IBRANI 8:12 - BIBEL JAMITA NA DENGGAN

¹² SesaonKu ma angka hasalaan ni halahi, jana halupahononKu ma angka dosa ni halahi.”

IBRANI 8:12 Referans Kwoze

SURAT NI SI PAULUS TU PARLAGUTAN ROM 11:27

Jana on ma parjanjianKu maradopkon halahi, muda Husesa angka dosa ni halahi.”

JESAYA 43:25

Au, Au do na manyesa dosamu, Huampuni ho, hara ni Au sandiri. Nada ra Au manyimpan dosamu di bagasan rohangKu, hasalaanmu na salpu nada be paingot-ingotonKu.

MIKA 7:19

Maribo ni roha ma Ho mangulahi tu hami jana ampuni ma hami. TaluhononMu do angka dosanami jana ambungkononMu tu tandolan ni laut!

JEREMIA 50:20

Anggo di hatiha i, ias noma Israel dohot Juda sian dosa, angke na giot ampunanKu noma angka halak na dung Hupalua i. Au Tuhan, madung mandok songon i.”

JEREMIA 33:8

Giot paiasonKu halahi sian angka dosa na dung dibaen halahi maradopkon Au; Huampuni angka dosa dohot pangalaho ni halahi na so ture.

JESAYA 44:22

Huayak dosami songon alogo, salamu Hupaorot songon ombun na dihabangkon ni alogo. Hara ni i mulak ma ho tu Au, angke Au do Sipaluamu.”

KOLOSSE 1:14

Di bagasan Ia do adong di hita haluaan, i ma hasesaan ni dosa.

EPESUS 1:7

Angke di bagasan Ia, dapotan haluaan do hita markite-hite mudarNia, i ma hasesaan ni dosa mangihutkon godang ni asi ni rohaNia,

HALUMBAAN 1:5

dohot sian Jesus Kristus saksi na bonar roha i. Ia do na parjolo dipangolu mangulahi sian hamatean jana Ia muse ma parkuaso di ginjang ni angka raja na di tano on. Dihaholongi Jesus do hita jana hara ni hamateanNia i dipalua Ia do hita sian angka dosanta.

MASMUR 25:7

Sesa ma dosa dohot hasalaan di hatiha haposoonku, ingot ma au, hombar tu holong dohot denggan ni rohaMu.

MASMUR 65:3

Na borat ma da boban ni dosanami, hape diampuni Ho do i sudena.

JEREMIA 31:34

Sahalak pe sian halahi nada porlu be mangajari donganna laho mananda Tuhan. Angke sude halahi, na menek sanga na magodang, tandaonna ma Au. HalupahononKu ma angka hasalaan ni halahi, jana Huampuni angka dosa ni halahi. Au Tuhan, madung mandok songon i.”

MIKA 7:18

Nada adong Debata na songon Ho, ale Tuhan, na mangampuni dosa ni bangsoMu na teba i. Nada sapanjangna Ho muruk; balik tehe, sonang do rohaMu patuduhon holong ni rohaMu na so marparsuhatan i.