JEREMIA 22:20 - BIBEL JAMITA NA DENGGAN

²⁰ “Manangkok ma hamu tu Dolok Libanon dohot tu Basan jana marsurak ma hamu disi. Surakkon hamu ma sian partoran Abarim na dung ditaluhon sude donganmunu.

JEREMIA 22:20 Referans Kwoze

BILANGAN 27:12

Didok Tuhan ma tu si Musa, “Manangkok ma ho tu Dolok Abarim, sian i ma tatap luat na giot lehenonKi di halak Israel.

JEHESKIEL 23:22

Didok Tuhan Debata i ma, “Ale Oholiba, madung magigi ho di angka haholongan ni rohami, tapi jajangonKu ma halahi anso muruk tu ho jana hobuhonna ho.

ANDUNG 1:2

Tumatangis do ia dangol sasaborngin ramram ilu-ilu di hurumna i. Sahalak pe nada adong sian haholongan ni rohana na ra mangapoi ia. Dihianati angka donganna ia na marbalik gabe alona.

JEHESKIEL 23:9

Jadi gabe Hupasahat ma ia tu angka haholongan ni rohania i, tu angka halak Asur na sai dihalungunkon ni rohania i.

ANDUNG 1:19

Hupio do angka donganku hape nada ra halahi mangurupi au. Angka malim dohot pamimpin ni bangso manjalahi panganon laho paudut ngolu hape mate do halahi sudena di angka dalan ni kota.

JEREMIA 25:9

‘PiohononKu ma sude bangso na sian Utara, songon i muse naposongKu si Nebukadnesar raja ni Babel. ArahononKu ma halahi marporang mangalo Juda dohot halakna i sude dohot bangso na humaliangsa. PatimpasonKu sude bangso on rap dohot angka bangso hombarna jana padiaronKu malala sapanjangna. Tarsonggot ma halak na midasa jana panyogiton. Au Tuhan, madung mandok songon i.

JEREMIA 22:22

Hara ni i, gabe mago boti noma angka pamimpinmunu songon na niombus ni alogo. Angkaton ma angka donganmunu i songon taban, jana kotamunu dipabile hara ni sandok hajahatanmunu i.

JEREMIA 4:30

O ale Jerusalem, madung maronco ho! Aha be gunana marbaju na saksak jana mamake barang sere dohot perak, dohot mangalapuhon colak di mata? Parcuma do dipajeges ho dirimu, angke nada tumbuk be ho di roha ni haholonganmu, mur halahi noma na giot mambuat hosamu.

JEREMIA 2:36

Nayang na i didok rohamu laho paubahon parangemu! Jana angkon maila ma ho hara ni halak Mesir, songon na dung dipaila ni Asur i ho.

PANGARATAION 32:49

“Kehe ma ho tu partoran Abarim na di Luat Moab di bariba ni Jeriko. Manangkok ma ho tu Dolok Nebo jana tatap ma tano Kanaan na so sadia lolot nari be giot pasahatonKu tu bangso Israel.

JESAYA 57:13

Muda marsurak ho, padiar ma gana-ganaanmi paluahon ho! Ombuson ni alogo ma halahi sude, angkon dihabangkon pangombus ni hosa. Tapi halak na marondingan tu Au angkon dapotan pusako di luat i jana punania ma dolokKu na badia i.

JEREMIA 2:25

Ale Israel, tongtong ma ho marsipatu jana ulang padiar manguas ho hara ni na parayakkon debata na asing. Tapi nimmu do, ‘Nada! Nada tarbaen au mulak. Madung huhaholongi debata na asing jana i noma ihutkononku.’ ”

JEREMIA 3:1

Didok Tuhan, “Muda disirangkon halaklahina sada dadaboru, lalu marbagas anak boru i tu bayo na asing, nada tola be halaklahina i humani mambuat dadaboru i mangulahi gabe ripena, angke pasego-segohon do pangalaho na songon i di luat on. Antong ho ale Israel, madung bahat sajo haholongan ni rohamu, biasi dope puluk ho mulak tu Au?

JEHESKIEL 27:6

Angka dayungmu dibaen halahi sian angka hayu na godang di Basan do i. Inganan ni juguhanmu dibaen sian tusam sian pulo Siprus do i asalna, na nipajagar dohot gading na arga.

JEREMIA 2:37

Tarhirim ma hamu manadingkon Mesir hara ni ilana. Au Tuhan, madung manulakkon halahi na dipangasahonmunu i; indangkon na dapot hamu sanga na aha untung sian halahi.”