JAKOBUS 3:17 - BIBEL JAMITA NA DENGGAN

¹⁷ Tapi sanga ise na maruli habisuhon na ro sian ginjang, na parjolo: Na ias do i, dung i pardame, na burju dohot na ra mangoloi. Gok do i dohot ibo ni roha bope na pataridahon angka parange na denggan. Nada ganggu rohana jana nada mangalancap.

JAKOBUS 3:17 Referans Kwoze

PODA 2:6

Tuhan do na mangalehen habisuhon; sian Ia do dapot jolma parbinotoan dohot pangastuion.

JAKOBUS 3:15

Nada habisuhon na ro sian banua ginjang anggo habisuhon na songon i, sian portibi on do i, sian hagiot ni jolma, karejo ni setan do i!

SURAT NI SI PAULUS TU PARLAGUTAN ROM 12:9

Ulang mangalancap-lancap holong ni roha i! Magigi ma hamu mida na jahat, parayak hamu ma na denggan.

JAKOBUS 1:17

Ganop silehen-lehen na denggan jana na sanggam sian banua ginjang i do ro; na nipaijur ni Debata na manompa sasudena na torang di langit i do sudena i. Ia do Debata na so muba-uba, jana nada mandao muse Ia sian hita, gabe adong do tading halinuNa humaliang hita.

JAKOBUS 1:5

Muda adong sanga ise sian hamu na hurang marroha, dipangido ia ma habisuhon sian Debata, gabe lehenon ni Debata ma disia habisuhon. Angke tu ganop halak do Debata mangalehen jana mardongan ibo ni roha.

1 JOHANNES 3:18

Hamu angka dakdanakku! Ulang ma hum di pamangan sajo hita marholong ni roha sanga hum di hata sajo. Holong ni roha na tutu i ma tabaen mangkaholongi, sipataridahononta di pambaenanta.

1 PETRUS 1:22

Hara ni na nioloanmunu ajaran na sian Debata, gabe dipaias hamu dirimunu jana holong do rohamunu mida angka halak na porsaya tu Kristus. Antong, marsihaholongan ma hamu sama hamu sian sandok rohana be.

MATEUS 5:8

Martua ma halak na ias rohana, angke halahi ma na giot marnida Debata.

1 JOHANNES 3:3

Sude halak na mararop ni roha tuSia, dipaias ia ma dirina songon Ia na badia i.

LUKAS 21:15

Au sandiri do mangalehen angka hata sidokkononmu dohot habisuhon, lopus nada tarbaen sahalak pe sian angka musumunu i mangalo dohot mangalusi sanga aha na nidokmunu i.

LUKAS 6:36

Gabe parasi roha ma hamu, laing songon Amangmunu na marasi roha i!”

IBRANI 12:14

Usahahon hamu ma anso mardame-dame hamu tu sude halak jana manggogo ma hamu anso hum di Tuhan ngolumunu, harana sahalak pe nada adong na tarbaen mida Tuhan anggo inda songon i pardalan ni ngoluna.

2 TIMOTEUS 2:24

Anggo naposo ni Tuhan nada tola martongkari; angkon rama do tu halak sudena, jana tarajarisa halak na asing denggan jana sobar.

1 PETRUS 2:1

Antong, ambungkon hamu ma sian dirimunu sandok na jat; ulang be hamu margabus jana ulang be mangalancap. Ulang mangiburu jana ulang mandok hata na jat hamu taringot tu dongan.

JAKOBUS 2:4

Muda songon i dibaen hamu, nada he na mardia imbar do dibaen hamu sama hamu jana manguhumi hamu di bagasan pikiran na jahat?

IBRANI 12:11

Tutu nian dompak hona ajar hita, nada sonang rohanta manjagit pangajaran i, hum na pahancit roha sajo do i nihilala. Hape dung salpu i, dilehen do di halahi parbatu ni hatigoran, na mangalehen hasonangan.

KOLOSSE 1:10

Jadi gabe tarbaen hamu ma mangolu mangihutkon na nipangido ni roha ni Debata bope na pasonangkon rohaNia tongtong, anso sai tarpatidahon hamu angka pangalaho na denggan di sude karejomunu. Jana mur martamba muse ma parbinotoanmunu taringot tu Debata.

SURAT NI SI PAULUS TU PARLAGUTAN ROM 15:14

Hamu ale angka dongan! Pos do rohangku angkon bahat do angka pangalaho na denggan di hamu. Sasude do diboto hamu jana tarbaen hamu muse do marsiajar-ajaran na sada tu na sada nari.

JOB 28:28

Didok Debata ma tu jolma, “Angkon pasangopanmunu do Debata anso maruli bisuk hamu. Angkon mandao do hamu sian hajahatan anso dapotan parbinotoan hamu.”

