JESAYA 10:3 - BIBEL JAMITA NA DENGGAN

³ Aha ma na giot baenonmunu di ari panguhuman, jana hatiha hasesego na giot ro sian sihadaoan? Tu ise ma ho kehe mangido pangurupion? Di dia ma he tabunihononmunu hakayoonmunu i?

JESAYA 10:3 Referans Kwoze

LUKAS 19:44

Roncohonon ni halahi ma ho, songon i sude halak na adong di bagasan tembok ni kotami; nada dipadiar halahi umpe sada batu di ginjang ni donganna, hara ni na so diparrohahon ho sanga andigan Debata ro giot paluahon ho!”

HOSEA 9:7

Madung dapot ari panguhuman, hatiha pamaloson tu sandok parbuatan. Taonon ni Israel noma i! Didok hamu, “Na oto do panurirang on. Na rintik do jolma na nirajaan ni tondi on!” Didok hamu pe songon i hara ni gigina do rohamunu tu Au jana dosamunu santak godangna.

JOB 31:14

Muda nada songon i, bia ma hubaen mangadopi Debata? Aha ma alusniba muda ro Ia manguhumi iba?

1 PETRUS 2:12

Angkon denggan do pangalahomunu di tonga-tonga ni angka halak na so porsaya tu Kristus, jadi haru pe diincahi halahi hamu songon halak na jahat, gabe idaon ni halahi ma angka pambaenanmunu na denggan i, jana gabe pujion ni halahi ma Debata di haroro ni Debata tu portibi on.

ZEPANYA 1:18

Di ari na jorbut i pataridahonon ni Tuhan ma murukNa gabe nada tarbaen sere dohot perak ni halahi be paluahon halahi. Malala ma sude portibi on ditutung api ni hamuruhonNa i. Jadi ompot ma sintakkononNia sandok hosa na adong di tano on.

JESAYA 26:21

Na giot mijur ma Tuhan sian ingananNa di banua ginjang laho manguhumi pangisi ni tano on hara ni dosa ni halahi. PatorangonNa ma sude pamunuon na nibaen ni halahi di na buni. Nada tutup-tutupan ni tano i be angka na mate hona bunu i.

JESAYA 20:6

Dokkonon ni halak na mangingani topi laut na di Pilistin ma hatiha i, ‘Ligi pe da na masa i tu bangso na tapangasahon i laho mangondihon hita maradopkon raja ni Asur. Bia dope pambaenna malua hita on?’ ”

JESAYA 5:26

Baenon ni Tuhan ma sada tanda giot mamio bangso sian na dao. Mandosik ma Ia mamio halahi sian angka ujung ni tano on. Marroan ma halahi tibu jana hipas.

PODA 11:4

Nada mararti sinadongan hatiha mangadopi uhum hamatean; angke hasintongan paluahon halak sian hamatean.

PANGARATAION 28:49

Paroon ni Tuhan ma sada bangso na so mangarti ho hatana, sian ujung ni tano on laho mangalo ho. Songon rajawali do halahi manyoro ho.

JEREMIA 5:31

Angka panurirang manghatahon gabus jana angka malim mangajarkon hagiotna sambing. Jana i do na diparhagiot ni bangsongKu. Tapi muda ro ari parpudi, aha ma sibaenonmunu?”

JESAYA 39:3

Dung i ro ma Panurirang Jesaya mangadop tu Raja Hiskia lalu marsapa, “Isi ni dia dehe angka halak on? Aha didok halahi?” Dialusi si Hiskia ma, “Sian sihadaoan do halahi, sian Babel.”

JESAYA 33:14

Humitir hara ni biarna angka halak pardosa na di Sion. Didok halahi, “Adong dope he sian hita na tahan di bagasan api na mangabiskon on? Adong dope he na tarbaen manahan di api na manongtong i?”

JESAYA 30:16

Hape so ra hamu! Mur mambaen tahi do hamu laho maporus sian musumunu manengget kudo na hipas, marlojong do hamu tutu jana mago. Didok hamu muse do, “Giot tenggetonnami do kuda na gogo,” hape gumogo dope angka na mangkojar hamu.

