JEREMIA 49:3 - BIBEL JAMITA NA DENGGAN

³ Hamu ale halak Hesbon, tangis ma hamu dibaen madung maronco kota Ai! Hamu angka dadaboru na sian kota Raba, mangandungi ma hamu! Marabit goni ma hamu tanda ni siluluton. Marlojongi ma hamu pahae-pahulu gok ponjot ni roha. Obanon noma Milkom debatamunu i tu habuangan rap dohot angka malim dohot angka pamimpinna.

JEREMIA 49:3 Referans Kwoze

JEREMIA 48:7

Moab! Dipangasahon ho ma hagogoan dohot sinadonganmu. Hape anggo saonnari taluhonon noma ho. Obanon ma tu habuangan i ma Kamos debatami rap dohot angka malimna maradu angka na mora-mora.

JEREMIA 48:37

Madung dicukur halahi sudena obuk na di ulu ni halahi dohot janggutna, tanganna dihoroti, jana mamake abit goni tanda ni arsakna.

JESAYA 15:2

Manangkok ma tu dolok halak Dibon laho mangandungi di inganan pamelean ni angka debata. Di bagasan hancit ni roha andungan ni halak na di Moab ma kota Nebo dohot Medeba. Marcukur ulu ma halahi dohot janggut tanda ni na marhabot ni roha.

JEREMIA 46:25

Didok Tuhan Na Markuaso i, Debata ni Israel, “Uhumanku ma Amon, debata na sian Tebe, rap dohot Mesir sudena maradu angka debatana dohot raja-rajana. Raja ni Mesir dohot sude na mangasahon ia

JEREMIA 4:8

Antong hara ni i, tangis jana mangandungi ma hamu, pake hamu ma abit goni tanda ni arsakmunu. Angke nada sumurut dope sian Juda muruk ni Tuhan na marnyala-nyala.

2 RAJA-RAJA 23:13

Songon i muse angka langgatan na di Habincaran ni Jerusalem, di Selatan ni Dolok Hajahatan, dipahodar; Raja Salomo do na pajongjongkon angka langgatan i laho marsomba tu angka debata sihagigian, i ma Astoret debata boru-boru ni halak Sidon, Kamos debata ni halak Moab dohot Milkom debata ni halak Amon.

1 RAJA-RAJA 11:33

Giot songon i ma baenonKu hara ni na nitadingkon ni si Salomo Au jana marsomba ia tu angka debata: I ma Astoret, debata boru-boru na sian Sidon; Kamos, debata ni Moab, dohot Milkom, debata ni Amon. Madung mardosa si Salomo jana dilaosi ia angka na Huparentahon. Anggo amangnia si Daud diihutkon do angka tona dohot parentangKu, hape anggo si Salomo, nada.

1 RAJA-RAJA 11:5

Disomba si Salomo do Astoret, dewi ni bangso Sidon, dohot muse Molok, debata na nihagigihon i na nisomba ni bangso Amon.

JAKOBUS 5:1

Hamu angka halak na mora! Tangihon hamu ma sipaingotkon. Tangis ma hamu jana mangandungi, harana manaon parkancitan ma hamu!

ZEPANYA 1:5

Ias haisonKu sude sanga ise na manaek tu tarup laho manyomba mataniari, bulan dohot angka bintang. AbiskononKu muse dope halahi na manyomba Au jana na marsumpa mandok setia tu Au, hape marsumpa muse halahi mangasahon goar ni Debata Milkom.

AMOS 1:15

Obanon ma raja ni halahi dohot angka pamimpinna na asing i tu habuangan, ninna Tuhan.”

JEREMIA 51:8

Tompu ma madabu Babel lalu sarge. Tangisi hamu ma i, jana jalahi hamu ma ubat tu angka gasana i, betak na ra dope malum.

JEREMIA 49:1

On ma na nidok ni Tuhan taringot tu Amon, “Biasi tano ni Marga Gad dirampas jana diingani angka jolma na mamele Debata Milkom? Adong he ulaning na soada be halak Israel na margogo laho mangondihon luat i?

JEREMIA 48:20

Alusan ni halahi ma, ‘Madung madabu Moab jana gabe marlayas, hara ni i tangisi hamu ma da ia. Pabotohon ma sapanjang Batang aek Arnon paboa na dung maropuk Moab.’ ”

JEREMIA 48:2

dibaen madung mago na nihagodanghon ni Moab. Madung ditaluhon musu i Hesbon jana disangkapkon do laho mangabiskon sandok bangso Moab. Di kota Madmen nada adong be habegean sora ni halak na manghatai, dibaen madung diporangi tentara kota i.

JEREMIA 6:26

Didok Tuhan ma tu bangsoNia, “Pake hamu ma abit goni jana margiling-giling ma hamu di abuan i. Marsiluluton jana mangandungi ma hamu di bagasan pangkilalaan na dangol songon halak na mangandungi anakna sisada-sada na mate, angke ompot noma hamu roroon ni hamamago.”

JESAYA 23:6

Mangandungi ma hamu panduduk ni Penisia, kehe ma hamu monjap tu Spanyol.

JESAYA 23:1

On ma alatan taringot tu Tirus: Mangandungi ma hamu, ale angka parlaut ni Tirus na mamolusi laut bidang jana na topet marlayar sian Siprus! Harana madung dironcohon Tirus, kota labuanmunu i; angka bagas dohot labuanmunu i madung gabe tinggal na sego.

JESAYA 16:7

Mangandungi ma Moab hara ni pardangolanna. Martangisan ma halahi sude muda taringot tu sipanganon na tabo na somal dipangan halahi di kota Kir-Hareset. Mandele ma halahi jana humolos.

JESAYA 14:31

Martangisan ma hamu, jana marsurahi mangido tolong, hamu ale angka kota ni Pilistin! Humitir ma hamu sugari nian mabiar! Marbual-bual do abuan sian Utara tanda ni haroro ni tentara na garang-garang; nada adong sahalak pe sian halahi parbiar.

JESAYA 13:6

Mangandungi ma hamu, angke madung donok ari ni Tuhan i. Di ari i, paroon ni Tuhan Na Gumincat i ma hamagoan.

JOSUA 8:28

Disurbu si Josua ma Ai, bulus dipadiar ia gabe lobu. Lopus saonnari laing tong do songon i parhutaan i.

JOSUA 7:2

Na disuru si Josua do di hatiha i piga-piga halak sian Jeriko tu Ai, i ma sada kota di Habincaran ni Betel, na di lambung ni Bet-Awen. Na disuru do halahi kehe laho manangkasi luat i. Dung sidung dipadalan halahi karejo i,

JOSUA 8:1

Didok Tuhan ma tu si Josua, “Kehe ma ho dohot sude tentarami tu Ai. Ulang gamang hamu jana ulang mabiar! Giot baenonKu do ho monang maralohon raja ni Ai, kotana dohot luatna i gabe ho nampunasa.

2 SAMUEL 11:1

Somalna sai di musim bunga do angka raja kehe marporang. Jadi dung salpu taon baru di taon i disuru si Daud ma si Joab kehe mamorangi rap dohot angka donganna parpangkat dohot sude tentara ni Israel i; dung i ditaluhon halahi ma halak Amon jana dihobuk halahi ma kota Raba. Tapi anggo si Daud, tinggal do di Jerusalem.