JESAYA 12:1 - BIBEL JAMITA NA DENGGAN

¹ Dapot do hatihana marende angka jolma: “O Tuhan, mandok tarimakasi do au tu adopanMu, hara ni na niadopanMu au. Najolo muruk do Ho tu au, hape saonnari madung mombun rohaMu.

JESAYA 12:1 Referans Kwoze

MASMUR 30:5

Angke hum santongkin sajo do muruk Tuhan, hadenggananNa do mardalan salolot iba di hangoluan. Saborngin sajo do au tangis, hape maroban hamogaan ma mataniari bincar.

JESAYA 25:1

Ale Tuhan, Ho do Debatangku, giot hupasangap jana hupuji do goarMu. Madung dipatupa Ho angka karejo na pahomang roha. Sian denggan ni rohaMu do i dibaen Ho sudena, na nijanjihonMu mamungka sian narobi.

JESAYA 54:8

Hara ni parpiar ni murukKu, Hutabunihon bohingKu, santongkin maradopkon ho. Tapi patuduhononKu ma tu ho holong ni rohangKu salolot ni lolotna.” Songon i ma na Hudok, Au Debata Sipalua ho.

ZAKARIA 14:9

Jadi mamarenta ma Tuhan gabe raja di sandok portibi on; sombaon ni ganop jolma ma Ia songon Debatana jana tandaon ni halahi ma Ia di bagasan goar na sarupa.

HOSEA 6:1

“Beta ma mulak hita tu Tuhan. Ia do na mambaen marhancit hita, tapi laing Ia muse do na pamalumkon. Ia do na mambugangi hita, tapi laing Ia muse do na mambalut angka bugangta.

JESAYA 51:3

Angke apoan ni Tuhan ma Sion, mangapoi sude hasesegona. Dibaen Ia do halongonan i songon kobun Eden jana padang-padangna songon kobun ni Tuhan. Disi ma adong jop ni roha, ende hatarimakasion dohot logu na gogo.

JESAYA 35:10

Lalu halahi tu Jerusalem marjop ni roha, manortor lalu marsurak marmoga-moga. Martua ma halahi salolot-lolotna, malua sian habot ni roha dohot susa.

JESAYA 14:3

Giot paluaon ni Tuhan ma Israel sian parhancitan dohot pardangolanna dohot sian karejo na borat na nipaksahon tu halahi.

JESAYA 49:13

Marende ma ho, o langit, marsurak ma ho ale portibi, marsurak angka dolok marendei. Ro Tuhan mangapoi bangsoNia i, dihaholongi Ia bangsoNia angka na susa.

JESAYA 25:9

Dokkonon ni halak ma di hatiha i, “Tutu ma da, Ia do antong Debatanta. I ma Tuhan na tapaima-ima laho mangalehen haluaanta. Saonnari marsurak ma hita marjop ni roha, dibaen na dung nipaluaNia hita.”

SURAT NI SI PAULUS TU PARLAGUTAN ROM 11:15

Dibaen muda panulakon ni halahi gabe pardengganan tu portibi on, nada he gabe songon hangoluan sian na mate ma i, muda dung tulus halahi dijagit?

ZAKARIA 14:20

Di ari i, gorgahonon ma tu angka giring-giring na di abit ni kudo hata na mandok, “Dihapunjungkon di Tuhan.” Argahonon ma angka hudon na di Bagas Ni Tuhan songon angka mangkuk parhaulan na di jolo ni langgatan.

HOSEA 11:8

Didok Tuhan ma, “Ale Israel nada padiaronKu ho sanga tadingkononKu. Tarbaen Au ma he tu ho songon parabis ni Adma? Sanga Hubaen ho songon Zeboim? Nada torus rohangKu mambaen songon i, hara ni godang ni holong ni rohangKu tu ho!

JESAYA 66:13

ApoanKu ma hamu di Jerusalem, songon ina na mangapoi dakdanakna.

JESAYA 26:1

Di hatiha i, endehonon ni halak ma ende on di tano Juda: “Na tohong ma da kotanta on; madung dipajongjong Tuhan, tembok dohot benteng.

JESAYA 11:16

Dapot halak Israel na teba i ma dalan godang laho ruar sian Asur, songon na masa di hatiha ni ompu-ompu ni halahi ruar sian Mesir.

JESAYA 10:25

Santongkin nari, sidung ma uhumanKu hamu, jadi pangabisonKu noma halahi.

