JESAYA 43:1 - BIBEL JAMITA NA DENGGAN

¹ Tapi saonnari, songon on do hata ni Tuhan, na manompa ho ale Jakob, na mambaen ho ale Israel: “Ulang mabiar, harana madung Hutobus ho, madung Hupio ho marhite goarmu, Au do nampuna ho.

JESAYA 43:1 Referans Kwoze

MASMUR 100:3

Ingot ma anggo Tuhan i, Debata do Ia do manompa hita jana nampunaNia do hita, bangsoNia do hita, bangso na nipature-tureNia.

ZAKARIA 13:9

Hum sapartolu noma na mangolu sian i. Jana paiasonKu ma halahi songon perak na dipapita ni api. UjionKu ma halahi songon panguji ni halak di sere. Jadi martangiang ma halahi tu Au, jana alusanKu ma halahi. DokkononKu ma tu halahi, paboa na bangsongKu do halahi, jana okuon ni halahi muse ma, Au do Tuhan Debata ni halahi.”

JESAYA 43:7

Angke bangsongKu do halahi na nipanggoarkon tu goarKu, Hutompa halahi laho pasangapkon Au, na Hubaen jana na Hujadihon!”

TITUS 2:14

Madung dihaulkon Ia diriNia hara ni hita laho paluahon hita sian hajahatan sudena, jana dibaen Ia hita gabe bangso hapunjunganNia, jana na ringgas mambaen na denggan.

HALUMBAAN 5:9

Dung i diendehon halahi ma sada logu na imbaru: “Hum Ho sajo do na patut mambuat buku on dohot mambuka angka capna i. Angke madung hona bunu Ho, jana hara ni hamamateMi madung ditobus Ho jolma tu Debata sian sandok marga, hata, negara, dohot bangso.

EPESUS 2:10

Na nitompa ni Debata do hita on, jana markite-hite Jesus Kristus dipauli Debata hita anso tabaen angka pangalaho na denggan na nipasingkopNia humani di hita.

JESAYA 43:21

Madung Hubaen bangso Israel gabe hapunjunganKu, laho mangendehon puji-pujian di Au.”

JESAYA 42:6

“Au ma da Tuhan, na mamiohon ho, markite-hite hasintongan, na maniop tanganmu; madung Hubaen jana Hulehen ho gabe janji tu sude jolma gabe sinondang tu angka bangso;

2 TIMOTEUS 2:19

Hape anggo ojahan na nibaen ni Debata, ojahan na togu situtu do i jana na so tarhutur. Di ginjangna i tarsurat do, “Ditanda Tuhan do angka nampunaNia,” bope “Sanga ise na mandok nampuna ni Tuhan ia, angkon mantak ma halakna i mambaen dosa”.

JESAYA 44:2

Songon on ma hata ni Tuhan, na manompa ho na mambaen ho hatiha di bortian jana mangurupi ho. NaposongKu do ho, ulang mabiar rohamu, ho do bangso na Huhaholongi todoan ni rohangku.

JESAYA 41:14

“Ulang ho mabiar ale ulok-ulok ni Jakob, ale halak Israel! Au do pangurupi di ho, ninna Tuhan, jana na manobus ho, i ma Na Sun Badia, Debata ni Israel.

JEHESKIEL 16:8

Dung i mamolus ma Au sian i jana Huida ma ho, tutu, madung hatihana ho marhaposoon. Hupahembang ma abitKu tu ho laho mangulosi ho. Hubaen ma parjanjian dohot ho, songon i ma pandok ni Tuhan Debata, jana marhite na songon i Au ma nampuna ho.

JEREMIA 50:34

Tapi gogo do Au pambela ni halahi Tuhan Na Markuaso i do goarKu. Au sandiri do na manjuljulkon parkaro ni halahi dohot na maroban dame tu portibi on. Tapi anggo tu halak Babel paroonKu ma hasusaan.”

HARURUAR 33:17

Didok Tuhan ma tu si Musa, “Huoloi pe pangidoanmi hara ni na lomo rohangKu di ho jana Hutanda ho tangkas.”

MALEAKI 3:17

Didok Tuhan Na Markuaso i ma, “Jadi gabe bangsongKu ma halahi. Di ari na Hutontuhon i, gabe hasudungan ni rohangKu ma halahi jana Au nampunasa. Ibo ma rohangKu mida halahi, songon panghasiani ni ama-ama tu anakna na marpangoloion tuSia.

BAENON NI ANGKA RASUL 27:25

Jadi hara ni i hamu ale angka dongan, angkon godang ma rohanta! Angke pos do rohangku di Debata, angkon tulus do sudena na nidokNia i tu au.

JEREMIA 31:3

Hupatidahon do diringKu sian na dao tu halahi. O ale bangso Israel, sian najolo do sai holong rohangKu mida hamu, jana laing torus do tu joloan on giot patuduhononKu na holong rohangKu mida hamu.

PAMUNGKAAN 32:28

Didok bayo i, “Nada si Jakob be goarmu. Madung marsiranggut ho mangalo Debata dohot mangalo jolma jana monang do ho; antong si Israel noma goarmu.”

MASMUR 102:18

Suratkon ma sude na nibaen ni Tuhan, baen di sundut na ro di pudi, anso bolas Ia pujion ni bangso na so tubu dope tu portibi on.

PANGARATAION 32:9

Hape anggo pompar ni si Jakob on dipili Tuhan diSia sandiri antong.

