BILANGAN 12:8 - BIBEL JAMITA NA DENGGAN

⁸ Jadi mangkatai Au dohot ia paadop-adop bohi be, tangkas nada markuling-kulingan. Salang tompangKu pe madung diida ia! Biasi puluk dope hamu mangalo ia?”

BILANGAN 12:8 Referans Kwoze

PANGARATAION 34:10

Nada adong dope di Israel sada panurirang songon si Musa na paadop-adop mangkobari dohot Tuhan.

1 KORINTUS 13:12

Sanga aha na taida saonnari, tarsongon halinu na hurang torang do i di sormin. Tapi anggo saulahon idaonta ma tangkas pangalaho na satutuna. Saonnari hurang tangkas dope parbinotoan na adong di au, tapi anggo saulahon botoonniba ma tangkas, songon tangkas ni parbinoto ni Debata di au.

HARURUAR 33:23

Dung salpu i, Huela ma tanganKi jana idaonmu ma Au sian pudingKu tapi nada idaonmu anggo bohingKu.”

HARURUAR 33:11

Jana marsiadopan bohi do Tuhan manghatai dohot si Musa songon sada halak na manghatai dohot donganna; dung sidung, mulak ma ia mangulahi tu parbandaran. Tapi anggo pangoloinia si Josua anak ni si Nun, na poso dope. Anggo ia nada morot sian bandar i.

LUKAS 10:16

Dung i mandok hata ma Jesus tu angka siseanNia, “Angka halak na manangihon na nidokmunu sarupa do i tu na manangihon sanga aha na Hudok tusia. Halak na so ra manjagit hamu, laing na so ra manjagit Au do i. Jana halak na so ra manjagit Au, sarupa do i tu na so ra manjagit na marsuru Au.”

JOHANNES 15:15

Anggo hamu nada Hugoari be naposo, harana anggo naposo nada diboto ia sanga aha na nikarejohon ni morana. Dongan do hamu Hugoari, harana sude na Hubege sian Damang madung Hupaboa tu hamu.

2 PETRUS 2:10

lumobi ma i angka jolma na mangoloi angka hagiot na pahodarkon dirina, jana mangincahi harajaan ni Tuhan i. Puluk-puluk do angka guru pargabus i jana ginjang-ginjang do roha ni halahi; nada pola alang roha ni halahi mangalayasi Na Sangap i.

1 TIMOTEUS 6:16

Hum Ia sajo do na so tarkuasoi hamatean; di bagasan sinondang na so hadonohan sanga ise pe. Nada adong sahalak jolma pe na jungada marnida Ia, sanga na tarbaen marnida Ia. Angkon lehenon ma nian tuSia sangap dohot kuaso salolot-lolotna! Amen.

2 KORINTUS 3:18

Saonnari nada nigupgupan be bohinta. Songon sormin na nisondangan dohot hatiuran ni Tuhan Jesus do hita. Jadi hara ni i, torus do hita dipauba anso gabe songon Ia, mur honok, mur marsinondang do hita hara ni hatiuran na sian Tondi Ni Tuhanta i.

JOHANNES 15:24

Madung Hubaen di tonga-tonga ni halahi angka pangalaho na so jungada dibaen halak na asing sanga ise pe. Sugari na so Hubaen angka na songon i di tonga-tonga ni halahi, ias do halahi sian hasalaan. Saonnari haru pe madung diida halahi angka pangalaho i, hape laing hosom dope roha ni halahi tu Au dohot tu Damang.

MASMUR 17:15

Tapi di bagasan hatigoran do, giot tataponku bohimu. Muda dung ngot au rap dohot Ho mambaen jop rohangku.

JUDAS 1:8

Laing dohot dalan na songon i muse ma angka halak na manyisip masuk tu tonga-tonganta na mambaen dosa tu pamatang ni halahi sandiri hara ni angka nipina. Layas do diida halahi kuaso ni Debata jana dipabile halahi do angka na sangap na di banua ginjang i.

IBRANI 1:3

Ia do sinondang hasangapan ni Debata, jana Ia do gambaran ni Debata sandiri dohot na mangasahon sasude markite-hite hataNia na gok kuaso. Dung sidung dipaias Ia jolma sian angka dosa ni halahi, juguk ma Ia di siamun ni Na Sun Margogo i di banua ginjang.