JESAYA 5:14

Maradu ngangang ma pamangan ni rura hamatean laho mambondut angka halak na godang di Jerusalem rap dohot rayat na somal marpesta i.

2 RAJA-RAJA 7:15

Kehe ma halahi lalu tu Batang aek Jordan. Sapanjang dalan i diida halahi ma pakean dohot angka parkokas marsarsaran; na niparsampakkon ni halak Siria i do sudena i di na maporus halahi paluahon dirina. Mulak ma angka suruan i jana dipaboa halahi ma tu raja i.

PAMUNGKAAN 31:1

Tarbege ma tu si Jakob adong hata ni angka anak ni si Laban songon on, “Ma dibuat si Jakob sude sinadongan ni amanta i. Sude sinadongannia i, sian harto ni amanta do asal ni i.”

HOSEA 5:13

Torang do diboto bangso Israel dohot bangso Juda hajorbuton na masa di halahi, gabe kehe ma Israel tu Asur laho mangido bantuan sian raja bolon i. Hape nada haurupan raja i sanga tarpadenggan na masa tu halahi.

JESAYA 13:6

Mangandungi ma hamu, angke madung donok ari ni Tuhan i. Di ari i, paroon ni Tuhan Na Gumincat i ma hamagoan.

JESAYA 17:4

Didok Tuhan, “Muli dapot do i hatihana marujung bungaran ni Israel, jana hamoraonna i digonti dohot hapogoson.

JESAYA 26:14

Ma pola marmatean halahi, nada be i mangolu mangulahi, nada ngot be sumangotna i sanoli nari. Angke madung abis halahi dironcohon Ho jana sian parningotan pe disesa Ho.

JESAYA 29:6

paluaon ni Tuhan Na Markuaso i kota i marhite bade dohot lalo na gogo. ParoonNia halingsungsung dohot api na marjembur-jembur.

JESAYA 30:5

gabe hahaila noma i di bangso Juda hara ni na dung marpos ni roha halahi tu bangso na so tarpangasahon i. Nada pangurupion na dapot halahi, tapi tilako do.”

JESAYA 30:7

Parcuma do pangurupi ni Mesir. Hara ni i gabe Hubaen ma panggoar-goari ni Mesir, ‘Naga na so sihabiaran.’ ”

JEREMIA 4:30

O ale Jerusalem, madung maronco ho! Aha be gunana marbaju na saksak jana mamake barang sere dohot perak, dohot mangalapuhon colak di mata? Parcuma do dipajeges ho dirimu, angke nada tumbuk be ho di roha ni haholonganmu, mur halahi noma na giot mambuat hosamu.

JEREMIA 9:9

Patut ma he nada Hudabuhon uhum tu halak na songon i? Patut ma he nada baloskononKu i? Tu bangsongKi songon i ma didokkon Tuhan!”

JEREMIA 22:7

Giot tongosonKu halak mangaroncohonsa. Maroban pato ma halahi jana parunggalkononna ma angka tiangna na jeges-jeges i na nibaen sian hayu sampinur Libanon. Dung i sampakkonon ni halahi ma i tu api.

HOSEA 9:5

Di angka ari pesta ni ugamo, nada adong tarbaen hamu laho manghagodangkon ari i.

MIKA 7:4

Halak na umburju sian tonga-tonga ni halahi, i ma songon suan-suanan na marduri. Na umtigor sian tonga-tonga ni halahi songon pagar na marduri. Madung dapot hatiha di angka pamata-mataimunu dohot ari panguhumanmu. Saonnari angkon mulai ma hagaoron di tonga-tonga ni halahi!

JESAYA 28:20

Songon halak na modom di parate na hurang ginjang muda mamustang. Hurang bidang ulos i muda dipake margupgup.

AMOS 5:19

Tudos tu halak na marlojong sian singa do pangalahona, hape marsuo dohot gompul. Sanga songon halak na mulak tu bagasna, jana ditungkolkon tanganna tu tembok lalu diturbing ulok!