HOSEA 10:1 - BIBEL JAMITA NA DENGGAN

¹ Tudos tu bona ni anggur na ramos marbatu do Israel. Mur martamba-tamba sinadonganna, mur bahat angka langgatan na nibaenna. Mur tamba denggan tano i, mur jeges muse dibaensa angka tugu ni gana-ganaan na nisombana i.

HOSEA 10:1 Referans Kwoze

HOSEA 8:11

Mur bahat langgatan dipajongjong halak Israel laho manyesa dosa, mur bahat muse do inganan ni halahi laho mambaen dosa!

HOSEA 12:11

Madung manghobari Au tu angka panurirang, jana Hulehen bahat parnidaan tu halahi. Marhite sian halahi Hulehen do sipaingot tu hamu, bangsongKu

PILIPPI 2:21

Anggo na asing i do, hum na pareso tu dirina sandiri be do, jana nada tu haporluan ni Jesus Kristus.

JEREMIA 2:28

Di dia ma he angka debatamunu na nipaturemunu i? Muda masa hasusaan suruhon ma halahi paluahon hamu, anggo tarbaensa do! O ale Juda, bahat ni angka debatamu sabahat ni angka kotamu!

HAMALIMON 26:1

Didok Tuhan ma, “Nada tola baenonmunu gana-ganaan sanga pajongjong patung sanga pe tiang batu na niuhir gabe sombaon, Au do Tuhan Debatamu.

1 RAJA-RAJA 14:23

Di ginjang ni angka dolok dohot di toru ni angka hayu na godang, dipajongjong halahi do angka inganan parsombaan tu gana-ganaan jana dipajongjong halahi angka tugu dohot angka gambaran ni debata boru-boru Asera baen sombaon.

2 KORINTUS 5:16

Jadi hara ni i, nada marguru tu parsuhatan ni jolma be hami manimbang halak. Najolo jungada do hami parsuhatkon parsuhatan ni jolma tu Kristus, tapi anggo saonnari nada be.

NAHUM 2:2

Satutuna do na giot pasuangon ni Tuhan hagodangan ni si Jakob songon hagodangan ni Israel, anso mulak songon najolo taran so dirampas angka musu.)

HOSEA 13:6

Hape dung lalu hamu di tano na denggan jana butongan hamu lopus sombu, gabe ginjang ma rohamunu jana lupa ma hamu tu Au.

HOSEA 13:2

Lopus saonnari laing torus dope mardosa angka halak Efraim i; dipambaeni halahi do angka patung sian perak na nirangrangan ni akal ni jolma jana na nigana ni tangan ni jolma lalu disomba ma i. Didok halahi, “Pelehon ma haul tu angka patung on!” Padiar ma diummai jolma i angka anak ni lombu i!

HOSEA 12:8

Didok Tuhan ma tu bangso Israel, “Geduk do hamu songon halak Kanaan; mangicu do angka parboniaga sian hamu tu langgananna marhite timbangan na so tutu.

HOSEA 8:4

Dipili bangsongKu do raja so jolo marsapa tu Au. Diangkat halahi pamimpin so dohot parbinotoanKu. Dibuat halahi do sere dohot perak ni halahi lalu dibaen patung ni gana-ganaan na mangalapi hamamago ni halahi sandiri.

HOSEA 2:8

Nada jungada dioku inangmi paboa Au do na mangalehen gandum, anggur, miak zetun dohot sere dohot perak bage na nipakenia i laho marsomba Baal i.

HOSEA 3:4

Songon i muse ma pangalaho ni bangso Israel; lolot halahi mangolu tapi nada adong rajana, nada marpamimpin nada adong haul, nada adong gana-ganaan, jana nada adong efod dohot terafim.

HOSEA 4:7

Mur martamba bahatmunu, mur mardosa muse do hamu tu Au, ale angka malim! Harana angkon paubaonKu do na masa tu hamu. Nada pasangapon be hamu tapi palayason noma.

HOSEA 13:15

Haru pe sonang Israel songon duhut na napu, laing suruonKu ma alogo Habincaran na milas i sian padang parhorsihan. Mahiang ma baenon ni alogo i sude mual ni aek dohot angka sumur bage, gabe mago ma sudena na mararga.

JEREMIA 11:13

Sun do bahatna debata ni halak Juda, sarupa dohot bahat ni kota ni halahi. Madung dipajongjong halak Jerusalem angka langgatan sabahat ni angka dalan di kota Jerusalem, i ma parhaulan ni haul tu Debata Baal sihagigian i.

JEREMIA 11:17

Au do na pajongjong Israel dohot Juda, Au Tuhan Na Markuaso tapi anggo saonnari madung Husangkapi laho parohon hamamago tu halahi. Halahi sandiri do mangalap-alapi sudena i, patunda ni hasalaan ni halahi; dihaulkon halahi haul tu Baal, hara ni i do umbaen na gabe muruk Au.”

HOSEA 2:10

PatalahonKu ia di jolo ni sude haholongan ni rohana. Sahalak pe nada adong na margogo paluahon ia sian kuasongKu.