JEREMIA 12:1 - BIBEL JAMITA NA DENGGAN

¹ Muda hupatigor parkarongku di adopanMu ale Tuhan, tontu torang do tarida laing Ho do na tigor. Tapi laing por do rohangku marsapa tu Ho taringot tu soal hatigoran: Biasi sonang halak na jahat? Biasi ma he halak na geduk mardohar?

JEREMIA 12:1 Referans Kwoze

MALEAKI 3:15

Hara ni i do hita dokkon bahaso marsonang-sonang do angka halak na jungkat, angka na jahat, salang Debata pe diuji halahi do, tapi laing malua do halahi sian jaya.”

MASMUR 92:7

halak na so ture simbur do martumbur songon duhut simbur, jana halak na jahat martamba kayo jana sonang; tapi laing abiskonon do halahi sudena,

MASMUR 37:1

Ulang pola marsak ho hara ni halak na jungkat, ulang mangiburu ho mida halak sibaen na jahat.

DANIEL 9:7

Ale Tuhan, sai tongtong denggan jana tigor do pambaenanMu, tapi anggo hami sai tongtong do mambaen tilako tu dirinami, i ma hami sude na maringanan di Juda dohot di Jerusalem maradu sude dongannami sabangso na nipaserakMu tu angka luat na dao dohot na donok hara ni na so unduk halahi tu Ho.

JOB 12:6

Hape ngolu ni panyamun so adong mangondam. Angka na puluk mangalo Debata mangolu do soada mara. Hape debata sisoada do diasangkonsa, i ma pos ni rohana hum tu gogona.

HABAKUK 1:4

I do umbaen nada margogo be uhum jana hatigoran nada unjung dihajongjongkon. Sumurung ma halak na jahat maradopkon halak na burju, jadi gabe diputar-balikkon ma hatigoran.

MASMUR 51:4

Maradopkon Ho, maradopkon Ho sajo do au mardosa, jana hukarejohon do angka na jahat dietong Ho. Anso tutu Ho tigor di bagasan angka hataMu, jana monang muda manguhumi Ho.

MASMUR 37:35

Unjung do huida sahalak parjahat na ginjang roha, markuaso ma ia antong songon bona ni sampinur Libanon.

ZEPANYA 3:5

Tapi na tigor do anggo Tuhan di tonga-tonga ni halahi, nada unjung dibaen Ia hakejamon, na so unjung dihalupahon di hatiha manyogot. Tapi halak na kejam nada mamboto hahaila.

JEREMIA 11:20

Dung i martangiang ma au, “Ale Tuhan Na Markuaso, Ho do panguhum na tigor; Ho do na manguji pikiran dohot roha ni jolma. Tu Ho do Hupasahat parkarongkon; sugari nian tarbaen au ma manyaksihon balos ni angka parange ni jolma on.”

JEREMIA 12:6

Madung pola dihianati angka kahanggimu sandiri ho; dohot halahi mamorangi ho. Ulang porsaya ho tu halahi, haru pe tabo begeon hata ni halahi.”

JEREMIA 5:11

Tutu situtu do na dung mangalayasi halak Israel dohot Juda tu Au. Au Tuhan, madung mandok songon i.

JOB 13:3

Tapi anggo au na giot mangkobari noma tu Na Sun Kuaso. Di joloNia do giotku belaonku parkaro.

ESRA 9:15

O Tuhan Debata ni Israel, na tigor do Ho, haru songon i pe laing dipadiar Ho do hami mangolu. Hami oku ma hasalaannami tu Ho; nada marhak hami ro tu parmiananMu.”

HOSEA 6:7

Tapi songon si Adam, digagai hamu do janjimunu dohot Au.

JESAYA 48:8

Nada ditangihon ho sanga diboto ho, jana pinggolmu pe nada tarbuka sian najolo; tapi Huboto do, bahaso na durako do ho, jana didok halak do ho pangalaosi mulai sian bortian.

JESAYA 41:21

Didok Tuhan, raja ni Israel tu angka debata, “Aduhon ma parkaromu, lehen buktina muda tarbaen hamu!

PODA 1:32

Mate ma halak na so marpangalaman patunda ni na so ra manjagit au, jana magete ma halak na oto hara ni na so ra mangalehen rohana tu au.

