JEREMIA 6:11 - BIBEL JAMITA NA DENGGAN

¹¹ HamumurukMu pe tu halahi manginona tu au do Tuhan, borat do laho manahansa. Dung i didok Tuhan ma, “Palalu ma hamumurukKi tu angka dakdanak di angka dalan godang dohot tu angka doli-doli na marlagut-lagut. Ripe-ripe halak angkon obanon ma tu habuangan, jana halak na dung matobang pe nada malua.

JEREMIA 6:11 Referans Kwoze

JEREMIA 20:9

Tapi muda hudok di bagasan rohangku “Halupahon ma Ia, nada ra be au mangkuling mangasahon goarNia,” jadi gabe songon api ma tonaMi manggara-gara di ate-atengki. Huuji do nian manahansa hape nada tolap iba.

JEREMIA 9:21

Ma pola masuk hamatean sian jandela, madung manyaroso tu bagasan bagas godang; disaroso angka dakdanak di angka dalan songon i muse angka na poso di alaman.

MIKA 3:8

Tapi anggo taringot tu diringku, na dung digohi Tuhan do au dohot tondiNa bope dohot kuasoNia. Dilehen Ia do di au parbinotoan taringot tu hatigoran, jana dilehen Ia do di au habaranion laho patangkaskon tu halak Israel angka dosa na nibaen ni halahi.

HALUMBAAN 16:1

Dung i hubege ma sada sora na gogo sian Bagas Na Badia i. Didok sora i ma tu surusuruan na pitu i, “Kehe ma hamu, duruskon hamu ma haririmas ni Debata isi ni sambong na pitu i tu tano!”

BAENON NI ANGKA RASUL 18:5

Dung lalu si Silas dohot si Timoteus tu Makedonia, tu halak Jahudi ma sude diabiskon ia ari-arinia laho mamaritahon jamita na sian Debata tu halahi, paboahon bahaso Jesus do Kristus i.

BAENON NI ANGKA RASUL 17:16

Di na painte-intehon si Silas dohot si Timoteus si Paulus di Atena, marsak ma rohania mida kota i hara ni gokna disi angka gana-ganaan.

BAENON NI ANGKA RASUL 4:20

Harana nada tarhasipkon hami taringot tu angka na dung hami ida dohot na hami bege sandiri.”

LUKAS 17:34

Hudok ma di hamu: Di bornginna i, sian dua halak na sapodoman, sada ma i dioban jana sahalak nari ditadingkon.

JEHESKIEL 9:6

Bunu hamu ma sude halaklahi dohot dadaboru, na matobang dohot na poso, na marsaripe dohot dakdanak. Tapi ulang hahua hamu anggo na mamake tanda di bohina. Jadi pungka hamu ma sian on, sian inganan na badiangKu.” Jadi dipungka halahi ma karejo i, dibunu halahi ma angka pamimpin ni Israel na topet marjongjongan di Bagas Na Badia i.

JEHESKIEL 3:14

Sun ma gogona didapotkon kuaso ni Tuhan i au jana taran na diangkatNa i au lalu dioban tondiNa i, paet jana milas ma huhilala ate-atengku.

JEREMIA 18:21

Hara ni i, padiar ma mate tangkuraparon angka dakdanak ni halahi sanga mate dipangan podang. Padiar ma angka dadaboru ni halahi agoan halaklahi dohot dakdanakna; padiar ma marmatean angka halaklahi baenon ni nyae masa jana angka doli-dolina marmatean di parporangan.

JEREMIA 7:20

Au Tuhan Debata, padondonkononKu ma murukKu na jorbut i tu bagas paribadatan on, tu jolma dohot tu binatang dohot tu suan-suanan dohot tu suha ni tano. Marjimbur-jimbur ma murukKu songon api na so haintopan.”

JESAYA 40:30

Salang dakdanak na bajar gale-gale, jana halak na poso tinggang hara ni na loja.

JEREMIA 15:6

Madung ditulak jana ditadingkon hamu Au, hara ni i Huondamkon botohonKu laho mangabisi hamu. Ma pola loja Au mangorom muruk ni rohangKu.

JEREMIA 15:17

Sai giot oloanku do Ho, jadi hara ni i nada hupasayang hatihangku dohot-dohotan martata-tata jana margonjak-gonjak rap dohot angka jolma, tapi mamunjung do au mardongan pangkilalaan na muruk.

ANDUNG 1:15

Layas do sude diida Tuhan ulu balangku na garang i. Ditongos Ia tentara anso mate sude sian au doli-doli. Dipisat Tuhan do bangsongku lopus maropuk, songon pambaen ni halak na mamoro anggur.

ANDUNG 2:21

Na poso dohot na matobang marragean di dalan, na poso-nauli bulung marmatean dibaen podang. Dibuat Ho do hosa ni halahi taran na muruk Ho, disamboli Ho do halahi nada adong ibo.

JEHESKIEL 3:3

Didok Ia ma, “Ale jolma parsantongkinan, pangan ma i! Pamasuk ma balunan ni karotes on tu butuhamu.” Jadi hupangan ma karotes i jana tonggi do daina songon aer ni loba.

JEHESKIEL 24:21

Dokkon ma tu halak Israel; songon on do didok Tuhan Debata satutu-tutuna pahodaronKu ma inganan parbadiaanKu, kuaso na dipangasahonmu, hasonangon ni matamu dohot rohamu; dohot anakmu halaklahi dohot dadaboru na nitinggalkonmu angkon mate rumpak dibaen podang.

JEREMIA 5:9

Nada he patutna ma angkon uhumanKu halahi jana baloskonon sandok na nibaen ni halahi?

JEREMIA 9:20

Hudok ma, “Tangihon ma angka hata ni Tuhan, o hamu angka dadaboru sudena! Ajarkon ma tu angka dakdanakmu ende andung, tu angka donganmu ende ni siluluton.