HOSEA 1:7 - BIBEL JAMITA NA DENGGAN

⁷ Tapi haholonganKu do halak Juda, jana paluaon halahi marhite goar ni Tuhan, Debata ni halahi. PaluaonKu do halahi, sior sanga podang, parhohas ni porang sanga kudo dohot halak na mangalombutsa.”

HOSEA 1:7 Referans Kwoze

ZAKARIA 4:6

Disuru surusuruan i ma au palaluhon tu si Zerubabel tona ni Tuhan songon on, “Nada markite-hite gogo ni parangan jana nada muse marhite hagogoonmu sandiri gabe manjadi karejomu, tapi marhite tondingKu do ninna Tuhan Na Markuaso.

JESAYA 12:2

Debata do da haluaanku, porsaya tuSia do au. Nada adong na mambaen au mabiar, angke Tuhan Debata do hagogoanku dohot ende-endengku, Debata do na paluahon au, Ia do haluaanku.

2 RAJA-RAJA 19:35

Laing di borngin i ro ma Surusuruan Ni Tuhan tu parbandaran ni halak Asur mamatehon 185.000 halak paranganna. Ancogotna i manyogot marragean ma angka bangke i!

JESAYA 7:14

Hara ni i Tuhan sandiri ma mangalehen sada tanda di hamu: Sasintongna, sada halak anakboru angkon mardenggan pamatang jana manubuhon sada anak, jana goaronnia ma Anak i “Immanuel”.

JESAYA 49:6

“Pamenek tu ma ho muda hum gabe naposongKu, laho pajongjongkon marga-marga ni Jakob, laho paulakkon halak Israel na tading i. Tapi baenonKu ma ho gabe sinondang di angka bangso anso haluaan na sian Au lalu tu ujung ni tano on.”

MASMUR 33:16

Nada monang raja hara ni godang ni kuasona, nada malua ulubalang hara ni godang hagogoon.

1 SAMUEL 17:47

jana sudena halak na adong dison marnida na so porlu di Tuhan tombak sanga podang laho paluahon bangsoNa. I ma da na monang di parporangan on jana pasahatonNia ma hamu tu bagasan tangannami.”

2 RAJA-RAJA 19:29

Dung i ditonahon si Jesaya ma tu si Hiskia, songon on, “Songon on ma tandana na giot tarjadi. Di taon on dohot di taon na ro, mangan gandum na tubu sandiri ma hamu. Tapi dung salpu i, tarbaen hamu ma manyuan gandum dohot anggur jana daionmunu ma suhana.

JESAYA 30:18

Haru pe songon i, laing dipainte Tuhan dope hatihana laho patuduhon tu hamu ibo ni rohaNia. Rade do Ia laho maribo ni roha tu hamu, angke Tuhan i do Debata na tigor. Martua do na marpos ni roha tuSia.

JEREMIA 25:5

Disuru halahi do hamu manadingkon parngoluonmunu na jahat i dohot angka parbuatanmunu na gok dosa i anso tarbaen hamu hot maringanan di tano pusako na nilehen ni Tuhan tu hamu dohot tu angka ompumunu songon tano pusako.

JEREMIA 25:6

Diorai angka panurirang do hamu mamele dohot mangoloi tu angka debata. Diorai halahi do hamu marsomba gana-ganaan na nibaenmunu sandiri, angke na songoni do mambaen muruk Tuhan. Sugari diihutkon hamu parenta ni Tuhan i, nada hona uhumNia hamu.

JEREMIA 33:26

laing songon i ma tongtong tioponKu parjanjianKu dohot pomparan ni si Jakob dohot naposongKu si Daud. TodoonKu ma sahalak sian pomparan ni si Daud laho mangarajai pomparan ni si Abraham, si Ishak dohot si Jakob. Maribo ni roha ma Au tu bangsongKu jana sonang halahi baenonKu.”

HOSEA 1:8

Dung sirang managuk dakdanak na paduahon i, denggan muse ma pamatang ni si Gomer jana sorang ma sada anak halaklahi.

HARURUAR 14:13

Dialusi si Musa ma, “Ulang hamu mabiar! Martahan ma hamu, idaonmunu ma sanga aha sibaenon ni Tuhan laho paluahon hamu sadari on; nada idaonmunu be halak Mesir i.

HARURUAR 14:30

Di ari i ma dipalua Tuhan bangso Israel sian halak Mesir, jana diida halak Israel do angka bangke ni halak Mesir i marpayahan di topi ni laut i.

2 RAJA-RAJA 6:18

Jadi taran mangaroro halak Siria i, martangiang ma si Elisa, “Tuhan papitung ma mata ni halak Siria on!” Dioloi Tuhan ma tangiang ni si Elisa i jadi gabe mapitung ma halahi sude.

2 RAJA-RAJA 19:34

AbarahononKu ma Jerusalem jana ondihononku, hara ni sangap na tu Au sandiri boti hara ni parjanjianKu sandiri tu naposongKu si Daud.’ ”

MASMUR 44:7

Tapi Ho do na paluahon hami sian musunami; madung ditaluhon Ho angka halak na manghosomi hami.