IBRANI 13:21 - BIBEL JAMITA NA DENGGAN

²¹ Sai dipasingkop Debata mual ni hasonangan i ma hamu di sasude na denggan i na porlu di hamu laho patuluskon hagiot ni rohaNia. Sai dibaen Debata ma di hita sanga aha giot ni rohaNia markite-hite Jesus Kristus. Tarpuji ma Jesus salolot-lolotna! Amen.

IBRANI 13:21 Referans Kwoze

PILIPPI 2:13

angke Debata sandiri do na markarejo di bagasan dirimunu, na mambaen hamu gabe ra jana sanggup pasonangkon roha ni Debata.

PILIPPI 4:13

Markite-hite kuaso na nilehen ni Kristus i tu au, taradopi au do sude ragam-ragam ni angka na masa.

1 PETRUS 2:5

Songon angka batu na mangolu do hamu. Antong ra ma hamu dipake laho pajongjong bagas ni Debata di pangalaho partondion. Jadi gabe angka malim na badia ma hamu jana na mangalehen haul tu Debata markite-hite Jesus Kristus, i ma haul partondion jana na tumbuk di roha ni Debata.

2 TIMOTEUS 4:18

Sai paluaon ni Tuhan Jesus do au tongtong sian sude usaho na jat maradopkon au. BoanonNia do au lopus tu bagasan HarajaanNia di banua ginjang. Sipasangapon do Ia salolot-lolotna! Amen.

PILIPPI 1:11

Angka pambaenan na denggan noma mardapot-dapot sian ngolumunu, hum sian Jesus Kristus sajo do na tarbaen pataridahon suha na songon i; gabe nipasangap jana nipuji-puji ma Debata.

2 KORINTUS 9:8

Bisa do Debata mangalehen pasupasu mardapot-dapot tu hamu, anso laing singkop sibaenonmunu; marlobian dope tehe tarbaen hamu mangkarejohon na denggan.

1 PETRUS 4:2

Hara ni i, salolot mangolu hamu di tano on tu pudi on, ihutkon hamu ma hagiot ni Debata, ulang be mangihut di hagiot ni jolma hamu.

IBRANI 10:36

Porlu do sobar hamu, jana muda dung dipatulus hamu hagiot ni Debata, jagitonmunu ma janji i.

1 TESSALONIKA 5:23

Debata pardame i ma paiaskon hamu sasudena, dipaburju Ia ma hamu anso hum tuSia sajo ngolumunu. Sai dijagohon Debata ma nian hamu sudena, di tondi, di roha bope pamatangmunu, anso ulang targora lopus tu ari haroro ni Tuhanta Jesus Kristus mangulahi.

JUDAS 1:25

Di Debata na sasada i, Sipalua hita markite-hite Jesus Kristus, Tuhanta i, diSia ma hasangapan, hagodangan, hagogoan dohot kuaso sian mula ni mulana, saonnari ro di salolot ni lolotna! Amen.

1 JOHANNES 2:17

Na giot mago do portibi on bope sasudena na adong di bagasanna na nihalungunkon ni jolma. Tapi anggo halak na patulus hagiot ni Debata, mangolu do salolot-lolotna.

1 TIMOTEUS 1:17

Debata do Raja ni sude hatiha, patut nipasangap jana pujion tongtong, angke Ia do na manongtong, na so tarida jana sasadaSa! Amen.

EPESUS 2:10

Na nitompa ni Debata do hita on, jana markite-hite Jesus Kristus dipauli Debata hita anso tabaen angka pangalaho na denggan na nipasingkopNia humani di hita.

PANGARATAION 32:4

Tuhan ma da na mangondihon ho gumogo, sude dalanNa tigor jana sanggam do. Setia do Debatamu jana ias rohaNa, na denggan dohot na patut do dibaen Ia.

HALUMBAAN 5:9

Dung i diendehon halahi ma sada logu na imbaru: “Hum Ho sajo do na patut mambuat buku on dohot mambuka angka capna i. Angke madung hona bunu Ho, jana hara ni hamamateMi madung ditobus Ho jolma tu Debata sian sandok marga, hata, negara, dohot bangso.

