israel! Tuk ma i na sahonokna on kehe hamu maribadat tu Jerusalem. Saonnari, angka on ma debatamunu na dung maroban hamu ruar sian tano Mesir!”

MASMUR 115:4

Anggo sisombaon ni halahi sere dohot perak sajo, na nitukangan ni tangan ni jolma do.

JESAYA 40:19

Nada sarupa Ia dohot patung na nibaen ni jolma, na marlampis sere dohot perak baen ojahanna.

JEREMIA 16:19

O Tuhan, Ho do na mangondihon au dohot na margogoihon au; diurupi Ho do au taran di hagogotan. Marroan ma angka bangso sian ujung ni tano on tu Ho jana dokkononna ma, “Hum debata na so tutu jana na so marguna do debata ni ompunami.

JESAYA 45:20

“Ro ma hamu jana marlagut, hamu sude na malua sian tonga-tonga ni angka bangso. Angka halak na mangudur-udurkon patung hayu-hayu, na so marbinoto boti na oto; na martangiang tu angka debata na so bisa mambaen malua.