HOSEA 10:5 - BIBEL JAMITA NA DENGGAN

⁵ Mabiar ma halak Samaria; marsak jana tangis ma halahi dohot angka malim na mangkobasi lombu sere na di Bet-Awen i hara ni parmago ni hajagaron ni gana-ganaan ni halahi.

HOSEA 10:5 Referans Kwoze

HOSEA 9:11

Habang noma hagodangan ni Israel mago songon unggas; nada adong be na mardenggan pamatang jana nada adong be dakdanak na sorang.

HOSEA 5:8

Palu ma sarune di Gibea! Baen ma tanda ni pio-pio marporang di Rama! Surakkon ma surak-surak parporangan di Betel! Maju ma marporang, hamu halak Benyamin!

HOSEA 4:15

Ale hamu halak Israel, haru pe nada unduk hamu tu Au, sai ulang ma nian dohot Juda mambaen hasalaan na nibaenmunu i! Ulang maribadat di Gilgal sanga di Bet-Awen. Ulang baen hamu janji disi mangasahon goar ni Tuhan na mangolu i.

2 RAJA-RAJA 23:5

Dung i dipaantak ia ma angka malim na dung niangkat ni angka raja ni Juda na markarejo di langgatan ni angka debata di angka kota ni Juda dohot di na humaliang Jerusalem, songon i muse angka malim na mamelehon haul tu Baal, tu mataniari, bulan, planet dohot angka bintang.

HOSEA 13:2

Lopus saonnari laing torus dope mardosa angka halak Efraim i; dipambaeni halahi do angka patung sian perak na nirangrangan ni akal ni jolma jana na nigana ni tangan ni jolma lalu disomba ma i. Didok halahi, “Pelehon ma haul tu angka patung on!” Padiar ma diummai jolma i angka anak ni lombu i!

BAENON NI ANGKA RASUL 19:27

Hara ni i, sego ma goar ni parusahoanta on. Tapi nada hum i sajo, marlayas muse dope goar ni bagas paribadatan ni Dewi Artemis, jana etongon ni halak ma hasangapannia i songon sisoada; hape nian ia do dewi na nipasomba-somba ni sude halak na di Asia on, dohot na satano on!” ning ia.

ZEPANYA 1:4

UhumanKu ma sude na maringanan di Jerusalem dohot na di Juda sudena. Teba-teba ni parsombaan tu Baal pe abiskononKu ma sian i. Halupahonon noma sude angka malim na mangoloi Baal dohot angka debata na asing i.

2 JUJUR TAON 11:15

Madung diangkat si Jerobeam angka malimnia sandiri laho manghobasi di angka inganan parsombaan ni gana-ganaan dohot parsombaan ni begu, jihin maradu patung ni lombu na nibaennia sandiri.

2 RAJA-RAJA 17:16

Dilaosi halahi do sude Tona Ni Tuhan, Debata ni halahi jana dibaen halahi do dua lombu logam sisombaon ni halahi. Dibaen halahi ma gana-ganaan ni Debata Asera, disomba halahi angka binatang jana marsomba halahi tu Debata Baal.

2 RAJA-RAJA 10:29

Jadi gabe didok Tuhan ma tu si Jehu, “Madung dipatulus ho tu pomparan ni si Ahab sandok na Huparentahon tu ho. Hara ni i marjanji ma Au, anggo pomparanmu lopus tu sundut paopatkon, gabe raja ma di Israel.” Tapi nada sian burju ni si Jehu mangoloi Tuhan, Debata ni Israel; songon si Jerobeam do ia na mambaen halak Israel gabe mardosa di na nisurunia halahi mamele lombu sere na nipajongjong ni si Jerobeam di Betel dohot di Dan.

HAKIM-HAKIM 18:24

Dialusi si Mika ma, “Ulang ma paula so diboto hamu! Nada he, hamu mambuat angka patung dohot malimna i jana dilarihon hamu? Saonnari nada adong be bagi na ahangku!”

JOSUA 7:2

Na disuru si Josua do di hatiha i piga-piga halak sian Jeriko tu Ai, i ma sada kota di Habincaran ni Betel, na di lambung ni Bet-Awen. Na disuru do halahi kehe laho manangkasi luat i. Dung sidung dipadalan halahi karejo i,

2 JUJUR TAON 13:8

Saonnari diambang ho ma lakna tarbaen mangalo kuaso na nilehen ni Tuhan tu pomparan ni si Daud, hara ni godang ni pasukanmu dohot hara ni na adong angka lombu seremunu na nibaen ni si Jerobeam gabe debatamunu.

JESAYA 46:2

Patung na nisombaan nada margogo palua dirina, sude hona taban jana dioban.

HOSEA 9:1

Ale bangso Israel, ulang be hagodangkon hamu angka ari pestamunu songon angka bangso na asing. Madung ditadingkon hamu Debatamunu jana nada burju hamu tuSia. Di sude luat on, digadis hamu do dirimunu songon panggampang tu Debata Baal, jana sonang rohamunu manjagit gandum na nietong ni rohamunu songon upa ni debata i tu hamu!

AMOS 3:14

Di ari i di na manguhum Au tu halak Israel hara ni dosana, sarsarkononKu ma angka langgatan na adong di Betel. Ponggolkonon ma sude ujung ni angka langgatan i, anso dabu sude tu tano.