1 JOHANNES 3:22

Jana sanga aha pe na tapangido sian Ia, dapot hita do i, angke burju do hita mangoloi angka tonaNia dohot patuluskon sanga aha na tumbuk tu rohaNia.

IBRANI 13:16

Ulang lupa hamu mambaen na denggan bope na marsiurup-urupan, angke na songon on do haul na pasonangkon roha ni Debata.

1 TIMOTEUS 6:16

Hum Ia sajo do na so tarkuasoi hamatean; di bagasan sinondang na so hadonohan sanga ise pe. Nada adong sahalak jolma pe na jungada marnida Ia, sanga na tarbaen marnida Ia. Angkon lehenon ma nian tuSia sangap dohot kuaso salolot-lolotna! Amen.

1 TIMOTEUS 5:10

tarbarita ia songon sada ina na dung mambaen pangalaho na denggan; isarana: Denggan dipagodang-godang ia angka dakdanaknia, sonang rohana manjagit angka tamu di bagasna, tata bohina manyambut angka na porsaya, dohot na mangurupi halak na susa – pendekna madung dibaen ia sian situtu ni rohana sude ragam ni karejo na denggan.

1 TESSALONIKA 3:13

Jadi muda songon i, tarbaen Tuhan ma patoguhon rohamunu, anso gabe badia hamu jana nada adong sigorahonon di adopan ni Debata Amanta, di haroro ni Tuhanta Jesus rap dohot sudena halak na gabe nampunaNia.

KOLOSSE 4:12

Tabe ni si Epafras di hamu. Laing sian hamu on do asalnia. Naposo ni Jesus Kristus do ia, na sai manangiangkon hamu. Marsitutu do ia mangido tu Debata anso margogo hamu nian jana anso tongtong togu; boti muse anso laing mardongan pos ni roha na togu hamu mangoloi hagiot ni Debata.

KOLOSSE 3:17

Pendekna, sanga aha sikarejohonon sanga sidokkononmunu, angkon mangasahon Tuhan Jesus do karejohonon jana dokkononmunu i. Jana mandok tarimakasi ma hamu tu Debata Ama i markite-hite Jesus.

PILIPPI 4:18

Madung hujagit sasudena – dohonon marlobi-lobi dope! Sude silehen-lehen na nitongosmunu i tu au, madung hujagit sian si Epafroditus. Saonnari madung tuk di au sanga aha haporluanku. Songon uap na huskus na sian haul na nihaulkon tu Debata jana na nihalomohon ni roha ni Debata, songon i do angka silehen-lehenmunu i.

EPESUS 2:18

Markite-hite Kristus tarbaen ma hita sudena solkot tu Ama i – sanga na halak Jahudi sanga pe angka na so Jahudi.

MATEUS 28:20

Laing ajari hamu ma halahi anso burju mangoloi sude na Huparentahon tu hamu. Botoonmunu ma. Au ma tongtong rap dohot hamu lopus tu hasidungan ni tano on.”

MATEUS 6:13

jana ulang pamasuk hami tu bagasan pandugaan, tapi palua ma hami sian pangago i.’ [Ho do Raja na markuaso jana na marsangap salolot-lolotna.]

MASMUR 138:8

Giot patulusonMu do sandok na nijanjihonMu. Tuhan, hot do holong ni rohaMu sapanjangna, ulang ma tadingkon na dipungka ni tanganMu.

HALUMBAAN 5:13

Dung i hubege ma sasude mahluk na di langit, na di tano dohot na di bagasan laut – pendekna sudena mahluk na adong di portibi on – mangendehon, “Na juguk di habangsa i dohot Anak Ni Biri-biri i na tarpuji dohot sipasangapon jana na godang bope na markuaso salolot-lolotna!”

