JEREMIA 29:21 - BIBEL JAMITA NA DENGGAN

²¹ Madung didok Tuhan Na Markuaso i Debata ni Israel taringot tu si Ahab anak ni si Kolaya, dohot taringot tu si Zedekia anak ni si Maaseya na mamake goar ni Tuhan laho palaluhon tu hamu angka pangalaho na so tutu. Didok Tuhan do na giot pasahatonNia halahi tu toru ni kuaso ni si Nebukadnesar raja ni Babel, na giot mamunu halahi di jolo ni matamunu.

JEREMIA 29:21 Referans Kwoze

ANDUNG 2:14

Na niturihon ni angka panurirang tu ho, hum gabus do i jana buras sajo. Paoto-oto hamu do angka hata ni halahi, nada jungada dipatorang halahi dosamunu i, gabe nada dipauba hamu rohamunu. Didokkoni halahi do angka hata gabus na paliluhon hamunu.

2 PETRUS 2:1

Najolo di tonga-tonga ni bangso ni Debata, ro do angka panurirang pargabus. Laing songon i muse do di tonga-tongamunu, marroan ma angka guru pargabus. Baritahonon ni halahi ma angka pangajaran na so tutu, na pasegohon. Jana diporso halahi do Parkuaso na dung marhancit laho paluahon halahi. Jadi na mangalap magona do halahi disi, na tibu mandondoni halahi sandiri.

JEREMIA 20:4

Tuhan sandiri mandok, ‘BaenonKu ma ho gaor di bagasan dirimu sandiri dohot di angka donganmu. Idaon ni matamu ma halahi bunuon ni musu ni halahi. PadiaronKu ma sude halak Juda patunduhon ni Babel; haldungonna deba sian halahi gabe taban tu Babel jana tebana i mate niuhuman.

JEREMIA 20:6

Jana ho ale Pashur rap dohot isi ni bagasmu laing tangkuponna ma ho jana obanonna tu Babel. Disi ma ho mate jana ditanom; laing songon i ma sude donganmu na manangihon angka gabus na nipardokkonanmi.’ ”

JEREMIA 29:15

Mangihutkon pandokmunu, madung dilehen Tuhan tu hamu angka panurirang di Babel.

JEREMIA 23:14

Tapi madung Huida jumahat dope pangalaho ni angka panurirang di Jerusalem. Margabusi do halahi dohot marmainan jana diurupi halahi do halak na jahat, gabe umpe adong sahalak pe na ra pauba rohana. Anggo di Au mandosdos do halahi sudena rap parjahat songon halak Sodom dohot Gomora.”