JESAYA 49:1

Tangihon ma au, ale angka pulo, parrohahon ma, ale angka bangso na dao! Hatiha sian bortian dope madung dipio Tuhan madung didok goarku hatiha dibortian ni dainang.

JEREMIA 33:24

“Madung he diparrohahon ho angka hata-hata ni halak na mandok na dung Hubuang Israel dohot Juda, bangso na dua na dung Hutodo i? Layas diida angka jolma i bangsongKi jana nada dietong roha ni halahi be i songon sada bangso.

JESAYA 62:12

Goaron ma halahi: ‘Bangso Ni Debata’, ‘Bangso Na Nipalua ni Tuhan’. Goaron ma Jerusalem ‘Kota na nihalungunan’, ‘Kota na so nitadingkon ni Tuhan’.

JESAYA 48:17

Songon on ma pandokkon ni Tuhan, Partobusmu, Na Sun Badia, Debata ni Israel: “Au do Tuhan, Debatamu, na mangajari ho salaho tu na mangkorhon na denggan, na mangaramoti ho di dalan na angkon bolusonmu.

JEREMIA 33:26

laing songon i ma tongtong tioponKu parjanjianKu dohot pomparan ni si Jakob dohot naposongKu si Daud. TodoonKu ma sahalak sian pomparan ni si Daud laho mangarajai pomparan ni si Abraham, si Ishak dohot si Jakob. Maribo ni roha ma Au tu bangsongKu jana sonang halahi baenonKu.”

HARURUAR 15:13

Setia do Ho tu janjiMu manogu bangso na dung nipaluaMu, diiring Ho do halahi tu tanoMu na badia marhite hagogoonMu.

JESAYA 63:16

Nada he Ho do Amangnami? Nada ditanda si Abraham dohot si Jakob hami. Tapi anggo di hami sandiri, Ho do Amangnami, na palua hami sian narobi.

BAENON NI ANGKA RASUL 27:20

Adong do sanga na piga ari nada hami ida mataniari dohot bintang, jana alogo i pe laing torus do marngongos. Jadi nada adong be arop ni rohanami malua.

HARURUAR 15:16

Biar dohot sursar mandondoni halahi; O Tuhan, paida-ida gogoMi, jana umpe margogo be jongjong hara ni na humitir halahi lopus mamolus bangsoMi – bangso na nipaluaMu sian parhatobanan i.

JESAYA 27:11

Muda adong angka rantingna i na mahiang jana masopak, ro ma angka dadaboru mambuatisa baen soban. Nada diastui bangso i sanga na aha, jadi gabe nada haholongan ni Panompa i be halahi sanga asianNa.

JESAYA 43:5

Ulang ho mabiar sanga enek rohamu, angke Au do pangondianmu. Sian Hasundutan dohot sian Habincaran, Husuru marlagut angka pomparanmu.

JESAYA 48:20

Kehe ma ho sian Babel, lojongi ma tu Kasdim baritahon ma mardongan jop ni roha. Baritahon ma sun tu dia: “Madung dipalua Tuhan Israel, naposoNia!”

JESAYA 52:9

Ale sego-sego ni Jerusalem, marsurak ma marjop ni roha! Angke dipalua Tuhan bangsoNia jana diapoi Ia.

JESAYA 63:9

sian sude hasusaan ni halahi. Nada tongoson ni Tuhan suruan sanga duta, Ia sandiri do paluahon halahi. Sian narobi do dipature-ture Ia halahi hara ni holong dohot ibo ni rohaNia.

DANIEL 10:19

Didok ia ma, “Holong do roha ni Debata mida ho, hara ni i ulang pola mabiar ho.” Taran mandok songon i dope ia, mur martamba ma huhilala gogongku jana hudok ma, “Didok tuan i ma da hatana. Madung ditambai tuan i gogongku.”

PANGARATAION 32:6

Songon i ma he pamalosmu di hadengganan ni Tuhanmu, ale jolma na so marbisuk boti na sun otomu? Nada he Amangmu do Ia, na manjadihon ho, na manompa hamu gabe sada bangso?

PANGARATAION 32:15

Gabe maradong bangso ni Tuhan, tapi sai tagi mangalo, ditulak halahi do Sipalua na gumogo. Mamokmohi halahi, butongan sipanganon. Ditadingkon halahi do Debata Na Manjadihon.

JESAYA 45:11

Songon on do hata ni Tuhan, Debata Na Badia, jana na manjadihon Israel: “Hamu ma he na patut marsapa tu Au salaho tu angka dakdanakKu, sanga na mangalehen parenta tu Au salaho tu karejongKu?

JESAYA 49:26

PaksaonKu ma angka jolma na manindas ho, mangankon sibukna sandiri, jana mabuk manginum mudarna sandiri, songon halak na mabuk minum anggur na imbaru. Gabe botoon ni jolma manusia ma, Au do Tuhan na paluahon ho, Na Gumogo, Debata ni si Jakob manobus ho.”

JESAYA 51:13

Hara ni i dihalupahon ho ma Tuhan na manompa ho, na pahembangkon langit jana mamayakkon ojahan ni tano on, hara ni i mabiar jana gamang ho sasadari, maradopkon pangamuk ni na mamparkanciti, di na singkop ia giot pangabiskon ho. Di dia ma he lakna pangamuk ni na mamparkanciti i?