HALUMBAAN 4:6

Jana laing adong muse dope di jolo ni habangsa i tarsongon laut sorminan, lan songon kristal. Adong muse do opat mahluk humaliang habangsa na di tonga-tonga i, na marmata sian jolo dohot sian pudi.

IBRANI 12:23

Sada parsuoan godang do na niadopanmunu – parsuoan ni angka anak siangkaan ni Debata na dung disuratkon goarna di banua ginjang. Debata do na niadopanmunu, Panguhum ni sude jolma manusia. Adopanmunu do angka tondi ni halak na burju na dung dipasanggam.

1 TESSALONIKA 4:3

Angka na songon on ma na nipangido ni roha ni Debata sian hamu: Angkon badia do ngolumunu dipangido roha ni Debata jana nada tola marharorangon.

KOLOSSE 3:20

Hamu angka dakdanak! Tugasmunu do songon halak Kristen hamu, mangoloi simatobangmunu tongtong, angke na songon i do na pajopkon roha ni Debata.

PILIPPI 2:11

Angkon torang ma okuon ni halahi paboa Jesus Kristus do Tuhan; jadi nipasangap ma Debata Ama i muda songon i.

GALATIA 1:5

Hamuliaon ma di Debata salolot ni lolotna! Amen.

SURAT NI SI PAULUS TU PARLAGUTAN ROM 11:36

Angke sian Ia, jana markite-hite Ia, jana tuSia do sudena na adong. DiSia ma hasangapan ro di salolot ni lolotna! Amen.

2 PETRUS 3:18

Sai mur pangkilalahon hamu ma hadengganan ni roha ni Tuhan, Sipaluanta i, i ma Jesus Kristus, jana sai mur tangkas ma nian ditanda hamu Ia. Tarpuji ma Ia saonnari bope ro di salolot-lolotna. Amen.

SURAT NI SI PAULUS TU PARLAGUTAN ROM 16:27

Hum sasada Ia sajo do Debata na sun pistar. Sai marsangap situtu ma Ia salolot-lolotna markite-hite Jesus Kristus i! Amen.

JOHANNES 17:23

sada Au dohot halahi jana sada Damang dohot Au; anso sada situtu halahi jana hara ni i botoon ni portibi on ma Damang do marsuru Au jana dihaholongi Damang do halahi songon panghaholongi ni Damang tu Au.

JOHANNES 7:17

Sanga ise na ra mangihutkon hagiot ni Debata, botoon ni halahi ma sanga na sian Debata do pangajaranKi, sanga na sian roha-rohangKu sandiri.

MATEUS 21:31

Antong, ise do sian anaknia na dua i na mangoloi na nidok ni amangna?” “Siangkaan i ma antong,” ning halahi. Gabe didok Jesus ma tu halahi, “Satutuna Hudok ma tu hamu: Jumolo do angka sijagit pajak dohot angka anak boru siparkarosuan gabe anggota ni Harajaan Ni Debata ulang pado hamu.

MATEUS 7:21

“Nada sude halak na mamiohon Au, ‘Tuhan, Tuhan’, giot masuk tu Harajaan Ni Banua Ginjang. Tapi hum halak na patuluskon hagiot ni Damang na di banua ginjang i do.

MATEUS 12:50

Halak na patuluskon na nipangido ni roha ni Damang na di banua ginjang i, i do kahanggingKu, i do ibotongKu, i do dainang.”

2 JUJUR TAON 30:12

Di Juda pe markarejo do Debata jana dipasada Ia do roha ni rayat i anso marsitutu mangoloi hagiot ni Debata marhite na mangihutkon parenta ni raja i dohot angka pagawena i.

2 TIMOTEUS 3:17

Mardongan Buku Na Badia i dipasingkop do sadenggan-dengganna sanga ise na mangoloi Debata di sude ragam ni parkarejoan na denggan.

IBRANI 12:28

Hara ni na dung tajagit harajaan na so tarhutur i, beta ma tadok tarimakasi jana mangoloi tu Debata mangihutkon angka tona na tama tuSia, mardongan sangap dohot biar.