1 JUJUR TAON 22:12

Jana sai ibo nian roha ni Tuhan Debatami laho mangalehen habisuhon dohot roha di ho anso tarrajai ho Israel hombar tu angka aturanna.

1 KORINTUS 12:8

Tu na sada dilehen Tondi i do hamaloon mandok hata di bagasan habisuhon, jana tu na asing, dilehen Tondi i do hamaloon mandok hata di bagasan parbinotoan.

JOB 28:23

Hum Debata do na umboto sanga na di dia inganan ni habisuhon i, hum Ia do na mamboto dalan tusi,

JAKOBUS 4:8

Pasolkot hamu ma tu Debata, jana Debata pe padonohonNa ma tu hamu. Hamu dongan na mardosa, paias hamu ma tanganmunu! Hamu na mardua roha, paias hamu ma rohamunu.

1 TIMOTEUS 5:21

Gomos pangidoanku tu ho di adopan ni Debata, dohot Jesus Kristus bope angka surusuruan todoan, anso diihutkon ho angka na hudok on so pola mardongan biar ni roha maradopkon sanga ise pe jana nada mamihak-mihak.

BAENON NI ANGKA RASUL 11:24

Na dengganan do roha ni si Barnabas on jana na nirajaan ni Tondi Parbadia boti porsaya situtu do ia tu Tuhan, jadi gabe bahat do halak na mangihutkon Tuhan i.

MATEUS 23:28

Laing songon i ma hamu. Anggo idaon nian sian duru, denggan ma hamu tu halak. Hape anggo di bagasan na so labo do hamu, gok pangalaosion.”

1 TESSALONIKA 2:7

Tapi lambok do pambaennami tu hamu, songon sada ina na marorot dohot na pature-turehon dakdanaknia.

PILIPPI 4:8

Ujungna, ale angka dongan, bagi aha na sintong, na pantun, na tigor, na ias, na jeges, na denggan begeon, angka parange na denggan jana sipujion, i ma pikiri hamu.

PILIPPI 1:11

Angka pambaenan na denggan noma mardapot-dapot sian ngolumunu, hum sian Jesus Kristus sajo do na tarbaen pataridahon suha na songon i; gabe nipasangap jana nipuji-puji ma Debata.

BAENON NI ANGKA RASUL 9:36

Di Jope adong muse do sada anak boru na margoar si Tabita, na porsaya do ia tu Jesus. (Si Dorkas do goarnia di hata Junani, astuanna ursa.) Sai didatdati ia do mambaen na denggan jana sai diurupi ia do angka halak na pogos.

JOHANNES 1:47

Diida Jesus do si Natanael ro mandapotkon Ia gabe dihatai Jesus ma taringot tuSia. Ninna Jesus ma, “On ma halak Israel na tutu, na so adong lancap disia!”

JOHANNES 1:14

Jadi madung gabe sibuk do Hata i, jana maringanan di tonga-tonganta, madung taida hamuliaonNia. Songon hamuliaon ni Anak Sasada na sian Ama i, na gok asi ni roha dohot hasintongan.

MALEAKI 3:3

Jadi juguk ma Ia songon sada halak panopa perak; jana paiasonNia ma halak Levi songon na paiaskon sere dohot perak, anso gabe sioban haul halahi tu Tuhan di bagasan hasintongan.

MALEAKI 2:9

Jadi Au sian pihakKu, baenonKu ma halak Israel marlayas ni roha tu hamu hara ni na so dioloi hamu hagiotKu, dohot hara ni na marnida bohi hamu dompak mangajari bangsongKu.”

DANIEL 1:17

Dilehen Debata ma tu doli-doli na opat i bisuk dohot hamaloon di parbinotoan taringot tu hata dohot ragam ni angka surat. Tambani i dilehen Ia muse do tu si Daniel hamaloon laho patorang parnidaan dohot nipi.

1 RAJA-RAJA 3:9

Hara ni i ale Tuhan, lehen ma di au habisuhon na porlu di au laho mamarenta bangsoMon di bagasan hatigoran jana anso tangkas di au paasingkon dia na denggan, jana dia na jat. Muda nada songon i, songon dia ma tarbaen au mamarenta bangsoMu na godang on?”

HARURUAR 36:2

Jadi dipio si Musa ma si Besaleel, si Aholiab dohot sude tukang na asing na dung disuan Tuhan tu rohana hamaloan, dohot halak na nionjar ni rohana mangurupi, lalu disuru mamungka karejo i.

