JESAYA 13:2 - BIBEL JAMITA NA DENGGAN

² Pajongjong ma mandera porang di puncu ni dolok na gundul! Marsurak ma tu angka parajurit, jana patoltol ma tanganmu tanda ni na giot mangaroro halahi mamorangi kota na gakgak i jana mangonjar angka horbanganna.

JESAYA 13:2 Referans Kwoze

JEREMIA 51:58

Giot pahornoponKu tu tano tembok ni Babel na togu i. Angka pintu ni horbanganna na timbo-timbo i surbuonKu noma i. Nada adong gunana usaho ni angka bangso, angke panganon ni api do karejo ni halahi i. Au Tuhan Na Markuaso madung mandok songon i.”

JESAYA 5:26

Baenon ni Tuhan ma sada tanda giot mamio bangso sian na dao. Mandosik ma Ia mamio halahi sian angka ujung ni tano on. Marroan ma halahi tibu jana hipas.

JEREMIA 50:2

“Paboa ma barita tu angka bangso! Pasar ma barita i. Baen ma tanda anso sar barita i. Ulang tabuni-tabunihon barita i. Madung hona taban Babel! Madung maila Debata Bel, madung tarsonggot Marduk! Madung maila angka gana-ganaan i.

JEREMIA 51:25

O ale Babel, tudos tu dolok do ho na mangaroncohon sude portibi on. Tapi Au Tuhan giot mangalo ho. TarihonKu ma ho jana Hupabalik jana Hupadiar puntung gabe tiranggong.

JESAYA 10:32

Di kota Nob ma sadari on musu i, jana disi ma halahi mamohul tenjuna maradopkon Dolok Sion tu kota Jerusalem.

JESAYA 18:3

Hamu sude angka na maringanan di tano on! Parrohahon hamu ma muda dung dipanaek mandera di puncut ni angka dolok! Tangihon hamu ma muda dipalu sarune!

JESAYA 11:15

Pahiangon ni Tuhan ma dohot Solok Sues. BaenonNia ma mangombus alogo na milas lopus mahiang Batang aek Efrat jana gabe pitu batang aek na pejet-pejet ma disi jana sude halak tarbaen manariparisa.

JESAYA 11:12

PajongjongonNia ma sada mandera laho patandahon tu angka bangso bahaso na nipalagutNia mangulahi bangso Israel dohot Juda na marserak i di na opat mata angin jana maroban halahi mulak.

MASMUR 60:4

Dilehen Ho do dalan di halak na marsitutu marugamo, anso laing bolas malua sian uhuman,

JESAYA 19:16

Dapot do hatiha ni i, gabe songon dadaboru parila jana parmombut bangso Mesir. Mabiar noma halahi muda diidasa Tuhan Na Markuaso i mangambalkon tanganNa laho manguhumi halahi.

JESAYA 31:9

Maporus ma rajana i hara ni biarna, jana angka perwirana i tarsonggot situtu, gabe ditadingkon halahi noma mandera ni parporangan.” Madung didok Tuhan songon i, nampuna api na di Sion dohot tataring na di Jerusalem.

JEREMIA 50:41

Sian luat na dao di Utara, ro ma sada bangso na gogo. Bahat do raja na ro rap dohot halahi. Ma pola hobas halahi manyintak sinjatana.

JEREMIA 51:12

Lehen ma tanda laho manyerang angka tembok ni Babel. Pagomos panjago. Baen pangawal. Markobas ma mambulutkon!” Madung didalankon Tuhan sanga aha na disangkaphonNia maradopkon Babel.