HOSEA 4:12 - BIBEL JAMITA NA DENGGAN

¹² Marsapa do bangsongKu tu bona ni hayu! Dipaboa sada tungkot do tu hamu sanga aha na giot sibotoonmunu! Ditadingkon hamu do Au. Songon sada anakboru na gabe panggampang, songon i ma dibaen hamu pasahat dirimunu tu angka debata.

HOSEA 4:12 Referans Kwoze

HOSEA 5:4

Patunda ni hajahatan na nibaen ni halak Israel, nada tarbaen halahi be mulak tu Debata ni halahi. Harana na marsomba gana-ganaan noma na manggohi roha ni halahi jana nada parduli be di Tuhan.

JEREMIA 2:27

Pailaon do hamu, angke didok hamu do amangmunu samponggol hayu jana marpio inang hamu tu sada batu, lalu ditadingkon hamu Au. Hape muda ro hasusaan, dipangido hamu ma anso ro Au giot paluahon hamu.

HABAKUK 2:19

Hona bura ma halak na mangkuling tu hayu santuho, “Ngot ma ho!” Tu sada batu na ngungu, “Jongjong ma ho!” Tarbaen sada patung ma he mandok sangkababa hata tu ho? Nian marlampis sere do i dohot perak, tapi anggo tondi umpe adong di bagasanna.

PANGARATAION 31:16

Didok Tuhan ma tu si Musa, “Nada pola sadia lolot nari marujung ma ngolumu. Dung salpu hamamatemu, nada setia be bangso Israel tu Au jana gagaan ni halahi ma parjanjian na Hubaen i dohot halahi. Tadingkonon ni halahi ma Au laho mamele tu angka debata na asing na nisomba ni angka na maringanan di tano na so sadia lolot nari be masuhanmunu.

BILANGAN 15:39

Hasaya ni rambu-rambu i gabe parningotan ma i. Ganop diida hamu i ingotonmunu ma sude parentangKu jana angkon patulusonmunu. Jadi hara ni i nada hudukkononmunu be Au giot patuluskon lungun ni rohamunu dohot hagiotmunu sandiri.

MIKA 2:11

Sugari ro sahalak na sai margabus, ‘Paboanku ma hasurirangon tu hamu, taringot tu anggur dohot arak.’ Jadi ia do na patut manyurirangi tu bangso on!”

HOSEA 9:1

Ale bangso Israel, ulang be hagodangkon hamu angka ari pestamunu songon angka bangso na asing. Madung ditadingkon hamu Debatamunu jana nada burju hamu tuSia. Di sude luat on, digadis hamu do dirimunu songon panggampang tu Debata Baal, jana sonang rohamunu manjagit gandum na nietong ni rohamunu songon upa ni debata i tu hamu!

JEHESKIEL 21:21

Jongjong ma raja ni Babel di lambung papan tudu-tudu ni dalan i. Laho manontuhon sanga dalan dia na giot bolusonnia, sapaannia do i gana-ganaannia, hursuhonnia pana jana paresoonnia ate-ate ni binatang na baru dipelehon.

JEREMIA 10:8

Sude halahi oto jana bodo angke sombaonna hum hayu sajo do, nada tarajarkonsa na marguna.

MASMUR 73:27

Na giot mago do sanga ise na manadingkon Ho, dipatimpas Ho do sanga ise na so setia tu Ho.

2 JUJUR TAON 21:13

Tapi sabalikna do, songon angka raja ni Israel do ngolu ni raja i, jana mambaen nada setia rayat ni Juda dohot Jerusalem tu Debata. Songon pambaen ni Raja Ahab dohot angka na manggonti ia do pangalaho ni raja i. Dibunu raja i do antong salangkan anggi ni raja i, hape nian umburju dope halahi sian raja i.

HAMALIMON 20:5

Au sandiri ma mangalo halakna i dohot sude na sakeluarga i bope sude halak na rap dohot ia maninggalkon Au gabe kehe manyomba Debata Molok. Nada Huetong be halak na songon i gabe sada sian halakKu hian.

HAMALIMON 17:7

Bangso Israel sude angkon tongtong unduk tu Tuhan jana nada tola manyambol angka pahan-pahanan di ladang i songon na giot pasahaton tu jihin na jahat na manyarupai hambeng. Angkon ihutkonon do paraturan on tongtong lalu tu pudian ni ari salolot-lolotna.

MASMUR 106:39

Pangalaho i ma mambaen hodar halahi; nada setia tu Debata halahi.

HOSEA 14:3

Mulak ma hamu tu Tuhan jana palalu hamu ma tangiang on gabe songon haul tuSia, “Tuhan, sesa ma sude dosanami jana jagit ma tangiangnami on, gabe pujionnami ma Ho laing songon na dung hami janjihon i.

HAKIM-HAKIM 18:5

Jadi didok halahi ma tusia, “Antong anggo songon i, tolong ma jolo sapai tu Debata sanga na marhasil do langkanami on sanga nada.”

2 RAJA-RAJA 17:7

Madabu pe Samaria, hara ni dosa ni Israel do maradopkon Tuhan, Debata ni halahi na dung paluahon halahi sian raja Mesir jana na paruarkon halahi sian luat i. Na marsomba do halahi tu gana-ganaan

JEREMIA 23:13

Madung Huida dosa ni angka panurirang ni Samaria. Mangasahon goar ni Baal do halahi mandok hata jana palilu-liluhon do tu bangsongKi.

JEHESKIEL 20:32

Giotmunu nian tudos ma hamu dohot angka bangso na asing i dohot tu halak na maringanan di tano sileban na manyomba hayu dohot batu. Tapi nada lalu anggo giot ni rohamunu.’ ”

HOSEA 6:10

Huida do sada hajorbuton di Israel: Hodar do dibaen bangsongKi dirina sandiri marhite na manyomba gana-ganaan.