MASMUR 145:17

Tigor do Tuhan i di sude tindakanNa, gok holong ni roha do Ia di sude na nibaenNa.

MASMUR 119:137

Tigor situtu do Ho, ale Tuhan, tumbuk do sude parentaMu.

MASMUR 119:75

Huboto do ale Tuhan, tigor do haputusanMu, hara ni habonaranMu, diuhum Ho au.

PANGARATAION 32:4

Tuhan ma da na mangondihon ho gumogo, sude dalanNa tigor jana sanggam do. Setia do Debatamu jana ias rohaNa, na denggan dohot na patut do dibaen Ia.

PAMUNGKAAN 18:25

Pasti do na so ra Ho mamunu angka halak na so marsala i rap dohot na marsala. Inda masuk di akal! Inda mungkin ra Ho mambaen songon i. Sugari sura dibaen Ho songon i, gabe sarupama angka halak na so marsala dohot na marsala. Hape nian matua na tigor do anggo Panguhum ni sandok na adong.”

NEHEMIA 9:33

Bonar do pambaenanMu, hami na mardosa diuhumi Ho laing setia do Ho haru pe hami gok tilako.

MASMUR 116:5

Na denggan do Tuhan i jana parasi roha; gok ibo ni roha do Debatanta.

PARJAMITA 8:14

Tapi sisoada do dohonon i sudena. Ligi ma sanga aha na tarjadi di tano on: Adong do halak na burju na hona uhum songon parjahat, adong do parjahat na dibalos songon halak na burju, jadi, i pe magopo do.

JEREMIA 3:7

Didok rohangKu do: Dung dikarejohon ia sudena i, mulak ma ia nian tu Au, tapi nada mulak ia. Madung diligi Juda sude na i, ibotonia dadaboru panggampang i.

JEREMIA 3:20

Hape songon ripe na so setia, ho pe na so setia do tu Au. Au Tuhan, madung mandok songon i.”

JEREMIA 9:2

Sugari dapot au ma di padang halongonan inganan parbornginan di halak na mardalanan! Hutadingkon noma bangsongku, jana marlojong au tusi laho mandao sian halahi. Panghianat do halahi sudena, sada punguan ni halak na so setia,

JEREMIA 32:16

Dung hulehen angka surat tobus i tu si Barukh, martangiang ma au,

ANDUNG 1:18

Tapi tigor do anggo Tuhan, angke parentaNia do antong na nilaosan. Tangihon ma au, ale angka bangso! Ligi ma au di bagasan pardangolan on. Hona tangkup na poso dohot nauli bulungku, jana dioban tu habuangan.

JEHESKIEL 18:25

Betak adong muse na mandok di bagasan rohana songon on, ‘Sala do na nibaen ni Tuhan i.’ Tangihon hamu ma ale halak Israel! Na sala dehe na Hubaen i? Hamu do na sala.

JOB 8:17

Manjarampak mangalilit uratna i tu batu na di tano, gomos togu pangarahutna.

JOB 24:12

Di angka kota na ribur tarbege do tangis ni na giot mate, angka na margasa pio-pio mangido dipature-ture, hape nada ditangihon Debata tangiang ni halahi be; umpe ra Ia mangarohahonsa dohot manerge.

JOB 24:23

Dilehen Debata disia ngolu na sonang i, tapi nada marnamantak ia dimatai.

MASMUR 51:6

Haiason dohot habulusan ni roha do dipangido Ho, gohi ma rohangku dohot habisuhonMu.

DANIEL 9:14

Madung diuhum Ho hami ale Tuhan Debatanami marhite hamamago na dung nihobasanMu humani, sai tongtong do denggan jana tigor pambaenanMu, hape nada hami tangihon soraMu.

MALEAKI 2:17

Susa do Tuhan dibaen angka hata-hatamunu. Tapi didok hamunu do, “Bia ma he hami baen pasusahon Ia?” I ma na niambangmunu: “Ganop halak na mambaen hajahatan denggan do i di mata ni Tuhan; tu halak si songon i ma jop ni rohaNia sanga muda nada, di dia ma he Debata na manguhumi i?”