JEREMIA 6:16 - BIBEL JAMITA NA DENGGAN

¹⁶ Didok Tuhan ma tu bangsoNia, “Jongjong ma hamu di angka sirpang ni dalan, jana tangkas pamanat hamu! Sapai hamu ma angka dalan narobi, jana dia na dumenggan sian i. Ihutkon hamu ma dalan i, anso sonang hamu di ngolu on.” Hape didok halahi do, “Nada ra hami mangihutkon dalan i!”

JEREMIA 6:16 Referans Kwoze

JESAYA 30:21

Muda manyimbil hamu sian dalan, tarbege do i sian pudimunu soraNia na mandok, “On do dalan i; dalan on ma bolus hamu.”

JEREMIA 18:15

Hape madung dihalupahon bangso i anggo Au, jana manutung dupa halahi tu gana-ganaan. Tartuktuk halahi di dalan narobi na angkon siboluson ni halahi, gabe manyimbil tu dalan na so dipahornop.

PANGARATAION 32:7

Ingot ma ari na salpu, hatiha najoloan, barita di parningotan laing tarsimpan, sapai angka amantamunu, sude angka na masa na salpu, sapai ma angka hatobangonmunu, anso dipaboa tu hamu angka na masa na salpu.

JEREMIA 7:23

Anggo na Huparentahon tu halahi, hum pangoloion tu Au do anso Au gabe Debata ni halahi, jana halahi gabe bangsongKu. Husuru halahi anso mangolu mangihutkon angka na Huparentahon anso martua halahi.

KOLOSSE 2:6

Madung dijagit hamu Jesus Kristus gabe Tuhan. Hara ni i angkon sahangoluan ma hamu dohot Ia,

JESAYA 2:5

O ale hamu pomparan ni si Jakob, beta ma hita mardalan di bagasan sondang ni Tuhan!

JOHANNES 12:35

Dialusi Jesus ma, “Santongkin nari sajo noma hatiuran i di tonga-tongamunu. Jadi dalani hamu ma sidalananmunu salolot laing adong na torang i anso ulang ditutupi hagolapan i hamu. Sanga ise na mardalan di na golap nada diboto ia sanga na giot tu dia ia kehe.

JEREMIA 18:12

Tapi alusan ni halahi ma, ‘Aha guna ni i? Aha sundatna muda giot sai tongtong hami ihutkon hagiotnami na jahat i?’ ”

JEREMIA 22:21

Madung Hudok hata tu ho taran denggan dope pangalaho na masa tu hamu, hape nada ra hamu manangihon. Songon i hian do antong pangalahomu sian najolo lopus saonnari; nada jungada ra hamu mangoloi Au.

JEREMIA 44:16

“Nada ra hami manangihon sanga aha na nidokmu tu hami mangasahon goar ni Tuhan.

IBRANI 11:2

Hara ni na porsaya, gabe jop do roha ni Debata mida angka jolma narobi.

JOHANNES 13:17

Saonnari madung diboto hamu na songon i; jadi muda didalankon hamu songon i, martua situtu ma hamu.”

MALEAKI 4:4

Ingot hamu ma angka Tona na niajarkon ni naposongKu si Musa, ingot hamu ma angka aturan dohot angka parenta na Hulehen tusia di Dolok Sinai na gabe sioloan ni sandok halak Israel.

IBRANI 6:12

Nada por rohanami gabe losok hamu. Anggo giotnami, mangolu ma hamu songon halak na manjagit sanga aha na nijanjihon ni Debata hara ni haporsayaanmunu tuSia dohot hasobaranmunu paintehonsa.

JESAYA 8:20

Songon on ma dok alusna, “Tangihon ma ajaran ni Tuhan! Ulang patangi-tangi datu. Nada adong guna ni na nidok ni halahi di ho.”

LUKAS 16:29

Dung i dialusi si Abraham ma, ‘Na he adong do angka buku ni si Musa dohot na nidok ni angka panurirang, na tarsurat di buku i ma diihutkon halahi!’

JESAYA 28:12

Ditawarkon Ia do ari paradianan dohot jop ni roha tu hamu sude. Hape hamu do na so ra manangihon.

JOHANNES 5:39

Diparsiajari hamu do nian Buku Na Badia i angke dipikir hamu dapot hamu ma hangoluan na so mantak i muda dung diparsiajari hamu i. Jana Buku Na Badia i sandiri pe disaksihon i do taringot tu Au!

