JEREMIA 2:11 - BIBEL JAMITA NA DENGGAN

¹¹ Nada jungada sada bangso manggonti debatana haru pe i nian nada Debata na satutuna. Hape anggo bangsongKu ditulak do Au jana marsomba tu na so margogo mambaen bagi aha.

JEREMIA 2:11 Referans Kwoze

SURAT NI SI PAULUS TU PARLAGUTAN ROM 1:23

Dipasambar halahi do hasangapan ni Debata na so muba-uba, tu gambaran na tudos tu jolma na muba-uba, angka unggas, binatang siopat pat dohot angka binatang na manjurur.

JESAYA 37:19

Ditutungi jana ditapori halahi angka debatana, dibaen nada i Debata. Hum patung na nibaen sian hayu dohot batu sajo do i antong na nibaen ni tangan ni jolma; hara ni i do umbaen na bisa disegoi jolma.

JEREMIA 16:20

Tarbaen jolma ma he mambaen debatana sandiri? Bia ma pambaen ni i! Pasti nada Debata na nibaenna i.”

MASMUR 106:20

Ditulak halahi do Ho, Debata na godang, laho marsomba patung ni pahanan na manggagat duhut.

MIKA 4:5

Ganop bangso na adong di portibi mangoloi be jana marsomba tu debatana sandiri. Tapi anggo hita haburjuhononta ma mangoloi Tuhan Debatanta jana tasomba Ia salolot-lolotna.

1 KORINTUS 8:4

Anggo taringot tu na mangankon sipanganon na dung nihaulkon tu gana-ganaan, taboto do, nada adong satutuna anggo na nigambarkon ni gana-ganaan i. Jana tangkas do taboto, anggo Debata hum sada sajo do; nada adong be na asing.

JEREMIA 2:8

Angka malim nada adong be na marsapa sanga di dia Au, Tuhanna. Angka na pajongjong uhum pe nada mamboto sanga ise Au. Angka na markuaso mangalo do tu Au. Mangasahon goar ni Baal mandok hata angka panurirang, jana marsomba gana-ganaan na so marguna i.”

JEREMIA 2:5

Didok Tuhan, “Hasalaan dia do na dumpang ompumunu di Au, umbaen pola mandao halahi sian Au? Disomba halahi do patung na so marguna na mambaen halahi gabe so marguna?

MASMUR 115:4

Anggo sisombaon ni halahi sere dohot perak sajo, na nitukangan ni tangan ni jolma do.

MASMUR 3:3

Hape Ho do ale Tuhan, parince na mangondingi au; dilehen Ho do hamonangan di au jana dipagodang Ho rohangku.

PANGARATAION 33:29

O Israel, na godang ma antong tuamu, nada adong bangso na dipalua songon bangsomu. Tuhan i sandiri do parince dohot podangmu, mambela dohot mangalehen hamonanganmu. Marroan ma musumu mangido ibo ni roha, dege-degeonmu ma halahi sudena di dolok-dolok ni halahi.”

1 PETRUS 1:18

Angkon botoonmunu do sanga aha na dung digarari laho paluahon hamu sian ngolu na so marguna i na nipateankon ni angka ompungmunu tu hamu. Nada barang na ra sego songon perak sanga sere dibaen panggararna,

GALATIA 4:8

Najolo nada ditanda hamu dope Debata, jadi hara ni i ma umbaen na gabe hatoban hamu di angka kuaso na nidok ni halak songon debata hape nian nada tutu Debata.

1 SAMUEL 4:21

Dibaen ia ma goar ni dakdanak i si Ikabod, angke didok ia, “Ma mago hasangapan ni Debata na marmulia i sian Israel,” – anggo maksudnia i ma paboa na dung dirampas musu do Poti Parjanjian i jana amangborunia dohot halaklahinia pe madung jumolo monding. Jadi hara ni i ma didok ia, “Madung mago hasangapan ni Debata na marmulia i sian Israel, angke madung hona rampas Poti Parjanjian ni Debata.”

2 JUJUR TAON 13:9

Nada he madung diusir hamu angka malim ni Tuhan pomparan ni si Harun dohot angka halak Levi i? Sanga na ise na marpor ni roha gabe malim, i ma dibaen hamu gontina, asalkan ma ra maroban sada lombu sanga pitu biri-biri, dibaen hamu ma i malim tu na so Debata, harana songon i do antong carana dibaen angka bangso na asing mangangkat malim ni halahi. Tapi anggo hami, nada hami baen na songon i.

JEREMIA 5:7

Bia do lakna, bisa dope ampunanKu hamu? Madung ditadingkon angka anakmu Au, jana marsumpa marhitehon na so debata. Dung Hupabutong halahi, marmainan do halahi jana kehe tu bagas parkarosuan.

JEREMIA 18:13

Didok Tuhan ma, “Sapai ma tu ganop bangso, sanga na unjung tarjadi songon on. Madung dibaen halak Israel pangalaho na jorbut i!

JEHESKIEL 5:7

Dibaen i songon on do hata ni Tuhan Debata, “Harana jumahat do hamu sian halak parbegu angka na manghaliangi hamu, nada diparangehon hamu angka parentangKu, jana nada diradoti hamu angka uhumKu, tona ni angka parbegu na di humaliangmunu noma diihutkon hamu.

JEHESKIEL 14:5

Sude gana-ganaan i padaohon bangsongKi do sian Au, tapi marhite alus i sai anggiat ma nian mulak bangsongKi tu Au.’

PANGARATAION 32:16

Marsomba halahi tu patung, gabe mangiburu ma Tuhan. Gurgur ma murukNa dibaen hajahatan i.

PANGARATAION 32:21

Patung na nipele ni halahi do mambaen muruk Au, tu na nigoaran ni halahi debata mangiburu Au, debata na so tutu Debata. BaenonKu ma sada bangso anso mangiburu halahi muruk tu bangso ni angka jolma na bodo i satutuna nian bangso na so adong do i.

1 RAJA-RAJA 11:33

Giot songon i ma baenonKu hara ni na nitadingkon ni si Salomo Au jana marsomba ia tu angka debata: I ma Astoret, debata boru-boru na sian Sidon; Kamos, debata ni Moab, dohot Milkom, debata ni Amon. Madung mardosa si Salomo jana dilaosi ia angka na Huparentahon. Anggo amangnia si Daud diihutkon do angka tona dohot parentangKu, hape anggo si Salomo, nada.

2 RAJA-RAJA 1:3

Tapi disuru Surusuruan Ni Tuhan ma si Elia panurirang na sian Tisbe i, kehe mandapotkon angka suruan ni Raja Ahasia i mandok, “Adong he na so adong be Debata di Israel umbaen na ra hamu kehe mangido panogu-noguon tu Baal-Zebub debata ni halak Ekron i?