AMOS 4:8 - BIBEL JAMITA NA DENGGAN

⁸ Di deba kota ma pola gale halakna hara ni na manguas, manjalahi aek tu kota na asing, hape nada tuk aek na disi. Haru pe songon i, laing na so mulak do hamu tu Au.

AMOS 4:8 Referans Kwoze

AMOS 4:6

Au do na pamasahon haleon potir tu sude kotamunu, hape nada mulak hamu tu Au.

HAGAI 1:6

Madung disabur hamu bahat same, hape saotik do suhana. Adong do nian panganon di hamu, tapi nada tuk pabutongkon siubeonmunu. Minum do hamu nian, tapi nada sombu nguasmunu. Adong do pakeanmunu, tapi nada tuk mambaen las pamatangmunu. Jana upa na nijagit ni pangomo nada tuk laho paudutkon ngolu ni halahi.

1 RAJA-RAJA 18:5

Didok si Ahab ma tu si Obaja, “Beta ma tabolusi sude luat on jana tajalahi ma mual dohot batang aek; betak na adong do dapot hita ruput di kudo dohot bagalta anso ulang pola adong na jabat tamatehon sian pahan-pahananta i.”

MIKA 6:14

Mangan ma hamu, tapi nada marnabutong – mur tongtong noma malean. Angkatonmunu ma angka barang-barang, tapi nada tarjagohon hamu; sanga aha na nijagohonmunu roncohononKu ma i di bagasan parporangan.

HOSEA 7:10

Tarida ma tangkas haginjangon ni roha ni Israel, jana gabe bukti ni hasalaan ni halahi ma i. Haru pe madung tarjadi sudena i, laing na so ra muse do halahi mulak tu Au, Tuhan Debata ni halahi.

JEREMIA 23:14

Tapi madung Huida jumahat dope pangalaho ni angka panurirang di Jerusalem. Margabusi do halahi dohot marmainan jana diurupi halahi do halak na jahat, gabe umpe adong sahalak pe na ra pauba rohana. Anggo di Au mandosdos do halahi sudena rap parjahat songon halak Sodom dohot Gomora.”

JEREMIA 3:7

Didok rohangKu do: Dung dikarejohon ia sudena i, mulak ma ia nian tu Au, tapi nada mulak ia. Madung diligi Juda sude na i, ibotonia dadaboru panggampang i.

JESAYA 9:12

Rampason ni bangso Siria na sian Habincaran dohot bangso Pilistin di Hasundutan ma Israel. Tapi laing muruk dope anggo Tuhan jana sai giot manguhumi.

JEREMIA 3:3

Patunda ni i do gabe so aek sian langit, jana udan na somal di musimna nada unjung ro. Suman do ho tu siboru panggampang na so umboto hahaila.

JEREMIA 5:3

Anggo satutuna na nipangido ni Tuhan, anso setia do hamu. Dibalbal Tuhan do hamu, tapi nada mangarti hamu. Digopu Ia hamu, hape na so tarajar do hamu. Sijogal roha do hamu jana nada ra muba sian angka dosamunu.

HOSEA 11:5

Nada ra mulak angka halak Israel i tu Au, jadi hara ni i, angkon mulak tu Mesir halahi jana parentaon ni bangso Asur halahi.

HAGAI 2:17

Ma pola Huparo alogo na milas dohot ambolas laho manyegohon sude suan-suanan na di ladangmunu, hape laing matua so ra do hamu mulak tu Au.