JEREMIA 22:3 - BIBEL JAMITA NA DENGGAN

³ “Tigor jana jujur ma pambaenanmunu! Palua ma halak na hona incop sian tangan ni halak na mangincopsa. Ulang ma manjahati sanga manyosak hamu tu halak na leban, dakdanak na so marama so marina, sanga na mabalu. Ulang ma bunu hamu halak na so marsala di inganan on, ninna Tuhan.

JEREMIA 22:3 Referans Kwoze

MIKA 6:8

Nada! Madung dipaboa Tuhan tu hita sanga aha na denggan. Anggo na nipangido ni rohaNia sian hita, i ma anso tigor pambaenanta, tadalankon ma holong ni roha, jana mangoku di bagasan toruk ni roha di jolo ni Debatanta.

JEREMIA 22:17

Hape asing do anggo ho; hum untungmu sajo do na nijalahanmu. Dibunu ho do halak na so marsala, jana kejam do dibaen ho mamisat rayatmu.

JAKOBUS 1:27

Haburjuon marugamo na ias jana na so martihas diadopan ni Debata Amanta, on do: Manyarihon na so marama so marina dohot angka na mabalu na mardangol; dohot na manjagohon dirina sandiri anso ulang sego dibaen portibi on.

JEHESKIEL 22:7

Sahalak pe so adong halak na mangingani ho na pasangapkon simatobangna. Dikicu ho do halak jana dihaut ho untung sian hasusaan ni na mabalu dohot na so marama so marina.

MALEAKI 3:5

“Ro ma Au mandapotkon hamu laho manguhumi hamu. Manigor lehenonKu ma hasaksian mangalo angka pangajii, angka jolma panggampang na manyaksihon gabus, na mamogo upa ni halak pangomo, na manyosak angka na mabalu, na so marama so marina dohot halak sileban. Mangkuling ma Au laho mangalo sude halak na so pasangapkon Au, ninna Tuhan Na Markuaso i.”

JOEL 3:19

Anggo Mesir gabe halongonan na harsang, jana Edom gabe tano na harsang na so hainganan jolma. Angke diporangi halahi do tano Juda, jana dibunu halak na disi do na so marsala.

JEREMIA 9:24

Sanga ise na giot manggodang hara ni bagi aha, manggodang ma hara ni na nitandana Au; jana diboto angka sangkapKu. Dibotosa do na so marujung holong ni rohangKu jana bonar boti tigor pambaenanKu. Sudena do i pajop rohangKu. Au do Tuhan na mandok i sudena.”

JEREMIA 5:28

boti mamokmok be jana maduma. Nada marbolat hajahatan ni halahi. Disoadahon halahi do hak ni na so marama so marina, jana nada diondihon halahi angka halak na hona sosak.

JESAYA 1:23

Angka pamimpinmu halak na sai mangalo do jana kaki tangan ni panangko; sai dihagioti halahi do manjagit silua dohot suap. Nada unjung halahi ra mangondihon na so marama so marina di pangadilan; nada diampirkon halahi angka na mabalu na mangaduhon parkarona.

PODA 23:10

Sanga na bia pe, ulang nipaimbar parbalohan ni tano sanga nibuat tano ni na so marama so marina.

MASMUR 68:5

Debata na maringanan di ingananNia na badia, i ma da Ama ni na so marama jana Pangondian ni angka na mabalu.

2 RAJA-RAJA 24:4

lumobi ma i hara ni pamunuon na nibaennia maradopkon angka halak na so marsala, inda ra Tuhan manyesa dosa ni Manase hara ni angka pambaenanna.

PANGARATAION 24:7

Muda adong sada halak na manangko sanga ise dongan sabangsona, lalu dibaen ia gabe hatobanna sanga digadis ia songon hatoban, angkon mate niuhuman do sitangko jolma i. Songon i ma dalanna baenonmunu laho mangagohon hajahatan i sian tonga-tongamunu.

JEREMIA 26:16

Jadi gabe didok angka pamimpin dohot rayat i ma tu angka malim, dohot angka panurirang i, “Mangasahon goar ni Tuhan Debatanta do bayo on mangkatai; nada patut ia mate niuhuman.”

MASMUR 94:21

Marsatahi halahi mangalo halak na jujur, jana mandabu uhuman mate tu halak na so marsala.

MASMUR 94:6

Dibunu halahi do ina na mabalu dohot na so marama so marina dohot halak na asing na maringanan di luat on.

JOB 24:9

Diparhatoban halak na jahat ma dakdanak na so marama so marina, jana dibuatsa ma anak ni halak na pogos baen garar ni utangna.

JOB 22:9

Nada diurupi ho angka na mabalu, salangkan na tinggal menek pe laing diparhanciti ho.

2 SAMUEL 23:3

Madung mangkuling Debata ni Israel; didok pangondian ni Israel do tu au: “Muda sahalak jolma mamarenta rayatna mardongan hatigoran na mamimpin mardongan pangoloion tu Tuhan.

