JEREMIA 43:12 - BIBEL JAMITA NA DENGGAN

¹² Pagaraonnia ma api di angka inganan pamelean ni debata ni Mesir, jana tutungan ni raja ni Babel ma angka patung na di inganan pamelean i sanga obanonna tu kotana. Songon parmahan na paiaskon pakeanna sian tusa, songon i muse ma ias ni Mesir sapuon ni raja ni Babel, lalu kehe ma ia mulak maroban hamonangan.

JEREMIA 43:12 Referans Kwoze

JEHESKIEL 30:13

Didok Tuhan Debata i ma, “Giot ropukanKu angka gana-ganaan dohot angka debata na di Mempis. Nada adong be tu joloan on raja di Mesir. Mabiar baenonKu sude halak na maringanan disi.

JESAYA 49:18

Ligi ma humaliang ho, uji ma manatap, marlagut do bangsomi manghuliangi ho. Hara ni Au, Debata Na Mangolu, Au mandok, satutuna do, pakeonmu ma sude halahi gabe parhiasan jana lilitkononmu ma halahi, songon na nibaen ni dadaboru na baru marbagas.

JESAYA 19:1

On ma tona salaho tu Mesir. Ro do Tuhan tu Mesir manengget ombun na hipas. Humitir ma angka gana-ganaan ni Mesir di joloNia jana menek ma roha ni halak Mesir marnidasa.

JEREMIA 48:7

Moab! Dipangasahon ho ma hagogoan dohot sinadonganmu. Hape anggo saonnari taluhonon noma ho. Obanon ma tu habuangan i ma Kamos debatami rap dohot angka malimna maradu angka na mora-mora.

JEREMIA 46:25

Didok Tuhan Na Markuaso i, Debata ni Israel, “Uhumanku ma Amon, debata na sian Tebe, rap dohot Mesir sudena maradu angka debatana dohot raja-rajana. Raja ni Mesir dohot sude na mangasahon ia

MASMUR 104:2

maruloskon sinondang na torang do Ho. Dipahembang Ho do langit songon undung-undung,

JOB 40:10

Pajeges ma dirimu mamake hagodangan dohot hajagaron, jana pake ma hatongaman dohot hamuliaan.

ESTER 6:9

Adong ma sada halak na marsangap di negara on na sian golongan ni raja-raja papakehon i tu halakna na giot pasangapon ni raja i, lalu diudurkon ma antong bayo i manengget kudo ni raja i mamolus di tano lapang ni kota on. Mardalan ma di jolo halak na sangap i manggora-gora, ‘Songon on ma da pangalehen ni raja mangargahon halak na niparsangapannia!’ ”

2 SAMUEL 5:21

Marlojongi ma tentara ni Pilistin i nada sanga be taroban halahi angka patung si sombaon ni halahi. Dipamuai si Daud dohot parangannia i ma patung i.

HARURUAR 12:12

Di borngin i bolusanKu ma sude tano Mesir, jana bunuonKu ma sude anak halaklahi siangkaan, bope di jolma bope di pahan-pahanan. UhumanKu ma sude sombaon na di Mesir, angke Au do Tuhan.

KOLOSSE 3:14

Jana na umporlu: Angkon marsihaholongan do hamu sama hamu, angke holong i do na pasadahon hamu sudena gabe sanggam.

KOLOSSE 3:12

Antong hamu angka na dung dipuldit ni Debata, na diparbadia i jana na dihaholonginNia, pake hamu ma ibo ni roha, habasaron, toruk ni roha, lambok ni roha dohot hapohomon.

EPESUS 6:11

Pake hamu ma sude sinjata na nilehen ni Debata tu hamu, anso tarbaen hamu martahan mangalo angka dalan na buni na sian Sibolis i.

EPESUS 4:24

Sugari nian angkon marbako na imbaru ma ngolumunu na nitompa mangihutkon rupa ni Debata; i ma bako na sintong, na tigor dohot na badia.

SURAT NI SI PAULUS TU PARLAGUTAN ROM 13:12

Salpu ne ma borngin; jana torang ma ari santongkin nari. Antong, taantak ma angka pangalaho na golap. Tapasingkop ma dirinta dohot sinjata na torang.

ZEPANYA 2:11

Mabiar ma halahi baenon ni Tuhan. PatoruhonNia ma sahala ni angka debata na di tano on lopus nada adong be arga ni i sude. Jadi gabe marsomba tu Tuhan noma sandok bangso, di tanona sandiri be.

JEREMIA 51:44

Bel, debata ni tano Babel, giot uhumonKu. Giot baenonKu paulahonnia sanga aha na nirampasnia. Nada be sombaon ni angka bangso ia. Madung marumpak angka tembok ni Babel.

