HARURUAR 34:16 - BIBEL JAMITA NA DENGGAN

¹⁶ Muda dialap hamu boru ni halahi gabe parumaenmu, jana markarosuan ma angka daboru i mangihutkon debata ni halahi, gabe elek-elekon ni halahi ma angka anakmi anso dohot markarosuan mangihutkon debata ni halahi.

HARURUAR 34:16 Referans Kwoze

ESRA 9:2

Halaklahi sian halak Jahudi mambuat boru sian bangso na asing i, jadi gabe nada polin be bangso i na dihapunjungkon nampuna ni Tuhan. Angka hatobangon dohot angka pejabat ni Israel muse do na pajolohon mambaen na songon i.

NEHEMIA 13:25

Hugorahon antong halahi jana huburai. Adong do na hubalbali jana hujangging obukna i, dung i husuru ma halahi marsumpa mangasahon goar ni Debata songon on: “Na so jadi lehenonmunu borumunu tu anak ni halahi, jana na so jadi alaponmunu boru ni halahi bahen dadaborumunu, sanga bahen dadaboru ni anakmunu sandiri!”

NEHEMIA 13:23

Laing huida muse ma di hatiha i na dung bahat do hape halak Jahudi na mambuat boru sian bangso Asdod, Amon dohot Moab.

JOSUA 23:12

Muda nada setia be hamu, gabe diihutkon hamu angka bangso na tinggal i dope di tonga-tongamunu jana marbagasi hamu dohot halahi,

JOSUA 23:13

ingot hamu ma pasti nada paoroton ni Tuhan Debatamu angka bangso i di hamu. Tapi sabalikna, gabe parmaraan godang noma halahi di hamu, angke na gabe jorgong noma halahi sanga songon tirangkap di hamu. Halahi pe baenonna ma hamu markancit situtu; angke na gabe songon sambok-sambok do halahi tu tanggurungmunu sanga songon duri di bagasan matamunu. Sai torus ma hamu markancit lopus umpe adong be sahalak sian tonga-tongamunu na tading di luat na denggan on na nilehen ni Tuhan Debatamunu di hamu.

HAKIM-HAKIM 3:6

Marsibuatan boru ma halak Israel dohot angka bangso i. Jana dohot ma halak Israel marsomba tu angka debata ni halahi.

HAKIM-HAKIM 14:3

Tapi dialusi amangnia dohot inangnia i ma, “Biasi lakna angkon sai tu halak Pilistin na so saugamo i dohot hita ampal kehe laho mambuat boru? Adong he na so adong be lakna sian marganta sandiri sanga sian tonga-tonga ni bangsonta sada boru na tumbuk?” Dialusi si Simson ma tu amangnia i, “Tapi boru Pilistin i do por ni rohangku. Jana giotku disapai amang ma i di au.”

1 RAJA-RAJA 11:1

Por ma roha ni si Salomo mida bahat dadaboru sian bangso na asing. Asing sian boru ni raja Mesir i, laing dibuat si Salomo do muse angka boru Het, boru Moab, boru Amon, boru Edom dohot boru Sidon.

ESRA 9:12

Dilarang angka panurirang i do nian hami marsibuatan boru dohot angka jolma i, sanga pe mangurupi halahi mambaen sonang dohot marsonang. Muda mangoloi hami, hatabohononnami ma tano i jana pateankononnami tu pomparannami salolot-lolotna.

NEHEMIA 10:30

Hami sumpahon, na so marsibuatan boru hami dohot angka bangso na asing na maringanan di luatnami.

PAMUNGKAAN 24:3

Sumpahon ma mangasahon goar ni Tuhan, Debata na mangarajai langit dohot tano, bahaso na so jalahanmu boru sian halak tano Kanaan on di si Ishak anakki.

HAMALIMON 21:15

Muda dibaen ia songon i, sude anaknia na badia hian, gabe ramun noma. Au do Tuhan jana na dung Hutodo do ia gabe Malim Godang.”

HAKIM-HAKIM 3:5

I ma dalanna laing tong maringanan di luat i halak Kanaan, Het, Amori, Peris, Hewi dohot Jebus rap dohot halak Israel.

HAKIM-HAKIM 8:27

Dipauli si Gideon ma sian sere i sada patung ni gana-ganaan, dibaen ia ma i di hutania, i ma di Ofra. Kehe ma tusi sude halak Israel laho marsomba gana-ganaan i, jabat nada diparrohahon halahi be Debata. Jana pangalaho i ma na gabe songon jorgong di si Gideon dohot di keluargania.

1 RAJA-RAJA 21:25

Nada jungada adong halak na songon si Ahab situtu ni rohana mambaen na jahat di adopan ni Tuhan. Hara ni panyosoi ni si Isebel na nibuatnia i ma sudena hajahatan i dibaen ia.

2 JUJUR TAON 21:11

Mur dipajongjong ia muse dope tehe angka inganan parsombaan ni gana-ganaan na di luat partoran Juda, jana hara ni ia gabe mardosa ma rayat ni Juda dohot Jerusalem tu Tuhan.

NEHEMIA 10:31

Muda adong bangso na asing na giot manggadis gandum sanga na barang aha pe tu hami di Ari Sabat sanga di ari na badia na asing i, nada giot tobusonnami i. Ganop di taon papituhon, nada giot karejohononnami ladang jana nada tungguonnami utang.

MASMUR 106:39

Pangalaho i ma mambaen hodar halahi; nada setia tu Debata halahi.

HOSEA 1:2

Hatiha mulai Tuhan manghatai marhite si Hosea, didok Ia ma tu si Hosea, “Kehe ma ho, buat ma sada halak siboru jalang baen dadaborumu, jana anakkon ma angka anak gampang, angke madung ramun kota on marhite na manundalkon Tuhan.”