PANGARATAION 27:19

‘Bura ni Debata ma di halak na mangarampas hak ni halak sileban, dakdanak na so marama so marina dohot na mabalu.’ Dung i sude ma bangso i mandok: ‘I ma tutu!’

PANGARATAION 25:1

Adong ma umpamana dua halak Israel na kehe tu pangadilan laho pauruskon sada parsalisian, gabe didok ma na so marsala na sada jana na sada nari i marsala.

PANGARATAION 10:18

Dibela Ia do hak ni na tinggal menek dohot na mabalu, anso dibaen tu halahi uhum na tigor; dihaholongi Ia do halak na asing na tinggal rap dohot hita jana dilehen Ia pakean dohot sipanganon di halahi.

HAMALIMON 19:15

Angkon tigor jana bonar do ho mandabu uhum di parkaro, ulang ampini na miskin di na so dalanna jana ulang mabiar ho mida halak na mora.

MIKA 3:11

Anso dapotan hepeng sogok do umbaen na mamarenta angka parkuaso ni kota, angka malim mangajarkon Uhum Ni Tuhan anso dapotan gaji, marjamita angka panurirang anso dapotan hepeng – dung i diambang halahi ma di pihak ni halahi Tuhan i. Didok halahi ma, “Di tonga-tonganta do Tuhan; nada pola ro parmaraan tu hita.”

HARURUAR 22:22

Ulang nibaen roha-roha tu na mabalu sanga tu na tinggal menek.

MATEUS 23:23

Marjaya ma hamu angka Siboto Surat dohot angka Parise! Pangalancap do hamu! Dilehen hamu do parpuluan ni pulungan ni bulung-bulung ni parmasak dohot silalat dohot jintan tu Tuhan. Hape anggo angka pangalaho na ummarga sian angka tona i, umpamana rupani: Hatigoran, asi ni roha, haburjuon, nada diterge hamu be. Angkon i do nian parjolo baenonmunu so pola mangkalupahon na asing-asing i muse.

HARURUAR 22:21

Ulang niparkancitan sanga nisosak halak na asing; ingot hamu ma, hamu pe halak na asing do najolo di Mesir.

JESAYA 58:6

Songon on do puaso na Huhagioti: Harkari hamu ma rante ni hajahatan dohot tali ni angka auga, jana palua hamu angka halak na niparkancitan ponggolkon hamu ma sude auga.

JESAYA 58:7

Bagi hamu ma panganonmunu tu halak na malean jana jagit hamu ma masuk tu bagasmu angka halak na mompas-ompas. Muda diida hamu halak na marsaemara lehen hamu pakean tu halahi, jana ulang tulak hamu sisolkotmu na manghaporluhon pangurupionmu.

JEREMIA 7:23

Anggo na Huparentahon tu halahi, hum pangoloion tu Au do anso Au gabe Debata ni halahi, jana halahi gabe bangsongKu. Husuru halahi anso mangolu mangihutkon angka na Huparentahon anso martua halahi.

JEREMIA 19:4

Angke madung ditadingkon halahi Au, madung dilehen halahi inganan on tu debata na asing, jana madung manghaulkon haul situtungon halahi tu debata na asing i. Na so tinanda ni ompu ni halahi dohot angka raja ni Juda. Madung dihodari halahi muse inganan on marhite mudar ni halak na so marsala.

ANDUNG 3:36

diboto Tuhan do i jana diparrohahon.

JEHESKIEL 18:12

Giotnia ma mangicu halak na pogos, manangko, mambuat barang jaminan ni halak na marutang tusia. Kehe ia tu angka bagas pamelean ni halak na so mananda Tuhan jana disomba ia gana-ganaan sihagigian.

JEHESKIEL 45:9

Didok Tuhan Debata i ma, “Tuk ma da angka dosamunu i, ale angka parkuaso ni Israel! Antak hamu ma na mambaen roha-rohamunu i dohot na mamisat rayat i. Baen hamu ma na tigor dohot na sintong. Na so jadi usironmunu be bangsongKu sian tano ni halahi. Au, Tuhan Debata do mamarentahon i tu hamu.

AMOS 5:24

Dumenggan do usahohon hamu anso mardalan hatigoran songon aek, jana hajujuron songon batang aek na tongtong mardalan.

PANGARATAION 24:17

Ulang rampas hamu hak ni halak sileban dohot dakdanak na so marama, jana ulang buat hamu gabe jaminan pakean ni sada halak na mabalu hara ni na manginjam bagi aha ia.

MASMUR 82:4

Palua ma halak na gale dohot na so margeldok, palua ma halahi sian tangan ni halak parjahat.

JEHESKIEL 18:7

Nada jungada ia mangicu sanga manangko. Angka barang jaminan ni utang ni halak tusia sai dipaulak ia do. Halak na malean dilehen ia do mangan jana halak na so marpakean, dilehen ia do parabiton.

AMOS 5:15

Hagigihon hamu ma na jahat, haholongi hamu ma na denggan, jana hajongjongkon hamu ma na tigor. Betak na ibo do roha ni Tuhan di angka jolma na teba i sian pomparan ni si Josep.