JEREMIA 2:15 - BIBEL JAMITA NA DENGGAN

¹⁵ Marngaur musuna i songon singa, gariang jana rumar tanona i dibaensa, angka kotana abis hona surbu, dipadiar mamolngit jana gabe lobu.

JEREMIA 2:15 Referans Kwoze

JEREMIA 4:7

Songon singa na ruar sian liang partabunian songon i ma panyego-nyego ni angka bangso na dung mardalan laho mangaroncohon Juda. Mamolngit noma i angka kota ni Juda dipadiar gabe lobu na so adong manginganisa.

JEREMIA 50:17

Didok Tuhan ma, “Tudos do halak Israel dohot biri-biri sahulanan na hona kojar jana na marserak dibaen singa. Mula-mulana ro ma raja ni Asur manyerang halahi, dung i ro muse ma si Nebukadnesar manyingkili holi-holi ni halahi.

JEREMIA 9:11

Didok Tuhan, “Gabe lobu baenonKu Jerusalem inganan partabunian ni sorigala. Mamolngit ma angka kota ni Juda, inganan na so adong be pangisina.”

JESAYA 5:29

Angka parajuritna i songon singa na baru manangkup soroanna parngaurna, jana muda dilojongkonsa nada adong na bisa paluahonsa sian halahi.

JESAYA 1:7

Madung disego-sego sude luat ingananmu; angka kotamunu pe madung disurbu. Laing di jolo ni matamu dibuat halak na asing tanomu lalu disego-sego sudena.

ZEPANYA 3:6

“Ma pola bahat angka bangso na mago Hubaen; Huroncohon angka tugu ni halahi na gincat i, Husegoi dalanna lopus nada adong be pamolus, madung dipagariang kota ni halahi nada adong be pangisina.”

ZEPANYA 2:5

Marjaya ma hamu angka pangisi ni Topi Laut, hamu bangso Kreti! Maradopkon hamu ma hata ni Tuhan on, ale Kanaan tano ni halak Pilistin! AbiskononKu noma ho, lopus nada adong be pangisimu.

ZEPANYA 1:18

Di ari na jorbut i pataridahonon ni Tuhan ma murukNa gabe nada tarbaen sere dohot perak ni halahi be paluahon halahi. Malala ma sude portibi on ditutung api ni hamuruhonNa i. Jadi ompot ma sintakkononNia sandok hosa na adong di tano on.

NAHUM 2:11

Ma di dia kota i saonnari, kota na tudos tu liang parasaran ni singa i, inganan ni angka anak ni singa dilehen mangan, inganan situjuon ni singa boru-boru dohot jantan, inganan ni anak ni singa sonang so haribo-riboan?

AMOS 3:12

Songon on do didok Tuhan, “Songon sada halak parmahan na paluahon dua pat sanga sabariba pinggol ni biri-biri sian baba ni singa, songon i ma halak Samaria i giot paluaon, saotik sajo noma na tading.”

AMOS 3:8

Muda marngaur singa, ise ma he mabiar? Muda mandok hata Tuhan Debata, ise ma he tarbaen so jana nada paboahon tonaNia?

AMOS 3:4

Jolo marngaur dehe singa di harangan painte so manyoro? Marngaur dehe anak ni singa di bagasan asarna painte so ditangkup ia bagi aha?

HOSEA 11:10

Didok Tuhan ma, “Ihutkonon ni bangsongKu ma Au muda marngaur Au songon singa jana mambaen mabiar musu ni halahi. Manigor tibu do bangsongKi ro mandapotkon Au sian Hasundutan.

HOSEA 5:14

Songon singa na manyoro, songon i ma baenonKu marsurage Israel dohot Juda. Au sandiri do na giot manyibak-nyibak halahi lalu Hutadingkon. Muda Husarat halahi kehe, sada pe nada adong tarbaen palua halahi.

JEHESKIEL 5:14

Incahan ni angka bangso na humaliangmu ma ho, jana mandao ma sian ho sanga ise halak na mamolus.

JEREMIA 44:22

Nada tahan be Tuhan paida-ida pangalaho dohot pambaenanmunu na jahat i; hara ni i do umbahen na gabe lobu tanomunu, nada adong na mangingani lopus sadari on.

JEREMIA 34:22

ParentahononKu ma anso mulak halahi tu kota on, jadi serangon ni halahi ma, masuhanna lalu surbuonna. Giot baenonKu angka kota ni Juda songon halongonan na so diingani ni jolma. Au Tuhan, madung mandok songon i.”