JEREMIA 50:2

“Paboa ma barita tu angka bangso! Pasar ma barita i. Baen ma tanda anso sar barita i. Ulang tabuni-tabunihon barita i. Madung hona taban Babel! Madung maila Debata Bel, madung tarsonggot Marduk! Madung maila angka gana-ganaan i.

JESAYA 61:10

“Jop ma rohangku hara ni Tuhan, hara ni Debata, tondingku marhamogaan. Songon pangoli di ari parbagasonna mamake pakean na sumurung jegesna, madung dipapakehon Tuhan tu au baju haluaan dohot hamonanganku.

JESAYA 61:5

Ale bangsongKu, halak na asing noma marmahani pahan-pahananmu dohot mangkarejohon ladang maradu kobun anggurmu.

JESAYA 59:17

PakeonNia ma hatigoran songon baju bosi jana hamonangan songon kupia baja. Dipasada Ia rohaNia laho manyalosehon na masa i jana baloskononNia hajahatan na niae ni jolma.

JESAYA 52:1

Jonggor ma, jonggor ma! Pake ma gogomu songon pakean ale Sion, pake ma pakean hamuliaonmi, ale Jerusalem kota na badia! Harana umpe sahalak na so disunat sanga na hodar nangkon masuk be tu ho.

JESAYA 46:1

Debata Bel dipatunduk, Debata Nebo dirumpakkon, patung-patungna i madung dioban di gincat ni pahan-pahanan; na unjung dipaudur-udur hamu saonnari dibaen muatan, gabe boban ni binatang na loja.

JESAYA 21:9

Ligi, indu ma halahi! Parangan na markudo ro mardua-dua. Dung i ro ma panjago i paboahon, “Madung madabu Babel! Madung marragean angka patung na nisomba ni halahi i di tano.”

MASMUR 132:18

Sai na marhasonangan do harajaanna, tapi anggo musuna sai marhahaila.”

MASMUR 132:16

PasupasuonKu angka malimnia di sude ragam ni karejona, marendei jana marmoga-moga ma bangsonia.

JESAYA 46:2

Patung na nisombaan nada margogo palua dirina, sude hona taban jana dioban.

JEREMIA 43:13

Roncohononnia ma angka tugu ni gana-ganaan na di Heliopolis di Mesir, jana angka inganan pamelean ni angka debata ni Mesir abis ma tutunganna.”

JEREMIA 49:27

Husurbu angka tembok ni Damaskus jana angka bagas godang ni Raja Benhadad Hubaen gabe tiranggong. Au Tuhan Na Markuaso, mandok songon i.”

JEHESKIEL 29:11

Nada adong jolma dohot binatang mamolussa. Opat pulu taon honokna nada adong jolma na maringanan disi.

DANIEL 11:8

Di na laho mulak ia tu Mesir, obanonnia ma patung ni debata ni musuna i dohot barang-barang sere dohot perak na dung dihaulkon tu debatana i. Nada porangonnia be raja ni Siria piga-piga taon.

JEREMIA 10:11

Hamu ale angka bangso, angkon paboaonmunu do tu halahi, sisegohonon do angka debata na so manompa langit dohot tano. Mago do halahi sian portibi on.)

JEREMIA 10:15

Nada mararga angka gana-ganaan i, sipalayason jana sipabileon do i. Di hadudumpang ni hatihana mago ma halahi sudena.

JEREMIA 25:19

Angka on ma goar-goar ni halak na deba nari na angkon minum sian piala ni anggur ni Tuhan i: raja ni Mesir rap dohot angka pagawe maradu angka pamimpinna; sude halak Mesir dohot halak sileban na adong di Mesir; sude raja na di tano Us; sude raja ni angka kota Pilistin di Askelon, Gasa, Ekron; sude halak na laing mangolu di Asdod; sude halak Edom, Moab dohot Amon; sude raja na di Tirus dohot Sidon; sude raja na di topi ni Laut Tonga; angka kota Dedan, Tema dohot Bus; sude halak na marpangkas pendek; sude raja ni Arab; sude raja ni angka marga na di padang halongonan; sude raja na di Zimri, Elam dohot Madai; sude raja na di Utara, na dao dohot na donok, pasada-sada. Sandok bangso na satano on angkon inumonna anggur i. Jana na parpudi situtu manginum anggur i, i ma raja ni Babel.

JEHESKIEL 29:19

Hara ni i, Au Tuhan Debata mandok: LehenonKu ma tano Mesir tu Raja Nebukadnesar. Samunon jana rampasonnia ma lalu obanonna sude sinadongan ni Mesir baen upa ni tentarania i.