BILANGAN 4:15 - BIBEL JAMITA NA DENGGAN

¹⁵ Muda dapot hatiha mambuka parbandaran i horong ni Marga Kehat angkon ro be ma mamorsan barang-barang na badia i, tapi angkon dung sidung pe ditutupi si Harun dohot angka anaknia barang-barang bope parkokasna i. Angke halak sian Marga Kehat, nada tola dais tu barang-barang na badia i, muda dais halahi angkon mate halahi. Songon i ma karejo ni Marga Kehat muda giot paimbaron ma Bandar Parmianan.

BILANGAN 4:15 Referans Kwoze

BILANGAN 7:9

Tapi anggo anak ni si Kehat, nada adong dijagit halahi padati dohot lombu sian si Musa, angke sude barang-barang na badia siuruson ni halahi, angkon porsanon ni halahi di abara ni halahi.

PANGARATAION 31:9

Dung i disuratkon si Musa ma angka Tona Ni Tuhan Debata jana dilehen ia ma i tu angka Malim Levi na ditugaskon mangurus Poti Parjanjian i, dohot tu angka pamimpin ni Israel.

BILANGAN 10:21

Dung i mardalan ma Marga Levi sian horong ni Marga Kehat, lalu maroban barang-barang na badia. Di hatiha bolkas halahi tu parbandaran na giot topoton, madung sidung dipajongjong mangulahi Bandar Parmianan Ni Tuhan.

1 JUJUR TAON 15:2

Dung i didok si Daud ma, “Hum halak Levi sajo do na tola mangangkat Poti Parjanjian ni Tuhan, harana halahi do na nitodo ni Tuhan laho mamorsan Poti i dohot na mangoloi Ia salolot-lolotna.”

1 SAMUEL 6:19

Tapi hara ni na ditungkir ni halak Bet-Semes tu bagasan Poti Parjanjian ni Tuhan i, gabe hona bunu do dibaen Tuhan sian halahi pitu pulu halak. Gabe marsiluluton ma rayat i hara ni na nipadondonkon ni Tuhan sitaonon na songon i godang tu halahi.

1 JUJUR TAON 15:15

Jana di na paimbarkon Poti i, ditandu halahi ma mamake porsan-porsan di abara ni halahi, domu tu na dung diaturkon ni Tuhan markite-hite si Musa.

2 SAMUEL 6:13

Jadi dung mangalangka angka jolma na maroban Poti Parjanjian i onom langka, disuru si Daud ma halahi maradian. Dung i dihaulkon ia ma tu Tuhan haul lombu jantan dohot anak ni lombu na dipamokmok.

JOSUA 4:10

Anggo angka malim i laing jongjong do di tonga-tonga ni Jordan lopus sidung angka halahi patuluskon sude na niparentahon ni Tuhan tu halahi marhite si Josua. Laing hombar do sudena i tu na nidok ni si Musa tu si Josua. Horas do halak Israel manaripari batang aek i.

BILANGAN 3:38

Si Musa dohot si Harun, bope angka anak ni si Harun, marbandar di jolo ni Bandar Parmianan Ni Tuhan, sabola sian Habincaranna. Karejo ni halahi do marhobas padalan upacara ibadat di halak Israel, di bagasan Inganan Na Badia i. Sanga ise halak na asing na manguji mangkarejohon songon i angkon mate uhuman.

BILANGAN 1:51

Muda bungkas hamu, halak Levi i ma mambuka Bandar ParmiananKi, dung i mamasang mangulahi di inganan parbandaran na baru. Asing sian halahi, sanga ise na donok tu Bandar Parmianan angkon mate uhuman.

HARURUAR 19:12

Baen ma batasna humaliang pat ni dolok on, tanda ni na so tola boluson ni bangso i. Baen ma larangan tu bangso i na so tola halahi manangkok tu dolok on, salang padonok-donokkon pe ulang. Sanga ise na manyalpui batas i, nimatehon do.

HARURUAR 27:7

jana surukkon ma tu golang-golang pamorsanan na di topi ni langgatan i ganop mamorsan langgatan i.

HAMALIMON 16:13

Di jolo ni Tuhan angkon baenonnia hamonyan i tu bagasan api. Digohi timus i ma tutup ni Poti Parjanjian i, anso ulang tarpaida si Harun – angke, muda diida ia i, mate noma ia.

BILANGAN 1:50

Dokkon ma anso halahi markarejo di Bandar ParmiananKu dohot pasingkop parkokasna. Karejo ni halahi, i ma: Mamorsan Bandar ParmiananKi dohot parkokasna lalu markarejo gabe malim jana marbandar humaliangna.

BILANGAN 4:14

Di ginjangna i muse angkon payakkonon ni halahi di langgatan i sude parkokas na nipake hatiha maribadat di langgatan i: Inganan ni api, garpu, sodok dohot sambong. Dung i tutupon ni halahi ma i dohot sangkarambar bobak na halus lalu dipamasuk hayu pamorsan i.

BILANGAN 4:20

Tapi muda laing masuk dope halak Kehat i tu bagasan mangaligi angka malim i manyimpan barang na badia na giot pindahonon i, angkon mate do halak Kehat i.”

BILANGAN 18:3

Angkon karejohonon ni halak Levi na porlu di hamu, mangkarejohon tugas ni halahi di Bandar Parmianan, tapi nada tola dais halahi tu barang Inganan Na Badia sanga di langgatan. Muda dais halahi tusi, bope ho, angkon mate.

2 SAMUEL 15:24

Laing dohot do disi Malim Zadok dohot Malim Abyatar maradu sude halak Levi na maroban Poti Parjanjian ni Tuhan i. Dipayakkon ma Poti Parjanjian i jana nada diangkat dope painte so sude rayat i manadingkon kota i.

1 JUJUR TAON 23:26

Hara ni i, nada jabat dohot be halak Levi mananggung na hasaya di Bandar Ni Tuhan dohot sude parkokas sipakeon di paribadatan.”

HARURUAR 19:21

jana didok Tuhan ma tusia, “Manuat ma ho paingotkon bangso i bahaso na so tola halahi manyalpui batas i giot ro tuson laho mangaligi Au. Muda laing dilanggar halahi do antong, bahat do sian halahi marmatean.

1 RAJA-RAJA 8:3

Dung i diangkat angka malim i ma Poti Parjanjian i,