1 TESSALONIKA 4:8

Hara ni i, sanga ise na manulak pangajaran on nada jolma be na nitulakna, tapi na manulak Debata na mangalehen TondiNa na badia i do tu hamu.

JOHANNES 1:18

Nada adong halak na unjung marnida Debata, asing sian Anak Sasada ni AmaNa, na diampuan ni Ama i, jana Ia do na papatarkonsa tu hita.

MATEUS 13:35

Jadi hara ni na songon i, tulus ma tarjadi hata ni panurirang, na mandok songon on, “Marumpama do Au muda mangkatai dohot halahi; giot paboaonKu angka pangalaho na so habotoan dope mamungka sian hajajadi ni portibi on.”

JEHESKIEL 20:49

Jadi hudok ma: “O ale Tuhan Debata, didok halahi tu au: Nada he hum angka hata sindiran do didok ia?”

JEHESKIEL 17:2

Ale anak ni jolma parsantongkinan, hatahon ma sada umpama tu Israel.

JESAYA 46:5

Tu ise ma giot patudosonmunu Au? Adong ma he na tarbaen imbangKu?

JESAYA 40:18

Jadi giot tu aha ma patudosonmu Debata, aha ma didok rohamu na sarupa dohot Ia?

MASMUR 49:4

Parrohahononku ma hata pandohan, lalu mamiltik hasapi, hupatorang impolana.

PANGARATAION 4:15

“Di na mangkuling Tuhan tu hamu sian api i di Dolok Sinai, nada adong diligi hamu rupaNa. Jadi, anso padenggankon di hamu sandiri, patut ma ingotonmunu!

HARURUAR 20:4

Ulang baen di ho patung na manyarupai sanga aha pe na adong di langit di ginjang sanga na adong di tano on bope na adong di aek na di toru ni tano.

KOLOSSE 1:15

Ia do gambaran ni Debata na so tarida, siangkaan ni sude na nitompa i.

BILANGAN 14:14

Jana nadung dibaritahon halahi do angka pangalaho i tu halak na maringanan di luat on. Jadi madung diboto halahi, na rap do Ho dohot hami. Jana madung dibege halahi, bahaso tarida do Ho tangkas muda maradian ombunMu di ginjangnami, dijoloi Ho do hami mardongan tiang ombun muda arian, jana marhite tiang api muda borngin.

HARURUAR 34:30

Disi diida si Harun dohot halak Israel bohinia, diida halahi ma na marsinondang bohina i, jadi gabe mabiar ma halahi mandonohi ia.

HARURUAR 33:19

Dialusi Ia ma, “Hupatidahon pe sude sinondang ni hasangapanKu sian jolomu jana Hupaboa pe goarKu na badia i. Hulehen pe asi ni roha sanga na tu ise silehenonKu asi ni roha jana Huhaholongi ma sanga ise sihaholonganKu.”

IBRANI 1:1

Madung jotjot jana marragam dalanna dibaen Debata laho mangkatai tu angka ompunta markite-hite angka panurirang.

PAMUNGKAAN 32:30

Jadi didok si Jakob ma, “Madung marsuo bohi au dohot Debata, hape laing mangolu dope au.” Jadi dibaen ia goar ni inganan i, Peniel.

PANGARATAION 5:8

Ulang baen di ho patung na manyarupai sanga aha pe diginjang di langit sanga na adong di tano, bope na di aek na di toru ni tano.

PODA 1:6

Marhite dalan na songon i tardodo halahi ma bagasna arti ni poda jana botoonna ma alus ni angka na masa na nipatujolo ni angka halak na marbisuk.

HOSEA 12:13

Gilo do ompunta si Jakob tu Aram jana marinduk somang ma ia tu halak na disi jana marmahan angka biri-biri ni jolma i laho mambuat boru disia.

HARURUAR 19:19

Mur manggogo muse ma sora ni sarune i. Mandok hata ma si Musa, jana dialusi Debata ma dohot ronggur.

BILANGAN 7:89

Hatiha masuk si Musa tu Bandar Na Badia giot mangkatai dohot Ia, dibege ia ma Tuhan i mangkuling tusia sian ginjang ni tutup ni Poti Parjanjian i di antara ni kerub na dua i.

PANGARATAION 18:15

Tapi suruonNia ma tu hamu sian bangsomunu sandiri sada halak panurirang songon au on jana angkon oloanmunu do panurirang i.