JEREMIA 33:10

Didok Tuhan ma, “Pandok ni halak, songon padang halongonan do inganan on, nada adong jolma sanga binatang maringanan dison. Tutu do nian na nidok ni halahi i, harana na dung rumar do sudena angka kota na di Juda dohot angka dalan na di Jerusalem; nada adong jolma sanga binatang na maringanan disi.

JEREMIA 26:9

Papuluk-pulukkon ho mandok mangasahon Tuhan na giot songon Silo BagasNa on, dohot kota on roncohonon jana gabe lobu,” ning halahi. Dung i dirongomi halak na bahat i ma au.

JEREMIA 25:30

“Sude na Hupardokkoni i tu ho ale Jeremia, angkon palaluonmu do i. Dokkon tu halahi: ‘Mangaronggur do sora ni Tuhan sian banua ginjang; matuoror do Ia tu bangsoNia na mangalo i. Dibege halak na satano on do Ia manyonggak songon parkarejo na mamoro anggur di pangilangan.

JEREMIA 5:6

I ma dalanna gabe soroon ni singa na sian harangan halahi, jana diparsuragehon ni sorigala na sian padang halongonan. Humadeap ma angka angguliman manjalahi soroanna di bagasan angka kota ni halahi, jana sanga ise na ruar sian bagasna soroanna noma i. Patunda ni na dung bahat do halahi mardosa umbaen na tarjadi sudena i, jana marpupu halahi manghudukkon Debata.

JESAYA 24:1

Segohonon ni Tuhan ma tano on, lopus gabe harsang jana mamolngit. Margaba-gobi ma baenonNia sisik ni tano on jana sarsarkononNia noma na manginganisa.

JESAYA 6:11

Marsapa ma au, “Sadia honok ma na songon on ale Tuhan?” AlusNia, “Lopus gabe tinggal sego-segona sajo angka kota jana mamolngit, lopus nada diingani be angka bagas, lopus rumar tano i jana nada tubuan sanga aha.

JESAYA 5:9

Hubege do didok Tuhan Na Markuaso i, “Anggo angka bagas na godang-godang jana na jeges-jeges on, marumar noma i sudena nada adong be manginganisa.

MASMUR 57:4

Dihobuk musu au, songon singa sipangan jolma halahi. Hujur dohot pana do ipon ni halahi, podang na tajom do dila ni halahi.

JOB 4:10

Marngaur marauang do parjahat, songon singa halahi mangalumpat. Hape Debata mambaen halahi mangkohom jana mambaen iponna mangkalobang.

HAKIM-HAKIM 14:5

Jadi kehe ma si Simson tu Timna rap dohot ama, inangnia. Jadi di hatiha na mamolus halahi sian kobun anggur, dibege si Simson ma marngaur singa jara-jara.

JEREMIA 51:38

Marngaur ma halak Babel songon singa, jana mangorong songon anak ni singa.

JEHESKIEL 36:3

Hara ni i manyurirangi jana dokkon ma: Songon on ma didok Tuhan Debata. Hara ni musu na di humaliangmu, na mambaen hamu mamolngit jana na marpor ni roha tu hamu anso gabe nampuna ni angka bangso, jana madung dipahata-hata halak hamu.

ZAKARIA 11:3

Mangandungi ma angka pamimpin di hasusaanna; ma pola mago hajagaronna. Bege bo parngaur ni singa di harangan, angke inganan ni halahi sapanjang Batang aek Jordan, ma pola abis marsursaran.

JEREMIA 6:8

O hamu halak Jerusalem gabe pangajaran ma nian tu hamu sude hasusaan i! Ulang jabat Hutadingkon hamu jana kotamunu i nada diingani halak.”

JEREMIA 9:10

Au si Jeremia, hudok ma, “Tangis ma au jana marsak hara ni padang dohot angka dolok na dung mahiang mangkarogang boti nada dibolus-bolus halak. Nada habegean be sora ni pahan-pahanan, marlojongi sude unggas dohot sude pahan-pahanan.”

JEREMIA 10:22

Tangihon hamu ma! Adong barita na paboahon sada bangso di Utara na mambaen hagaoran. Gabe mamolngit jana gabe lobu ma angka kota ni Juda baenon ni tentarana. Martabuni disi ma angka sorigala.”

JEREMIA 25:9

‘PiohononKu ma sude bangso na sian Utara, songon i muse naposongKu si Nebukadnesar raja ni Babel. ArahononKu ma halahi marporang mangalo Juda dohot halakna i sude dohot bangso na humaliangsa. PatimpasonKu sude bangso on rap dohot angka bangso hombarna jana padiaronKu malala sapanjangna. Tarsonggot ma halak na midasa jana panyogiton. Au Tuhan, madung mandok songon i.