BAENON NI ANGKA RASUL 17:11

Umburju do roha ni halak Berea ulang pado halak na di Tessalonika. Jop do roha ni halahi umbege barita taringot tu Jesus, jana ganop ari do dipareso-reso halahi Buku Na Badia i laho patangkaskon sanga na tutu do na niajarkon ni si Paulus.

SURAT NI SI PAULUS TU PARLAGUTAN ROM 4:12

Dohot do ia gabe ompu ni angka na marsunat, i ma na so hum marsunat sajo, tapi na mardalan muse mangihutkon indege ni haporsayaan ni si Abraham, ompunta i, taran so marsunat dope ia.

JEREMIA 2:25

Ale Israel, tongtong ma ho marsipatu jana ulang padiar manguas ho hara ni na parayakkon debata na asing. Tapi nimmu do, ‘Nada! Nada tarbaen au mulak. Madung huhaholongi debata na asing jana i noma ihutkononku.’ ”

1 RAJA-RAJA 8:36

sai tangihon ma i di banua ginjang. Sai sesa ma angka dosa ni bangsoMu Israel dohot raja ni halahi. Ajari ma halahi mambaen na tigor. Dung i ale Tuhan paro ma udan di luatMon, luat na dung nilehenMu tu bangsoMu gabe teanan ni halahi ro di salolot ni lolotna.”

MASMUR 116:7

Sonang ma ho, ale rohangku, angke burju do Tuhan tu au.

JEREMIA 12:16

Muda ra halahi manjagit ugamo ni bangsongKu sian sandok roha ni halahi jana ra manyumpahon marhite na mandok, ‘Mangasahon Tuhan na mangolu i,’ – songon na niajaran ni halahi najolo bangsongKu marsumpa mangasahon Baal jadi gabe tarmasuk ma halahi gabe bangsongKu jana gabe maduma.

JEREMIA 31:21

Baen ma tanda ni dalan, jana baen ma parningotan jalahi ma dalan na nibolusmu hian. O ale Israel, mulak ma ho! Ulahi ma mangingani angka kotamu humani.

JEREMIA 42:3

Anggiat dipabotohon Tuhan, Debatamu dalan sidalanannami dohot bagi aha sibaenonnami.”

JEREMIA 50:5

Sapaan ni halahi ma dalan tu Sion, lalu mardalan ma halahi sabola tusi. Baenon ni halahi ma parjanjian na hot dohot Au jana nada langgaron ni halahi janji i.

HAKIM-HAKIM 2:17

Hape nada parduli halak Israel di angka pamimpin i. Nada setia halahi tu Tuhan, tapi marsomba do tu angka debata na asing. Nada diihutkon halahi tiruan na sian ompu na umpompar halahi na burju mangoloi tu angka parenta ni Tuhan.

2 JUJUR TAON 19:11

Tu Malim Godang Amarya hulehen do kuaso partimbo salaho tu sude parkaro na mardomu tu uhum ni Tuhan. Tu si Zebaya anak ni si Ismael, i ma gubernur ni Juda, hulehen kuaso partimbo salaho tu sandok parkaro na asing. Tanggung jawab ni angka halak Levi ma manjago anso didalankon angka haputusan ni pangadilan. Ihutkon hamu ma panogu-noguon na hudok on jana tegas ma tindakanmunu. Sai didongani Tuhan ma halak na tigor pambaenanna!”

JESAYA 46:9

Ingoti di bagasan rohamu sude na masa na salpu angka pangalaho na tarjadi najolo. Okui ma, na so adong Debata asing sian Au nada adong na sarupa dohot Au.

JESAYA 57:2

Jana masuk ma ia tu inganan na sonang; angka halak parroha na tigor dapotan paradianan do i di gincat ni podomanna.

JEREMIA 7:3

Songon on do hata ni Tuhan Na Markuaso i, Debata ni Israel, ‘Pauba ma pangalahomu dohot pambaenanmu anso ra Au maringanan di inganan on rap dohot hamu.’

JEREMIA 7:24

Hape nada ra halahi manangihon dohot mamparrohahonsa. Tubu-tubu ni roha ni halahi na pir boti na jat i sandiri do dipaihut-ihut halahi. Indada mur dumenggan halahi tapi mur tu jahatna noma.