TITUS 3:2

Dok tu halahi anso ulang adong na manilakoi sanga ise pe, tapi gumonan ma halahi basar jana burju. Marlambok ni roha ma halahi maradopkon halak sudena.

TITUS 1:15

Ias do sude sanga aha pe anggo di halak na ias. Tapi anggo di halak na hodar pikiranna jana na so porsaya tu Debata, sada pe nada adong na ias, angke madung hodar pikiran ni halahi dohot taroktokna!

SURAT NI SI PAULUS TU PARLAGUTAN ROM 12:18

Intap ni na tarbaen, mardame ma ngolumunu tu halak sudena.

JESAYA 32:6

Halak na bodo mandok hata ma i songon na bodo, jana na mambaen sangkap na jat. Sanga aha pe na nibaen sanga na nidoknia, laing matua palayaskon Tuhan do i. Na so unjung do ia mangalehen mangan di halak na malean sanga minum tu halak na manguas.

JESAYA 2:4

Angkon gabe panguhum do Ia ditonga-tonga ni angka bangso jana gabe juri tu marga ni bahat bangso; anso ditopa halahi ma angka podangna gabe mata ni bajak jana angka tombakna manjadi piso cukur; nasa bangso nada be mangangkat podang maralohon bangso, jana nada be marsiajar marporang halahi.

1 JUJUR TAON 22:9

Tapi haru songon i pe, dilehen Ia do janji tu au mandok, ‘Adong ma sada anakmu. Mamarenta do ia di bagasan sonang, angke urupanKu do ia jabat nada adong masa porang. Goaron ma ia si Salomo, angke salolot ia mamarenta, sonang jana aman do baenonKu Israel.

1 RAJA-RAJA 3:28

Dung dibege halak Israel haputusan ni si Salomo taringot tu parkaro i, gabe homang ma halahi jana dipasangap halahi ma si Salomo. Tangkas ma tarida, na dung dilehen Debata disia habisuhon laho manimbang parkaro di bagasan hatigoran.

1 RAJA-RAJA 3:12

gabe oloanKu ma pangidoanmi. BaenonKu ma ho gabe halak na umbisuk, jana na umbahat pangastuion sian sude halak na dung jungada mangolu sanga halak na giot mangolu dope di portibi on.

EPESUS 5:9

Angke sian na torang i do haroroan ni sasude ragam ni parange na denggan jana na bonar di panatapan ni Debata.

2 KORINTUS 10:1

Saonnari, au si Paulus, hupaingot ma hamu markite-hite lambok ni roha dohot habasaron ni Kristus. Anggo ninna halak na parbiar do au di tonga-tongamunu taran marsuo bohi tu bohi, tapi puluk do au muda dao sian hamu. Antong, hara ni halambohon bope hadengganan ni roha ni Kristus,

2 KORINTUS 9:10

Debata do na pasingkop same di si panyabur dohot roti sipanganon. Laing Ia muse do na pabahatkon suha ni suan-suananmunu, parbatu ni hatigoranmunu.

JESAYA 40:11

Songon parmahan, disarihon Ia do na niparmahanNia, jana dipalagut Ia angka anak ni biri-biriNia; diabing Ia do halahi di tanganNia, lambok do ditogu Ia induk ni biri-biriNia.

JOB 28:12

Hape anggo bisuk di dia ma he jalahan? Di dia ma he hita marsiajar anso niastuan?

MATEUS 5:9

Martua ma angka na mambaen dame, dibaen nigoar do halahi anak ni Debata.

2 KORINTUS 6:6

Hami patuduhon do na tutu hami pangoloi ni Debata di habuluson ni rohanami, di parbinotoan di hasobaron dohot di denggan ni rohanami. Di bagasan Tondi Parbadia dohot sian holong ni roha na ias,

2 KORINTUS 7:11

Ligi hamu ma jolo antong sanga aha do na ro sian hamamarsak na sian Debata i! Gabe diparayak hamu ma laho padenggankon na gaor. I ma suhana! Gabe magigi hamu mida dosa, gabe mabiar hamu, malungun hamu, gabe marsitutu, gabe ra hamu manguhum na sala! Di bagasan sudena parsoalan on madung dipatuduhon hamu na so marsala hamu.

JAKOBUS 2:13

Angke sanga ise halak na so maribo ni roha tu halak na asing, sidabuon do uhuman tusi so pola mardongan ibo ni roha. Tapi gumogo dope ibo ni roha ulang uhuman!

1 PETRUS 2:18

Hamu angka dongan na gabe pangoloi, unduk ma hamu mangoloi tuanmunu sasangap-sangapna; ulang hum tu halahi angka na denggan roha dohot tu na burju, tapi angkon dohot do tu halahi na jorbong i.