JESAYA 2:11

Dapot ma hatihana parenjepon halak na gakgak, halak siginjang roha patunduhon, jana Tuhan i sandiri noma sipasangapon. Anggo di ari i patutoruon ni Tuhan noma sude sanga ise na markuaso, na ginjang roha dohot halak na gakgak.

JESAYA 10:4

Mate di bagasan porang sajo ma bagianmunu, sanga disarat-sarat songon halak na tartaban. Tapi laing na muruk dope Tuhan jana sai giot manguhumi.

JOB 13:16

Betak malua iba baenon ni habaranionniba, angke anggo parjahat nada puluk i mangadop tu Debata!

MASMUR 9:1

Sian sasude roha hudok tarimakasi tu Ho, Tuhan. Giot paboaonku ma angka pambaenanMu na pahomangkon roha.

MASMUR 71:21

Giot baenonMu dope au mur marsangap, jana diapoi Ho au mulak.

JESAYA 54:7

“Sangombas do Huhudukkon ho, tapi sian holong ni roha na gok mangulahi Hubuat ho.

JESAYA 54:9

“Di hatiha ni si Nuh marjanji do Au, na so bonomon ni aek na oto be tano on. Saonnari marjanji Au na so muruk be sanga mangondam hamu bagi hum sanoli pe.

JESAYA 61:10

“Jop ma rohangku hara ni Tuhan, hara ni Debata, tondingku marhamogaan. Songon pangoli di ari parbagasonna mamake pakean na sumurung jegesna, madung dipapakehon Tuhan tu au baju haluaan dohot hamonanganku.

JESAYA 64:5

Lomo do rohaMu mida halak na jujur jana na mangolu mangihutkon hagiotMu. Muruk Ho tu hami, hape laing hami pupu mardosai tutu pardosa do hami tu Ho sian na robi.

JESAYA 65:18

Marjop ni roha jana marmoga-moga ma hamu salolotna, hara ni sude na Hutompa i. TompaonKu ma Jerusalem na imbaru gok jop ni roha, jana na maringanan disi marjop ni roha.

JEREMIA 30:19

Pujion ni halak na disi ma Au marhite ende marsurak-surak ma halahi marriang-riang be. Martamba ma bahat ni halahi hara ni pasupasungKu marsangap ma halahi hara ni pangalehenKu.

ZAKARIA 8:11

Tapi anggo saonnari asing noma baenonKu tu angka jolma na mangolu dope sian bangso on sian na Hubaen na salpu i, ninna Tuhan Na Markuaso i.

ZAKARIA 8:19

“Gabe ari pesta na gok jop ni roha dohot hasonangan ma di halak Juda puaso na didalankon di bulan paopatkon, palimahon, papituhon dohot pasampuluhon. Haholongi hamu ma hatigoran dohot dame!”

NEHEMIA 8:10

Saonnari mulak ma hamu di bagasan jop ni roha. Lehen hamu ma deba sian sipanganon dohot anggurmunu tu angka halak na marhahurangan. Ari na marhapunjungan do ari on di Tuhanta, antong ulang hamu marsak. Hamogaan na nilehen ni Tuhanta di hamu, i ma na patogu rohamunu.”

JOB 11:16

Salangkan dangolmu nada be sai ingotonmu. Songon parsurut ni aek magodang, sian parningotan salpu.

MASMUR 85:4

Marpangulahi ma rohaMu mida hami, ale Debata sipalua hami, ulang be muruk Ho tu hami.

MASMUR 86:17

Patangkas ma hadenggananMu tu au, anso maila sanga ise na magigi mida au, muda diida halahi bahaso, Ho ale Tuhan, madung mangurupi dohot mangapoi au.

JESAYA 60:10

“Bangunon ni halak sileban ma tembokmu mangulahi, jana angka raja noma mangoloi ho disi. Najolo Huuhumi ho hara ni murukKu, tapi saonnari tumbuk do ho siiboan ni rohangKu.

JEREMIA 31:13

Manortori ma disi angka bujing-bujing marjop ni roha bage. Na matobang dohot na poso, rap marmoga-moga do, dibaen giot lehenonKu tu halahi apo-apo. Hupauba arsak ni halahi gabe moga, hasusaan Hugonti gabe tua.

ZAKARIA 1:16

Hara ni i songon on do hata ni Tuhan, “Madung marpangulahi rohangKu tu Jerusalem; angkon paulion muse BagasKu di tonga ni kota i, ninna Tuhan Na Markuaso, jana tarikon ma hotang pangukur humaliang Jerusalem.”