HAGAI 2:5 - BIBEL JAMITA NA DENGGAN

⁵ Di na haruar hamu sian Mesir, na dung Hujanjihon do sai ondihononKu hamu. Jana saonnari pe Huondihon do hamu. Jadi ulang pola mabiar hamu.

HAGAI 2:5 Referans Kwoze

HARURUAR 34:10

Didok Ia ma tu si Musa, “Saonnari baenonKu ma parjanjian. BaenonKu ma angka hahomangan di jolo ni bangsomon, songon na so jungada tarjadi di sude tano on di tonga-tonga ni angka bangso. Idaon ni sude bangso na humaliang hamu ma, na nibaen ni Tuhan, angke sanga aha na Hubaen rap dohot ho, pambaenan na godang situtu do i.

NEHEMIA 9:20

Marhite kuasoMu na denggan i, diajar Ho do halahi. Mangan manna halahi jana minum aek tuk disi.

JESAYA 41:13

Au Tuhan, Debatamu, maniop tangan siamunmu; ningKu do, ‘Ulang ho mabiar, urupanKu do ho.’ ”

ZAKARIA 8:13

Jana na jolo madung manjadi bura hamu di tonga-tonga ni angka bangso, o hamu halak Juda dohot halak Israel. Jadi saonnari giot paluaonKu noma hamu, anso gabe pasupasu hamu. Ulang hamu mabiar, patogu ma rohamunu!”

ZAKARIA 8:15

Tapi saonnari giot pasupasuonKu ma halak Jerusalem dohot na maringanan di Juda. Jadi ulang be hamu mabiar.

BAENON NI ANGKA RASUL 27:24

Didok surusuruan i do tu au songon on, ‘Ulang ho mabiar Paulus! Angke tulus do ho mangadop tu Kesar i. Jana hara ni denggan ni roha ni Debata maradopkon ho, gabe malua do sude donganmu sakapal hara ni ho,’ ninna.

JESAYA 41:10

Ulang ho mabiar Au do rap dohot ho, Au do Debatamu, ulang heput ho. Hupatogu do ho, Hulehen pangurupion, Huondihon jana Hupalua ho.

HALUMBAAN 1:17

Di na mangaligi au tuSia, tungkap ma au tu joloNia songon halak na dung mate. Tapi dibaen Ia ma tu au tangan siamunNia didok Ia ma, “Ulang ho mabiar! Au do Na Parjolo dohot Na Parpudi.

MATEUS 28:5

Didok surusuruan i ma tu angka dadaboru i, “Ulang hamu mabiar! Huboto do na manjalahi Jesus na diparsilangkon i do hamu.

ZAKARIA 4:6

Disuru surusuruan i ma au palaluhon tu si Zerubabel tona ni Tuhan songon on, “Nada markite-hite gogo ni parangan jana nada muse marhite hagogoonmu sandiri gabe manjadi karejomu, tapi marhite tondingKu do ninna Tuhan Na Markuaso.

NEHEMIA 9:30

Sian taon tu taon sai sobar Ho paingotkonsa; marhite panurirang, didok TondiMu tu halahi. Hapengani ditutup bangsoMi do pinggolna, lalu dipasahat Ho ma tu angka bangso sude tanona.

2 JUJUR TAON 20:17

Nada pola porlu hamu martempur di porang on. Jongjong sajo ma hamu songon i di inganan ni parkarejoanmunu jana painte hamu ma disi. Idaonmunu ma Tuhan mangalehen hamonangan di hamu. O hamu halak Juda dohot Jerusalem, ulang hamu gamang sanga na mabiar. Masuhi hamu sajo ma songon i parporangan i, tolongon ni Tuhan do hamu!”

JOSUA 8:1

Didok Tuhan ma tu si Josua, “Kehe ma ho dohot sude tentarami tu Ai. Ulang gamang hamu jana ulang mabiar! Giot baenonKu do ho monang maralohon raja ni Ai, kotana dohot luatna i gabe ho nampunasa.

HARURUAR 34:8

Diompot si Musa ma mangalompit tot tu tano marsomba.

HARURUAR 19:4

“Madung diida hamu sanga aha Na Hubaen, Au Tuhan mambaensa maradopkon halak Mesir, jana sanga songon dia Hubaen maroban hamu tu Au di inganan on mardongan kuaso na godang songon unggas rajawali na maroban anakna di ginjang ni habongna.

HARURUAR 19:6

tapi hamu ma na gabe songon malim na mangoloi Raja i, bangso na badia. On do angka hata sidohononmu tu angka halak Israel.”

HARURUAR 24:3

Jadi kehe ma si Musa jana dipabotohon ia ma tu bangso i sude parenta dohot aturan na nilehen ni Tuhan i. Rap mangalusi ma rayat i sanoli mandok, “Patulusonnami ma sude na nidok ni Tuhan i.”

HARURUAR 24:8

Jadi dibuat si Musa muse ma mudar na di mangkuk-mangkuk i jana dipispiskon ia ma i tu rayat i. Ning ia ma, “Mudar on ma tanda ni parjanjian ni Tuhan dohot hamu di na nilehenNia angka parentaNia on.”

JOSUA 1:9

Ingot, madung Huparentahon tu ho anso marpos ni roha situtu ho! Ulang ho mabiar sanga hurang semangat, angke Au Tuhan Debatamu, sai na dongananKu do ho sanga na tu dia pe ho kehe.”

1 SAMUEL 12:20

Gabe dialusi si Samuel ma, “Ulang hamu mabiar, haru pe na dung dibaen hamu hajahatan i, ulang ma hamu marbalik sian Tuhan, tapi sai tongtong ma hamu mangoloi tuSia sian sandok rohamunu.