JEREMIA 13:27 - BIBEL JAMITA NA DENGGAN

²⁷ Madung Huida hamu patupahon angka pangalaho na Huhagigihon. Huida do hamu markarosuan jana manggampang di angka dolok dohot di angka ladang. Marjaya ma hamu halak Jerusalem! Andigan pe hamu giot malua sian sandok hajahatan?”

JEREMIA 13:27 Referans Kwoze

HOSEA 8:5

Goyak rohangKu paida-ida lombu sere na nipasomba-somba ni halak kota Samaria. Marpiar do murukKu tu halahi. Sadia honok nari sai sombaon ni halahi torus gana-ganaan i?

JEHESKIEL 24:13

Ale Jerusalem, angka pambaenanmu na so ture i, i do mambaen hodar ho. Madung Hucubo nian paias ho, hape nada adong gunana, angke torus do ho hodar. Nada be ra ho ias mangulahi lopus Hupalalu rimasKu tu ho.

JEHESKIEL 6:13

Marragean ma angka bangso di antara ni angka gana-ganaan i dohot humaliang ni angka langgatan i, marserak di ganop dolok na gincat dohot di puncu ni ganop dolok, di toru ni ganop hayu na rumbun dohot di ganop bona ni hayu na godang; pendekna, sanga di dia halahi manutung haul tu gana-ganaan ni halahi. Jadi botoon ni ganop jolma ma, Au do Tuhan.

JESAYA 65:7

hara ni angka dosa ni halahi dohot dosa ni ompu ni halahi. Ninna Tuhan, “Dipabile halahi do Au marhite na manutung hamonyan di inganan parsombaan tu angka debata di dolok, jana dilayasi Au. UhumanKu do halahi marguru tu pangalaho ni halahi na salpu i.”

HOSEA 4:2

Dibaen halahi janji hape nada digohi halahi; margabus, mamunu, manangko, manggampang do halahi. Martamba do hajahatan jana mardapot-dapot pamunuon.

JEHESKIEL 36:37

Didok Tuhan Debata i ma, “Ale bangso Israel, Hupaloas ma hamu mangulahi mangido tolong tu Au; tambaanKu ma bahat ni bilanganmunu songon punguan ni biri-biri.

PODA 1:22

Ninna do, “Ale hamu angka jolma na oto! Intap ni andigan do giotmunu sai tongtong maoto? Andigan pe ra hamu mantak palayaskon parbinotoan dohot na manulakkon pangajaran?

HALUMBAAN 8:13

Dung i hupamanat ma, gabe huida ma sada unggas rajawali na habang di ginjang an. Dung i mangkuling ma unggas i, “Marjaya! Marjaya! Marjaya ma sudena halak na di tano on muda tarbege surusuruan na tolu nari i mangombus sarunenia i sanoli on!”

JAKOBUS 4:4

Angka jolma na so tigor do hamu! Diboto hamu dehe, muda mardongan hamu dohot portibi on na gabe musu ni Debata do hamu?

2 KORINTUS 12:21

Songon na biar do rohangku, betak sai dipatoruk Debata au di jolomunu muda hutopot hamu. Sak muse do rohangku, bahat sian hamu na mardosa hian nabaruon, patangiskon au hara ni na laing so ra muba jana laing so mantak halahi marpangalaho na so ture, na hodar dohot na so tama.

2 KORINTUS 7:1

Antong hamu ale dongan na nihaholongan! Tu hita do dibaen angka janji i sudena. Tapaias ma dirinta sian sasude na pahodarkon pamatang dohot rohanta. Tahabiari ma Debata, anso sanggam tarbaen hita mangolu mamunjung tu Debata.

MATEUS 11:21

“Marjaya situtu ma ho Khorasim, marjaya ma dohot ho ale Betsaida. Sugari di halak Tirus dohot Sidon dibaen tanda hahomangan na nibaen di tonga-tongamunu, ma pola markutondo halahi marsak, marsibaen sirabun tu pamatangna be pataridahon na dung muba roha ni halahi sian angka dosana.

ZEPANYA 3:1

Marjaya ma si pangalo dohot si jurngit, ale kota na jotjot mamparkanciti, kota na jurngit na sai mangalo tu Tuhan dohot na mamisat halakna sandiri!

HOSEA 1:2

Hatiha mulai Tuhan manghatai marhite si Hosea, didok Ia ma tu si Hosea, “Kehe ma ho, buat ma sada halak siboru jalang baen dadaborumu, jana anakkon ma angka anak gampang, angke madung ramun kota on marhite na manundalkon Tuhan.”

JEHESKIEL 36:25

Dung i pispisonKu ma hamu dohot aek na lan, anso ias hamu sian sude gana-ganaanmunu dohot sian sasude na pahodarkon hamu.

JEHESKIEL 24:6

Didok Tuhan Debata i ma, “Marjaya ma kota i na gok dohot sibunu jolma! Songon huali na tasikon na so unjung dibasu do kota i. Diparuar ma juhut i sian bagasan sasangkorot, lopus nada adong be na tinggal.

JEHESKIEL 20:28

Huoban ma halahi tu tano na dung Hujanjihon tu halahi. Di na niida ni halahi angka dolok na gincat dohot angka hayu na rumbun, dipelehon halahi ma haul tu sude hayu dohot dolok i. Dialap-alapi halahi ma anso muruk au marhite angka haul situtungon dohot pelean anggur ni halahi i.

JEHESKIEL 2:10

na marsurat angkup bariba. Dung i dibuka ia ma balunan i jana tarsurat do disi andung, holos dohot angguk-angguk.

JESAYA 57:7

Kehe do hamu tu puncu ni angka dolok laho pasahatkon pelean lalu pasombuhon hagiot ni sibukmunu.

MASMUR 94:4

Dipardokkoni halahi do hata na kasar, jana dihasombongkon halahi do angka hajahatanna i.

JEREMIA 3:6

Di na gabe raja si Josia, didok Tuhan ma songon on, “Madung he diida ho na nibaen ni Israel dadaboru na so setia i? Di sandok dolok na gincat dohot di toru ni sude hayu na rumbun, marmainan ia.

MASMUR 94:8

Pardiatehon ma, o hamu angka jolma na oto! Andigan dope hamu marsiajar mamake pikiranmi?

JEREMIA 11:15

Didok Tuhan ma, “Bangso haholongan ni rohangKu madung patupahon angka pangalaho na jat. Nada adong be hak ni halahi di BagasKu. Diambang halahi do tarolat halahi ma hamamago i marhite na mambaen angka janji dohot na manghaulkon angka binatang. Martua ma he halahi baenon ni karejo na songon i?

JEHESKIEL 16:23

Didok Tuhan Debata ma, “Marjaya ma ho! Marjaya situtu! Hara ni hajahatanmu.

JEHESKIEL 24:12

Parcuma do halojaonKu, angke harat na hapal i nada ra mago haru pe madung ditutung tu api.